ᑏᓯᒻᐱᕆ 17, 2018 – ᑰᒃᔪᐊᖅ, ᓄᓇᕕᒃ – ᑌᒪᓕ 2018 ᐊᕐᕌᒍᖓ ᐃᓱᓕᓕᕐᑎᓗᒍ, ᒪᑭᕝᕕᐅᑉ ᐊᖓᔪᕐᖄᒪᕆᖓ ᓵᓕ ᒍᐊᑦ ᐃᒫᒃ ᐅᖃᓚᐅᔪᕗᖅ, “ᑭᒡᒐᑐᕐᓗᒋᑦ ᒪᑭᕝᕕᒥ ᐳᕐᑐᓂᕐᓴᐅᖃᑎᒃᑲᓗ, ᒪᑭᕝᕕᐅᓗ ᓄᓇᓕᓐᓂ ᑭᒡᒐᑐᕐᑎᐅᓂᕐᓄᑦ ᑲᑎᖕᖓᔨᖏᑦ, ᓄᓇᕕᒻᒥᓗ ᐊᐅᓚᑦᓯᔨᒻᒪᕇᑦ, ᐱᓇᓱᑦᑎᖁᑎᓕᒫᕗᓪᓗ, ᖁᕕᐊᓱᕝᕕᓯᐅᑦᓯᐊᖁᕙᑎᒋᑦ ᐃᓱᒪᕕᒋᑦᓱᓯᓗ ᖃᓄᐃᖕᖏᓯᐊᕐᓗᓯ, ᐅᓚᐱᕐᓴᐅᑎᓕᒻᒥᓗ ᖁᕕᐊᓇᕐᑐᒥᓪᓗ ᕿᑲᕐᓇᓯᐅᓛᖁᑦᓱᓯ. ᓇᑯᕐᒦᒃ ᑲᔪᓯᔪᒥᒃ ᓴᐳᑦᔨᓯᒪᓚᐅᕐᒥᒐᑦᑎᒍᑦ ᐊᕐᕌᒍᕆᓚᐅᕐᑕᑎᓐᓂᒃ ᐊᒻᒪᓗ ᒪᑭᕝᕕᒃ ᓇᓪᓕᐅᑎᒍᑦᔭᐅᑎᓪᓗᒍ 40-ᓂᒃ ᐊᕐᕌᒍᓂᒃ ᓴᕐᕿᔮᕐᓂᖃᓕᕐᓂᒥᓄᑦ.”
ᐅᑯᐊᑕᒃᒐ ᑕᕐᕿᑕᒫᑦ ᐱᓇᓱᑦᑕᐅᖃᑦᑕᓚᐅᕐᑐᑦ ᒪᑭᕝᕕᒧᑦ 2018-ᖑᑎᓪᓗᒍ:
ᔭᓄᐊᕆ
ᒪᑭᕝᕕᒃ ᓂᕈᐊᕐᓇᓯᐅᕐᑎᓗᒍ ᖃᓄᐃᓕᒍᑕᐅᔪᑦ
ᐱᕙᓪᓕᐊᓯᒪᓃᑦ ᐅᓂᒃᑳᓴᖕᖑᓚᐅᔪᒋᕗᑦ ᓵᓕ ᒍᐊᑦ, ᐊᖓᔪᑦᓯᖅ ᓂᕈᐊᕐᑕᐅᑎᓪᓗᒍ ᒪᑭᕝᕕᐅᑉ ᐊᖓᔪᕐᖄᒪᕆᖓᑕ ᐃᓂᖓᓄᑦ ᔭᓄᐊᕆ 18-ᖑᓚᐅᔪᔪᒥ. ᐅᑎᓚᐅᔪᒻᒪᑦ ᒪᑭᕝᕕᒥᒃ ᓯᕗᓕᕆᐊᕐᑐᓯᑦᓱᓯ ᒪᑭᕝᕕᒃ ᓇᓪᓕᐅᑎᒍᑦᔭᐅᑎᓪᓗᒍ ᐊᕐᕌᒍᓂ 40-ᓂ ᓴᕐᕿᔮᓕᕐᓂᒥᓄᑦ. ᓂᕈᐊᕐᑕᐅᓂᖃᕐᓱᓂ ᓵᓕ ᒍᐊᑦ ᐃᒫᒃ ᐅᖃᓚᐅᔪᕗᖅ, “ᐊᖏᔪᐊᓗᒻᒥᒃ ᐅᐱᒍᓱᓐᓂᖃᕐᐳᖓ ᐅᑎᕆᐊᒥᒃ ᒪᑭᕝᕕᒧᑦ ᒫᓐᓇᐅᓕᕐᑎᓗᒍ. ᕿᓚᓈᕐᐳᖓᓗ ᐅᓂᒃᑲᐅᓯᖃᓛᕆᐊᒥᒃ ᒪᑭᕝᕕᒥ ᐱᕙᓪᓕᐊᑎᑦᓯᒍᑎᒋᓚᐅᕐᓯᒪᔭᑦᑎᓂᒃ ᓇᒻᒥᓂᖅ ᐊᑑᑎᓯᒪᔭᒃᑲᒍᑦ ᑕᑯᑦᓴᐅᑎᑦᓯᓗᖓᓗ ᖃᓄᑎᒋᒃ ᐃᓄᑐᐃᓐᓀᑦ ᐱᕙᓪᓕᐊᓯᒪᓂᖃᕐᒪᖔᑕ ᖃᓄᑎᒋᓪᓗ ᐊᖏᔪᒥᒃ ᐊᕐᕌᒍᓂ 40-ᓂ ᐱᔭᖃᕐᓯᒪᓕᕐᒪᖔᑕ. ᐊᑕᐅᑦᓯᑯᓪᓗ, ᓯᕗᓂᖃᕐᐳᖓ ᓵᖕᖓᓯᖃᑦᑕᓚᖓᓂᕋᓂᒃ ᑕᒐᑕᒐ ᐃᓄᑐᐃᓐᓀᑦ ᓵᖕᖓᓕᕐᑕᖏᓐᓂᒃ . ᒪᑭᕝᕕᒃ ᑐᕌᓚᖓᒻᒪᑦ ᐱᓇᓱᐊᕐᓂᐊᓗᓂ ᐱᔭᑦᓴᖁᑎᒥᓂᒃ ᐊᖏᔪᒥᒃ ᐊᑦᑐᐊᔪᓂᒃ ᓄᓇᓕᑐᖃᐅᓂᑦᑎᒍᑦ ᐱᔪᓐᓇᐅᑎᑦᑎᓄᑦ ᐃᓚᐅᑎᓪᓗᒋᑦ ᐱᔪᓐᓇᐅᑎᕗᑦ ᓇᒻᒥᓂ-ᑐᑭᑖᕆᖃᑦᑕᕈᓐᓇᓂᑦᑎᓂᒃ ᐅᕙᑦᑎᓅᓕᖓᔪᓂᒃ.”
ᑯᐯᒃ ᑲᕙᒪᖓ ᐅᒃᑯᐊᓂᑦᓴᕋᑕᕐᖁᖅ ᑐᑦᑐᓂᐊᖕᖑᐊᓂᐅᓲᓂᒃ ᑕᓯᐅᔭᐅᑉ ᑰᒑᓗᐊᑕ ᑐᑦᑐᖁᑎᖏᓐᓂᒃ
ᐊᔭᐅᕐᑕᐅᓱᑎᒃ ᒪᑭᕝᕕᒧᓪᓗ ᐊᓯᖏᓐᓄᓗ ᔦᒥᓯ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᒍᑎᖏᓐᓄᑦ ᐃᓚᐅᔪᓄᑦ ᐊᑐᕐᑕᖃᕐᐸᑐᓄᑦ ᑲᔪᓯᑎᑦᓯᓂᖃᕐᓱᑎᒃᓗ ᑕᓯᐅᔭᐅᑉ ᑯᒑᓗᐊᑕ ᑐᑦᑐᖏᓐᓂᒃ ᑯᐯᒃ ᑲᕙᒪᖓᑦ ᐅᖃᐅᓯᖃᑦᓴᕋᑕᓚᐅᔪᕗᖅ ᐅᒃᑯᐊᓯᓂᕋᕐᓱᓂ ᑐᑦᑐᓂᐊᖕᖑᐊᓂᐅᓲᒥᒃ ᑕᓯᐅᔭᐅᑉ ᑰᖓᑕ ᑐᑦᑐᖏᓐᓂᒃ ᐱᒋᐊᕐᓱᓂ ᕕᕗᐊᕆ 1, 2018-ᒥᑦ. ᑐᑦᑐᐃᑦ ᐅᓄᕐᑐᕖᖕᖓᐅᓯᒪᑦᓱᑎᒃ ᐃᑭᓕᐊᕿᓯᒪᓕᕐᒪᑕ ᐊᕐᕌᒍᐃᑦ 2000-ᓃᑎᓪᓗᒋᑦ ᐊᒥᓲᓂᖃᕐᓯᒪᔪᑦ ᒥᑦᓯᑎᓐᓂ 600,000 ᑌᒪ ᓅᕕᒻᐱᕆ 2016-ᖑᓕᕐᑎᓗᒍ ᐅᓄᕐᓂᖃᓕᓚᐅᔪᔪᑦ 181,000 ᒥᑦᓯᑎᓐᓂ. ᕕᕗᐊᕆ 2018 ᑕᕐᕿᖓ ᐊᑐᕐᑐᑐᖃᐅᓕᕐᑎᓗᒍ, ᑯᐯᒃ ᑲᕙᒪᒃᑯᑦ ᑐᕐᖃᑕᕐᕕᖓᑦ ᓇᐹᕐᑐᓕᕆᓂᕐᓄᓗ ᓄᓇᐅᓪᓗ ᐱᕈᕐᑐᖏᓐᓄᑦ ᒥᕐᖑᐃᓯᕐᕕᓄᓪᓗ (MFFP-ᑯᑦ) ᑐᓴᕐᑕᐅᑎᑦᓯᓕᓚᐅᔪᕗᖅ ᑐᑦᑐᐃᑦ ᐅᓄᕐᓂᖏᑦ, ᐃᓱᒪᒋᑦᓱᒋᑦ ᒥᑦᓴᐅᓵᕆᓂᐅᓯᒪᔪᑦ ᐃᑭᓕᑲᓪᓚᓯᒪᓂᖏᓐᓂᒃ ᐅᓪᓗᒥᐅᑎᓪᓗᒍ ᐅᖃᕐᓯᒪᕗᖅ ᑖᒃᑯᐊ ᑐᑦᑐᐃᑦ ᓱᓕ ᐃᑭᓕᕙᓪᓕᐊᑐᐃᓐᓇᖏᓐᓇᕆᐊᖏᑦ.
ᕕᕗᐊᕆ
ᒪᑭᕝᕕᒃ ᓂᐱᖃᒻᒪᕆᒍᑎᖃᕐᐳᖅ ᑐᓴᕐᑕᐅᑎᑦᓯᓱᓂ ᐱᓇᓱᒐᖁᑕᐅᔪᓂᓪᓗ ᐊᖁᕕᕋᐅᑎᓂᕐᓄᓗ ᑕᑯᑦᓴᐅᑎᑦᓯᕕᒻᒧᑦ
ᕕᕗᐊᕆ ᐱᒋᐊᕐᖃᒥᐅᑎᓪᓗᒍ ᑲᑎᒍᑎᖃᕐᓯᒪᑎᓪᓗᒋᑦ ᑕᕐᕋᒥ ᐱᓇᓱᒐᓕᕆᓂᕐᓄᓗ ᐊᖁᕕᕋᐅᑎᓂᕐᓄᓗ ᑕᑯᑦᓴᐅᑎᑦᓯᓂᕐᒥᒃ ᐋᑐᒑᒥ, ᓵᓕ ᒍᐊᑦ ᒪᑭᕝᕕᒧᑦ ᐊᖓᔪᕐᖄᒪᕆᐅᓂᐊᕐᓱᓂ ᓂᕈᐊᕐᑕᐅᓂᕐᒥᒃ ᑭᖑᓂᐊᓂ ᐃᓄᓕᒫᓄᑦ ᐅᖄᒋᐊᖕᖓᓚᐅᔪᕗᖅ. ᐅᖃᐅᓯᖃᒻᒪᕆᓚᐅᔪᕗᕐᓗ ᐃᓄᑐᐃᓐᓀᑦ ᐃᒻᒥᓂᕐᓱᕈᓐᓇᓂᕐᒥᒃ ᓄᓇᕕᒻᒥ ᐱᒋᐊᖃᕐᓂᖓᑦ ᐱᒻᒪᕆᐅᒋᐊᖓ. ᐊᒥᓱᑲᓪᓚᓂᒃ ᐅᖃᐅᓯᖃᕐᓱᓂ ᐅᓂᒃᑲᐅᓯᖃᓚᐅᔪᕗᖅ ᐃᓄᐃᑦ ᓄᓇᕕᒻᒥᐅᑦ ᐱᕙᓪᓕᐊᓯᒪᓂᖏᓐᓂᒃ ᐅᓂᒃᑲᐅᔨᑦᓱᓂᓗ ᖃᓄᐃᓕᖓᓂᕕᓂᕐᒥᓂᒃ ᔦᒥᓯ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᒍᑎᖏᓐᓂᒃ ᐱᔭᖃᕋᓱᑦᓱᑎᒃ, ᐅᖃᐅᓯᖃᓪᓚᕆᓗᐊᖕᖑᐊᓚᐅᔪᔪᖅ ᐊᖏᕐᓂᐅᔭᖕᖏᒪᕆᑦᑐᕕᓂᐅᒐᒥᒃ ᓄᓇᓕᑐᖃᐅᔪᑦ ᐱᔪᓐᓇᐅᑎᖏᓐᓂᒃ ᓴᒃᑯᓯᑎᑕᐅᒐᓱᑦᓱᑎᒃ. ᐅᖃᓚᐅᔪᕗᕐᓗ ᑕᒪᒃᑯᓂᖓ ᕿᒥᕐᕈᒋᐊᑦᓯᐊᓛᕐᓂᕋᕐᓱᓂ ᐊᒻᒪᓗ ᐅᖃᐅᓯᖃᕐᒥᓱᓂ ᑕᒐᑕᒐᐅᔪᖅ ᐱᔪᓐᓇᐅᑎᑖᖑᓯᒪᔪᓂᒃ ᒫᓐᓇᓯᐅᑎᐅᓕᕐᓱᑎᒃ ᐱᕙᓪᓕᐊᑎᑕᐅᒪᑦᓱᑎᒃ ᐊᖏᖃᑎᒌᒍᑏᑦ ᐊᑎᓕᐅᖃᑎᒌᒍᑕᐅᓂᕕᓂᖏᑕ ᑭᖑᓂᐊᓂ, ᓲᕐᓗ ᑲᓇᑕᒥ ᐱᖁᔦᑦ ᐊᒻᒪᓗ ᓯᓚᕐᔪᐊᒥᐅᑦ ᑲᑎᖕᔨᕐᔪᐊᖏᑕ ᐅᖃᒻᒪᕆᐅᑎᒋᓯᒪᔭᖏᑦ ᐃᓕᖓᔪᑦ ᓄᓇᓕᑐᖃᐅᔪᑦ ᐱᔪᓐᓇᐅᑎᖃᕐᑎᑕᐅᒍᑎᖏᓐᓄᑦ (UNDRIP).
ᒪᑭᕝᕕᒃ ᓴᐳᑦᔨᓯᒪᓚᐅᔪᒻᒥᔪᖅ 15 ᐅᖓᑖᓂ ᐊᒥᓲᓂᓕᓐᓂᒃ ᓄᓇᕕᒻᒥᐅᓂᒃ ᐱᑦᓴᓕᐅᕐᑎᓂᒃ ᐃᓚᐅᔭᕐᑐᑎᑦᓱᒋᑦ ᑕᕐᕋᒥ ᐱᓇᓱᒐᖁᑎᓕᓐᓄᓗ ᐊᖁᕕᕋᐅᑎᓂᕐᒥᓗ ᐱᓇᓱᐊᕐᑏᑦ ᑕᑯᑦᓴᐅᑎᑦᓯᕕᖓᓂ. ᑖᒃᑯᐊ ᑕᒪᑐᒥᖓ ᐱᓇᓱᐊᓲᑦ ᑭᖑᓪᓕᕆᓛᓕᕐᒥᔭᖓ ᐊᑑᑎᔭᐅᔪᒫᓕᕆᕗᖅ ᕕᕗᐊᕆ 5 – 8, 2020 ᐅᓪᓗᖏᓐᓂ ᐋᑐᒑᒥᑦᓭᓇᖅ.
ᐸᕐᓇᕈᑎᐅᓯᒪᔪᑦ ᑮᓇᐅᔭᖃᕐᑎᓯᒐᔭᕐᓂᒥᒃ ᓴᓂᕐᑕᐅᒍᑎᖏᓐᓂᒃ ᕿᒪᒃᑲᑰᓕᕐᑐᑦ ᒪᙯᑦᑎᓯᕕᐅᖃᑦᑕᓯᒪᔪᑦ ᐅᖃᕐᑕᐅᕗᑦ
ᑯᐯᒃᑯᑦ ᑲᕙᒪᖓᑦ ᐅᖃᐅᓯᖃᓚᐅᔪᕗᖅ ᑮᓇᐅᔭᒻᒪᕆᓐᓂᒃ $16.1-ᒥᓕᐋᓐᓂᒃ ᐱᓇᓱᒍᑎᐅᓛᕐᓂᕃᑦᓱᓂ ᓴᓂᕈᑎᐅᓗᑎᒃ 200 ᒥᑦᓯᑎᓐᓃᑐᓂᒃ ᒪᙯᑦᑎᓯᕕᐅᕙᑦᑐᕕᓂᕐᓂᒃ ᓄᓇᕕᒻᒥ ᐊᑐᕐᑕᐅᓯᒪᓗᐊᖕᖑᐊᓱᑎᒃ ᑐᑦᑐᓂᐊᖕᖑᐊᑐᓄᑦ. ᑖᒃᑯᐊ ᐅᖃᐅᓯᕆᔭᐅᓚᐅᔪᔪᑦ ᑯᐯᒃ ᑲᕙᒪᖓᑕ ᐱᑦᔪᔨᕕᖓᓄᑦ ᐃᓕᖓᑦᓱᓂ ᓇᐹᕐᑐᓕᒻᒧᑦ, ᓂᕐᔪᑎᕆᓂᕐᓄᓗ ᐊᒻᒪᓗ ᒥᕐᖑᐃᓯᕐᕕᓕᕆᓂᕐᓄᑦ. ᐊᕐᕌᒍᓂ ᑕᓪᓕᒪᓂ ᐱᓇᓱᑦᑕᐅᑦᔪᑦᓴᐅᓱᑎᒃ ᓴᓂᕈᑎᐅᓗᑎᒃ ᒪᙯᕝᕕᕕᓂᕐᓂᒃ ᖃᓄᑐᐃᓐᓇᖅ ᐱᒧᓂᒃ. $10.1-ᒥᓕᐋᓐᓂᒃ ᐅᓄᕐᓂᓖᑦ ᑐᓂᔭᐅᓛᕐᑎᓗᒋᑦ ᓯᕗᓂᖓᓂ ᒫᑦᔨ 31, 2018. $2.5-ᒥᓕᐋᓐᓂᒃ ᒪᑭᕝᕕᒃ ᐁᑦᑐᑕᐅᑎᓪᓗᒍ, $2.5-ᒥᓕᐋᓐ ᐊᓪᓓᑦ ᓈᔅᑲᐲᑦ ᐱᕙᓪᓕᐊᑎᑦᓯᓂᕐᓄᑦ ᐱᓇᓱᒐᖃᕐᕕᖁᑎᖓᓅᕐᑎᓗᒋᑦ, ᐊᒻᒪᓗ $5.1-ᒥᓕᐋᓐ ᑐᓂᔭᐅᑎᓪᓗᒋᑦ ᑯᐯᒃᒥ ᒪᙯᑦᑎᓯᕕᓕᕆᔩᑦ ᑲᑐᑦᔨᖃᑎᒌᕝᕕᖓᓐᓄᑦ (FPQ). ᐊᒥᐊᒃᑯᐃᑦ ᐅᓄᕐᓂᓖᑦ $6-ᒥᓕᐋᓐᓂᒃ ᐊᕕᖃᑎᒌᑎᑦᓯᒍᑎᐅᒍᒫᕐᓂᐊᑎᓪᓗᒋᑦ 2019-2022 ᐊᕐᕌᒍᖏᓐᓂ ᐃᓕᖓᓚᖓᑦᓱᑎᒃ ᓇᐹᕐᑐᓕᕆᓂᕐᓄᓗ, ᓂᕐᔪᑎᓕᕆᓂᕐᓄᓗ ᒥᕐᖑᐃᓯᕐᕕᓕᕆᓂᕐᓄᓗ ᐊᑐᕐᑕᐅᓛᕐᓗᑎᒃ ᓴᕐᕿᑎᑦᓯᒍᑎᐅᓗᑎᒃ ᒪᕐᕉᓂ ᐱᓇᓱᒑᓐᓂ ᐱᓇᓱᑦᑎᐅᓗᑎᒃᓗ ᑲᒪᓇᓱᑦᑎᐅᓗᑎᓪᓘᓛᕐᑐᓂᒃ (ᐊᑐᕐᓗᒋᑦ $1-ᒥᓕᐋᓐ), ᐊᒻᒪᓗ $5-ᒥᓕᐋᓐ ᓴᓂᕐᕙᑕᐅᓗᑎᒃ ᐊᑐᕐᑕᐅᔪᑦᓴᒫᕈᕐᓗᑎᒃ ᐊᑭᓕᕐᑐᕆᐊᖃᓛᕐᑐᓄᑦ ᑭᖑᓂᐊᓂ ᓯᕗᓪᓕᐹᑦ ᓴᓂᕐᓂᐅᔪᕕᓃᑦ ᑮᓇᐅᔭᕐᑐᕈᑎᑦᓴᕆᔭᖏᓐᓂ.
ᑕᒪᓐᓇ ᕿᓚᓈᕈᑕᐅᑦᓱᓂ ᐱᓇᓱᑦᑕᐅᔪᖅ ᐱᔭᕆᐊᑐᔪᒐᓚᒃ ᐅᐱᓐᓇᕋᓂ ᒪᙯᕝᕕᖁᑎᕕᓃᑦ ᐃᓚᖏᑦ 1980-ᓃᑦᑐᓂ ᐊᕐᕌᒍᕐᓂ ᓇᑉᐸᑕᐅᓯᒪᒻᒪᑕ, ᓇᒻᒥᓂᓕᕕᓃᓪᓗ ᕿᓂᕐᑕᐅᒋᐊᖃᕐᓱᑎᒃ ᖃᐅᔨᑎᑕᐅᒋᐊᖃᕐᓱᑎᒃᓗ ᐃᑐᑦᑎᑕᐅᒍᒪᓕᕐᒪᑕ, ᐊᒻᒪᓗ ᓇᒻᒥᓂᖅ ᐃᑐᑦᑎᕆᒍᒪᒻᒪᖔᑕ ᑐᑭᓯᓂᐊᕐᕕᐅᓗᑎᒃ. ᑲᒪᒍᒪᖕᖏᐸᑕ, ᐃᓄᑐᐃᓐᓀᓗ ᐊᓪᓓᓗ ᓈᔅᑳᐲᑦ ᐱᓇᓱᑦᑕᖃᓛᕐᑎᓗᒋᑦ, ᑐᖕᖓᕕᖃᕐᓗᑎᒃ ᓱᑯᑦᓯᒦᓐᓂᖏᓐᓂᒃ ᒪᙯᕝᕕᕕᓃᑦ. ᓄᓇᕕᒻᒥᓕ, ᑲᑎᕕᒃ ᓄᓇᓕᓕᒫᑦ ᑲᕙᒪᖓ ᑌᒣᑦᑐᓂᒃ ᐱᓇᓱᓕᓂᑲᓪᓚᒪᕆᐅᓕᕐᑐᖅ ᓴᓂᕐᓂᒥᒃ ᐱᓇᓱᖃᑦᑕᓯᒪᒐᒥᒃ ᐅᔭᕋᓐᓂᐊᕕᕕᓂᕐᓂᒃ. ᒪᑭᕝᕕᒃ ᓯᕗᓂᖃᕐᑐ ᑲᑎᕕᒃ ᓄᓇᓕᓕᒫᑦ ᑲᕙᒪᖓᓂᒃ ᐱᓇᓱᖃᑎᖃᓛᕐᓱᓂ ᑕᒪᒃᑯᓂᖓ ᐊᕐᕌᒍᓂ ᓯᕗᓂᑦᑎᓃᑦᑐᓂ ᐱᕙᓪᓕᐊᑎᓛᕐᑕᒥᓐᓂᒃ.
ᒪᑭᕝᕕᒃ ᐅᐱᒍᓱᒃᑲᓗᐊᕐᓱᓂ ᐱᓇᓱᒍᑎᓕᐊᖑᒪᔪᓂᒃ ᐃᓱᒫᓗᒍᑎᓂᒃ ᐅᖃᐅᓯᖃᕐᓯᒪᒋᕗᖅ ᑐᕌᕐᑎᓗᒋᑦ ᑐᕐᖃᑕᕐᕕᒧᑦ ᓇᐹᕐᑐᓕᕆᓂᕐᓄᓗ, ᓂᕐᔪᑎᓕᕆᓂᕐᓄᓗ ᐊᒻᒪᓗ ᒥᑭᖑᐃᓯᕐᕕᓕᕆᓂᕐᓄᑦ ᓄᓇᓕᑐᙯᓪᓗ ᐊᐅᓚᑕᐅᓂᖏᓐᓄᑦ ᐱᑦᔪᑎᖃᕐᓱᓂ ᐃᓘᓐᓀᓂᒃ ᐱᓇᓱᒍᑎᑦᓴᓕᐊᖑᒪᔪᓂᒃ. ᒪᑭᕝᕕᒃ ᐅᖃᓚᐅᔪᔪᖅ ᐱᓇᓱᑦᑕᐅᔪᓂᒃ ᑲᒪᒍᑎᐅᔪᑦ ᑲᔪᓯᑎᑦᓯᓂᐅᓂᕐᓴᐅᒋᐊᖃᕆᐊᖏᑦ ᓇᓛᒎᑦᓯᐊᑐᓂᒃ ᑐᖕᖓᕕᖃᕐᓗᑎᒃ ᓲᓱᑦᓴᓂᖃᑦᓯᐊᓗᑎᒃᓗ ᒪᙯᑏᓪᓗ, ᐃᖃᓗᓐᓂᐊᑏᓪᓗ ᐊᒻᒪᓗ ᒥᑭᒋᐊᕐᓂᐊᑏᑦ ᒪᓕᒐᖁᑎᖏᓐᓂᒃ ᐱᓇᓱᐊᖔᕈᓐᓀᓗᒋᑦ ᓲᕐᓗ ᐱᓇᓱᖔᕈᓐᓀᓗᑎᒃ “ᑮᓇᐅᔭᓕᐅᕋᓱᒍᑎᓂᒃ ᐱᕙᓪᓕᐊᑎᑦᓯᒍᑎᖃᕐᓂᒥᒃ” ᑐᑭᖃᖔᕈᓐᓀᓗᑎᒃ. ᒪᑭᕝᕕᒃ ᐊᑦᓱᕈᕈᑎᖃᓚᐅᔪᑎᓪᓗᒍ ᐊᕗᖓᐅᓕᓂᕐᓴᓂᒃ ᐅᖃᖃᑎᒌᓐᓂᖃᕈᒪᑦᓱᓂ ᐃᓕᖓᔪᓂᒃ ᓴᓂᕐᓂᓄᑦ ᐱᓇᓱᒍᑏᑦ ᐃᓂᓪᓚᑕᐅᒪᔪᑦᓴᐅᒋᐊᖏᑦ ᓴᓂᕐᓂᑐᐃᓐᓇᐅᓗᑎᒃ. ᐃᒣᓕᖓᒋᐊᖔᕈᑎᒋᒍᑦᑎᒌᕐᓂᒥᒃ ᐱᑦᔪᑎᖃᕐᓱᑎᒃ ᑲᑎᖕᖓᔨᐅᓚᖓᔪᑦ ᓴᕐᕿᑎᑕᐅᓂᖃᓚᐅᔪᕗᑦ ᐊᐅᓚᑦᓯᔨᐅᓚᖓᓗᑎᒃ ᑲᔪᓯᑎᑕᐅᓂᖏᓐᓂᓗ ᐊᒻᒪᓗ ᐸᕐᓇᑕᐅᓂᖏᓐᓂᒃ ᖃᓄᐃᓘᕐᓗᒋᑦ ᐱᓇᓱᒍᑎᐅᖃᑦᑕᓂᐊᕐᑐᓂᒃ.
ᖁᐊᕐᑕᒥᐅᑦ ᑐᖕᖓᓱᑦᑎᓯᕗᑦ ᒪᑭᕝᕕᐅᑉ ᓄᓇᓕᓐᓂ ᑭᒡᒐᑐᕐᑎᐅᓂᕐᒧᑦ ᑲᑎᖕᖓᔨᖏᑕ ᑲᑎᖕᖓᓂᖓᓐᓂᒃ
ᒪᑭᕝᕕᐅᑉ ᓄᓇᓕᓐᓂ ᑭᒡᒐᑐᕐᑎᐅᓂᕐᓄᑦ ᑲᑎᖕᖓᔨᖁᑎᖏᑦ ᑲᑎᓚᐅᔪᕗᑦ ᖁᐊᕐᑕᒥ ᕕᕗᐊᕆ 19-22 ᐅᓪᓗᖏᓐᓂ ᐅᖃᖃᑎᒌᒍᑎᖃᔭᕐᑐᓱᑎᒃ ᒪᑭᕝᕕᐅᑉ ᐃᖏᕐᕋᑎᑦᓯᒍᑎᖏᓐᓂᒃ, ᓵᓕ ᒍᐊᓪᓗ ᓄᑖᓂᒃ ᐱᓂᐊᕐᓂᓕᕆᓂᑎᒍᑦ ᑐᕌᒐᕆᒍᒪᓕᕐᑕᖏᓐᓂᒃ, ᐊᒻᒪᓗ ᐊᖏᕐᑕᖃᕆᐊᕐᑐᓱᑎᒃ ᒪᑭᕝᕕᐅᑉ ᑮᓇᐅᔭᕐᑐᕈᑎᒥᒍᑦ ᐊᓪᓚᓯᒪᔪᖁᑎᒥᑕ ᖃᓄᐃᓕᖓᓂᕆᓕᕐᑕᖏᓐᓂᒃ.
ᒪᑭᕝᕕᒃ ᐊᖏᕐᐳᖅ ᓴᕐᕿᑎᑕᐅᓂᖓᓂᒃ ᓄᓇᕕᒻᒥ ᐱᓇᓱᒐᖁᑕᐅᔪᓪᓗ ᐱᓇᓱᒐᖃᕐᕕᖁᑕᐅᔪᓪᓗ ᐊᓪᓚᑕᐅᒪᕕᑦᓴᖓᓂᒃ
ᒪᑭᕝᕕᐅᑉ ᓄᓇᓕᓐᓂ ᑭᒡᒐᑐᕐᑎᖏᑕ ᖁᐊᕐᑕᒥ ᑲᑎᖕᖓᓂᖃᕐᓱᑎᒃ ᓄᐃᓪᓚᕆᓚᐅᔪᔭᖓ ᒪᓐᓇ ᑐᑭᑖᕈᑎᖃᕐᓂᖅ ᓴᐳᑦᔨᓯᒪᓂᐊᕐᓱᓂ ᓴᕐᕿᑎᑕᐅᓂᖓᓂᒃ ᓄᓇᕕᒻᒥ ᐱᓇᓱᒐᖁᑕᐅᔪᓪᓗ ᐱᓇᓱᒐᖃᕐᕕᖁᑕᐅᔪᓪᓗ ᐊᓪᓚᑕᐅᒪᕕᑦᓴᖓᓂᒃ.
ᓴᕐᕿᑎᑕᐅᓂᖓ ᐱᓇᓱᒐᖁᑕᐅᔪᓪᓗ ᐱᓇᓱᒐᖃᕐᕕᖁᑕᐅᔪᓪᓗ ᐊᓪᓚᑕᐅᒪᕕᑦᓴᖓᑕ ᐃᓕᖓᓚᖓᑦᓱᓂ ᓄᓇᕕᒻᒧᑦ ᖁᕝᕙᑎᕆᒍᑎᐅᒋᐊᒃᑲᓂᕐᓗᓂᓗ ᐊᒻᒪᓗ ᖃᐅᔨᒪᔭᐅᓂᕐᓴᐅᓕᕐᓗᑎᒃ ᓄᓇᕕᒻᒥᐅᑦ ᐃᓄᑐᐃᓐᓀᑦ ᐱᓇᓱᒐᖁᑎᖏᑦ ᐊᒻᒪᓗ ᑮᓇᐅᔭᑎᒍᑦ ᒪᑭᑕᒐᓱᒍᑎᑦᓴᓂᒃ ᐱᕙᓪᓕᐊᑎᑦᓯᒍᑎᑦᑎᓂᒃ ᓄᓇᖁᑎᑦᑎᓂ ᑕᒪᒃᑯᐊ ᐊᒥᓱᐃᓂᒃ ᐱᐅᓯᖃᕈᑎᐅᑦᓱᑎᒃ ᐱᔭᐅᕙᒻᒪᑕ. ᐱᒋᐊᖕᖓᐅᑎᒋᓗᒋᑦ ᐅᕕᒃᑲᓂᒃ ᐱᓇᓱᒐᖁᑎᖃᕋᓱᓕᕐᑐᓂᒃ ᓴᐳᑦᔨᓯᒪᓂᕐᓂᑦ ᑎᑭᓪᓗᒋᑦ ᐃᑲᔪᕐᓯᔭᖃᕐᓃᑦ ᐃᓂᓪᓚᒌᕐᓯᒪᔪᓂᒃ ᐱᓇᓱᒐᖁᑕᐅᔪᓂᒃ ᐱᔭᖃᕐᓂᓴᐅᖁᓪᓗᒋᑦ ᐊᓯᒋᐊᒃᑲᓂᖏᓐᓂᒃ ᐱᑦᔪᔨᒍᑎᐅᒍᓐᓇᑐᓂᒃ ᐱᔭᐅᑐᐃᓐᓇᕈᓐᓇᕋᑎᒃ, ᑖᓐᓇ ᑭᖕᖒᒪᓇᓪᓚᕆᑦᓱᓂ ᐊᓪᓚᑕᐅᒪᕕᑦᓴᖅ ᓱᕐᖁᐃᑐᒥᒃ ᐅᓪᓗᒥᒃ ᐃᓱᓕᒍᑦᔭᐅᓂᖃᖃᑦᑕᓛᕐᒪᑦ ᑭᖕᖒᒪᓇᕐᑐᓂᒃ ᐱᑦᔪᔨᒍᑎᓂᒃ ᓄᓇᕕᒻᒥᐅᓄᑦ ᐃᓄᑐᐃᓐᓇᓄᑦ ᐱᓇᓱᒐᖁᑎᓕᓐᓄᑦ ᓄᓇᕕᒻᒥᓗ ᓄᓇᓂ ᐊᓯᑦᑎᓂ ᖃᐅᔨᒪᔭᐅᓂᕐᓴᐅᑎᑦᓯᓕᕐᓗᓂ. ᐱᒻᒪᕆᐅᑦᓱᓂ ᐱᕙᓪᓕᐊᑎᑦᓯᓂᕐᒥᒃ ᐱᓇᓱᒍᑎᑦᓴᐅᒐᒥ ᓄᓇᕕᒻᒥ.
ᒪᑭᕝᕕᐅᑉ ᓴᓇᓂᕐᓄᑦ ᐱᑦᔪᔨᕕᖓ ᑐᓴᕐᑕᐅᑎᑦᓯᕗᖅ ᑕᒃᒐᓂ ᐊᕐᕌᒍᒥ ᐃᓄᐃᑦ ᐊᓂᕐᕋᓴᖏᓐᓂᒃ ᐊᒥᓲᓂᕐᐹᓂ ᓇᑉᐯᓂᖃᓚᐅᕆᐊᒥᒃ
ᒪᑭᕝᕕᐅᑉ ᓴᓇᓂᕐᓄᑦ ᐱᑦᔪᔨᕕᖓ ᐱᔭᕇᕐᑕᖃᓚᐅᔪᕗᖅ “ᐊᒥᓲᓂᕐᐹᓂᒃ ᐃᓄᐃᑦ ᐊᓂᕐᕋᓴᖏᓐᓂᒃ ᐃᒡᓗᓕᐅᕐᓱ ᓴᓇᓂᕐᒥᒃ ᐱᓇᓱᒍᑎᒥᒍᑦ ᓄᓇᕕᒻᒥ” ᐃᒡᓗᓂ 212-ᓂᒃ ᓇᑉᐯᓱᑎᒃ ᖁᓕᐅᖕᖏᒐᕐᑐᓂ ᓄᓇᓕᓐᓂ ᓴᓇᓐᓇᐅᑉ ᐊᕐᕌᒍᖓᓂ 2017-2018-ᒥ. ᑖᒃᑯᐊ ᐃᒡᓗᓕᐊᖑᓯᒪᓕᕐᑐᓂᒃ ᐊᒥᓱᖕᖑᐃᒋᐊᕈᑎᐅᓚᐅᔪᔪᑦ 1638-ᓂ ᐃᒡᓗᓕᐅᕐᓯᒪᓕᕐᑎᓱᒋᑦ ᒪᑭᕝᕕᐅᑉ ᓴᓇᔨᖏᑕ ᓴᓇᓯᒪᓕᕐᑕᖏᓐᓂᒃ 2000 ᐊᕐᕌᒍᖓᓂᓂᑦ (ᑏᓯᒻᐱᕆ 2018 ᑎᑭᑦᓱᒍ, ᐃᒡᓗᓕᐊᖑᒪᓕᕐᑐᑦ ᐅᓄᕐᓂᖃᓕᓚᐅᔪᕗᑦ 1750-ᓂ). ᑖᒃᑯᐊ ᓴᓂᐊᓐᓂ ᑯᐯᒃ ᑲᕙᒪᒃᑯᑦ ᐃᒡᓗᓕᕆᔨᕐᔪᐊᖏᑦ ᐊᒥᓲᓂᕐᐹᓂ ᐃᒡᓗᓕᐅᓚᐅᕐᓯᒪᒻᒥᒪᑕ 164-ᓂᒃ 1986-ᖑᑎᓪᓗᒍ ᐊᑦᔨᒌᑦᑎᖏᑦᑐᓂᒃ ᓴᓇᒻᒪᓕᓐᓂᒃ, ᐃᓚᐅᑎᓪᓗᒋᑦ ᐋᕐᕿᓱᑐᐃᓐᓇᕆᐊᓖᑦ ᐃᒡᓗᔪᐊᑦᓭᑦ.
ᒫᑦᓯ/ᒫᑦᔨ
ᒪᑭᕝᕕᐅᑉ ᐊᕐᕌᒍᑕᒫᕐᓯᐅᑎᒥᓂᒃ ᑲᑎᖕᖓᓂᖃᕐᓂᖓ ᐊᑑᑎᔭᐅᔪᖅ ᐳᕕᕐᓂᑐᒥ
ᒪᑭᕝᕕᒃ ᐊᕐᕌᒍᕐᓂ 40-ᓂ ᓇᓪᐅᑎᓂᖃᕐᓱᓂ ᐊᕐᕌᒍᑕᒫᑦ ᑲᑎᒪᓂᕐᔪᐊᖃᕐᑎᓯᓂᕆᓲᒥᓂᒃ ᐊᑑᑎᔭᖃᓚᐅᔪᕗᖅ ᐳᕕᕐᓂᑐᒥ ᑕᓯᐅᔭᕐᔪᐊᑉ ᓯᑦᔭᖓᓂ. ᓂᕈᐊᕐᑕᐅᖃᒻᒥᒥᒃ ᐊᖓᔪᕐᖄᒪᕆᑦᑕᖃᒻᒥᓱᓂ ᓵᓕ ᒍᐊᑦᒥᒃ ᓯᕗᓕᕐᑎᖃᓕᕐᓱᓂ, ᑌᒃᑯᐊᓗ ᐊᑎᓕᐅᕐᑎᐅᓚᕆᑦᓯᒪᔪᑦ ᔦᒥᓯ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᒍᑎᖏᓐᓂᒃ ᐃᓚᐅᔭᕐᑐᓯᒪᓚᐅᔪᕗᑦ ᑕᒃᑯᐊ ᑲᑎᒪᓂᕐᔪᐊᒧᑦ ᑲᑎᖕᖓᓂᕐᓗ ᐃᑉᐱᓇᕐᑐᑕᖃᓚᐅᔪᕗᖅ ᐱᕙᓪᓕᐊᓯᒪᓂᕐᒥᒃ, ᐊᒥᓱᐊᓗᓐᓂᒃ ᐅᖃᖃᑎᒌᒍᑎᖃᕐᓱᑎᒃ ᓱᓇᑐᐃᓐᓇᓅᓕᖓᔪᓂᒃ. ᑖᓐᓇ ᑲᑎᒪᓂᕐᔪᐊᖅ ᒪᑭᕝᕕᐅᕙᓚᐅᕐᑐᑎᑐᑦ ᑲᔪᓯᓂᖃᓚᐅᔪᔪᖅ ᐱᓇᓱᕝᕕᐅᓱᓂ ᐱᑕᖃᓪᓚᕆᒋᐊᓕᓐᓂᒃ ᐱᔭᑦᓴᖁᑎᓂᒃ ᑐᖕᖓᕕᓕᓐᓂᒃ ᐅᖃᒻᒪᕆᒍᑎᐅᔪᕕᓂᕐᓂᒃ ᓴᕐᕿᓂᖃᓕᓚᐅᔪᔪᓂᒃ ᑕᕐᖀᑦ ᐊᒥᓲᖕᖏᑐᑦ ᐊᓂᒍᕐᑎᓗᒋᑦ ᒣ ᑕᕐᕿᖓᓂ ᐱᒃᑲᑕᐅᓚᐅᔪᔪ ᒃ ᐱᓇᓱᒐᖃᕐᕕᖁᑕᐅᔪᓕᒫᑦ ᑲᑎᖕᖓᓂᖓᓐᓄᑦ ᐊᑑᑎᔭᐅᓚᐅᔪᔪᒧᑦ ᑰᒃᔪᐊᒥ.
17-ᖑᒍᑎᒋᓕᕐᑕᖓ ᐃᕙᒃᑲᓱᑎᒃ ᕿᒻᒥᑐᐃᓐᓇᓂᒃ ᕿᒻᒥᓖᑦ ᓱᑲᓕᐅᑎᕙᓐᓂᖓᑕ
11 ᕿᒧᑦᓰᑦ ᐃᕙᒃᑲᓱᑎᒃ ᓱᑲᓕᐅᑎᓚᐅᔪᕗᑦ ᓱᑲᓕᐅᑎᓂᐅᕙᑦᑐᑦ 17-ᖑᒍᑎᒋᓕᕐᑕᖓᓂᒃ ᑕᓯᐅᔭᒥᑦ ᐃᖏᕐᕋᓯᑦᓱᑎᒃ ᒫᑦᔨᑐᖃᐅᓕᕐᑎᓗᒍ ᑭᖑᓂᐊᒍᑦ 10 ᕿᒧᑦᓰᑦ ᑎᑭᐅᑎᕕᒻᒧᑦ ᑎᑭᒍᓐᓇᓯᓚᐅᔪᔪᑦ ᐱᓇᓱᐊᕈᓰᒃ ᒪᕐᕉᒃ ᐅᖓᑖᓄᒐᓚᒃ ᐃᖏᕐᕋᓱᑎᒃ ᑎᑭᐅᑎᓚᐅᔪᔪᑦ ᐁᕆᓕ 5-ᒥ ᑎᑭᑦᓱᑎᒃ ᑲᖏᕐᓱᔪᐊᒧᑦ. ᐃᕙᒃᑲᑐᓂ ᑎᑭᕐᖄᓂᕐᐹᖑᓚᐅᔪᔫᒃ ᒍᐃᓕ ᑮᓐ, ᓄᑲᕐᓯᑯᒃ ᑭᐊᓐ ᓚᐲᒃᑯᒃ ᑕᓯᐅᔭᕐᒥᐅᒃ, ᑐᖓᓕᕆᔭᐅᓚᐅᔪᔫᒃ ᐁᓴ ᓱᕈᓯᓛᕐᓗ ᐁᐱᓕ ᖁᒫᓗᓪᓗ ᐳᕕᕐᓂᑐᕐᒥᐅᒃ, ᐱᖓᔪᒋᔭᐅᑎᓪᓗᒋᒃ ᒫᓯᐅ ᐋᕐᖓᓗ ᐸᐅᓕ ᕿᓰᕐᓗ ᑲᖏᕐᓱᔪᐊᕐᒥᐅᒃ. ᓱᑲᓕᐅᑎᔪᑦ ᑎᑭᑉᐸᓕᐊᓂᕕᓂᖏᑕ ᐊᓪᓚᑕᐅᒪᒍᑎᖏᑦ ᑕᑯᔭᐅᒍᓐᓇᑐᑦ ᖃᕆᑕᐅᔭᒃᑯᑦ ᐅᕙᓂ www.ivakkak.com
ᐁᕆᓕ
ᓵᓕ ᒍᐊᑦ ᑲᑎᖕᖓᓯᔪᖅ ᑯᐯᒃ ᑲᕙᒪᒃᑯᑦ ᐊᖓᔪᕐᖄᒪᕆᖓᓂᒃ ᕕᓕᑉ ᑯᐃᔮᕐᒥᒃ
ᐁᕆᓕ 11-ᖑᑎᓪᓗᒍ ᓵᓕ ᒍᐊᑦ ᑯᐯᒃ ᓯᑎᓕᐊᓚᐅᔪᕗᖅ ᑲᑎᖕᖓᓯᒋᐊᖕᖓᕆᐊᕐᑐᓱᓂ ᑯᐯᒃ ᑲᕙᒪᒃᑯᑦ ᐊᖓᔪᕐᖄᒪᕆᖓᓐᓂᒃ ᕕᓕᑉ ᑯᐃᔮᕐᒥᒃ ᐃᓚᐅᓚᐅᔪᔪᑦ ᑯᐯᒃ ᑲᕙᒪᒃᑯᑦ ᑐᕐᖃᑕᕐᕕᖓᑦ ᐱᔭᑦᓴᖁᑎᓕᒃ ᓄᓇᓕᑐᙯᑦ ᐊᐅᓚᑕᐅᒍᑎᖏᓐᓂᒃ ᔨᐊᕝ ᑭᐊᓕ ᐊᒻᒪᓗ ᑯᐯᒃ ᑲᕙᒪᒃᑯᑦ ᐱᖁᔭᓕᐅᕐᕕᖓᓂ ᑭᒡᒐᑐᕐᑎ ᔮᓐ ᐴᔅᓰ.
ᒪᑭᕝᕕᒃ ᐊᑑᑎᔭᐅᑎᑦᓯᕗᖅ ᐱᓇᓱᒐᓕᕆᓂᕐᓅᓕᖓᔪᓂᒃ ᑲᑎᒪᓂᐊᕈᓯᕐᓂᒃ ᐅᕕᒃᑲᓄᑦ ᐃᓕᖓᔪᓂᒃ
ᐁᕆᓕ ᐱᒋᐊᕐᖃᒥᐅᑎᓪᓗᒍ ᒪᑭᕝᕕᒃ ᐊᑑᑎᔭᐅᑎᑦᓯᓚᐅᔪᕗᖅ ᐅᕕᒃᑫᑦ ᐱᓇᓱᒐᑦᓴᓕᕆᓂᕐᓅᓕᖓᔪᓂᒃ ᑲᑎᒪᓂᐊᕈᓯᖓᓐᓂᒃ ᓴᓪᓗᓂ, 16 ᐅᕕᒃᑫᑦ ᐃᓚᐅᓚᐅᔪᔪᑦ ᓯᑕᒪᐅᔪᖕᖏᒐᕐᑐᓂᑦ ᓄᓇᕕᐅᑉ ᓄᓇᓕᖏᓐᓂᑦ ᐱᓯᒪᔪᑦ. ᑮᓇᐅᔭᖃᕐᑎᑕᐅᓚᐅᔪᔪᑦ ᓄᓇᕕᒻᒥ ᑮᓇᐅᔭᓕᐅᕋᓱᓐᓂᓄᑦ ᐱᓇᓱᒐᖃᕐᕕᒧᑦ. ᑖᒃᑯᐊ ᑲᑎᒪᓂᐊᕈᓰᑦ ᓯᕗᓂᖃᓚᐅᔪᔪᑦ ᐱᕙᓪᓕᐊᑎᑦᓯᒍᑎᖃᕐᓂᒥᒃ ᖃᐅᔨᒪᔭᐅᓂᕐᓴᐅᑎᓇᓱᓐᓂᓂᒃ ᐱᓇᓱᒐᑦᓴᔭᑎᒍᑦ ᐃᓕᖓᑦᓱᑎᒃ ᐅᕕᒃᑲᓄᑦ, ᓯᕗᓕᕐᓯᒍᑎᐅᑦᓱᑎᒃ ᐱᕙᓪᓕᐊᑎᑦᓯᕙᓪᓕᐊᑎᑦᓯᒍᑎᓂᒃ ᑐᑭᓕᐅᕆᒋᐊᑦᓯᐊᓂᐅᑦᓱᑎᒃᓗ ᐱᓇᓱᒐᑦᓴᔭᐅᒍᓐᓇᑐᑦ ᖃᓄᐃᑦᑑᓂᖏᓐᓂᒃ, ᑕᑯᑦᓴᐅᑎᑦᓯᓂᐅᑦᓱᑎᒃᓗ ᓴᐳᑦᔨᓯᒪᒍᑎᐅᑦᓱᑎᒃ ᐱᓇᓱᒍᑎᐅᒍᓐᓇᑐᑦ ᐊᑐᐃᓐᓇᐅᑎᑕᐅᓂᖏᓐᓂᒃ. ᓯᕗᓂᖃᕈᑕᐅᔪᑦ ᑐᖓᓕᖃᓚᐅᔪᑦ ᖃᐅᔨᓴᕐᓂᒥᒃ ᐃᓗᓕᖏᓐᓂᒃ ᐱᓇᓱᑦᑕᐅᒍᑎᑦᓴᔭᖏᓪᓗ ᓱᓀᑦ ᐊᑐᐃᓐᓇᐅᒪᖔᑕ ᓯᕗᓂᑦᓴᑎᓂ ᐱᓇᓱᒐᖁᑎᖃᓛᕐᑐᓄᑦ ᑲᑎᒪᓂᐊᕈᓯᐅᑉ ᖃᓄᐃᓕᖓᔪᑦᓴᐅᓂᖏᓐᓂᒃ. ᐅᓪᓘᓂ ᒪᕐᕉᓂ ᑲᑎᒪᓂᐊᕈᓯᐅᓚᐅᔪᖅ ᐱᑕᖃᕐᑎᓯᒍᑎᐅᓚᐅᔪᕗᑦ ᐊᒥᓱᐃᓂᒃ ᐊᑐᕐᑕᐅᒍᓐᓇᑐᓂᒃ ᐊᑐᐃᓐᓇᕈᕐᑎᕆᒍᑎᐅᓗᑎᒃ ᐅᕕᒃᑲᓂᒃ ᐱᕙᓪᓕᐊᑎᑦᓯᒍᑎᖃᖁᓪᓗᒋᑦ ᓴᕐᕿᑎᑦᓯᓇᓱᓐᓂᒥᒃ ᐱᓇᓱᒐᖁᑎᑦᓴᒥᓐᓂᒃ. ᒪᕐᕉᒃ ᐅᕕᒃᑳᒃ ᐱᓇᓱᒐᖁᑎᓖᒃ ᑐᓴᕐᑕᐅᑎᑦᓯᓚᐅᔪᔫᒃ ᐊᑑᑎᖃᑦᑕᓯᒪᔭᒥᓐᓂᒃ ᐱᕙᓪᓕᐊᑎᑦᓯᒍᑎᒋᑦᓱᒋᑦ ᓇᒻᒥᓂᖅ ᐱᓇᓱᒐᖁᑎᒋᓂᐊᓕᕐᑕᒥᓂᒃ – ᒍᐃᓂᕝᕆᐊᑦ ᓄᖕᖓᓗ ᐱᓇᓱᒐᖁᑎᓕᐅᕐᓯᒪᔪᖅ “Winifred Designs”-ᒥᒃ ᐊᒻᒪᓗ ᒫᕆ-ᓯᓰᓪ ᓈᑕᒍᐃ ᐱᓇᓱᒐᖁᑎᓕᒃ “Wawatay Catering”. ᒪᑭᕝᕕᒃ ᓯᕗᓂᖃᑉᐳᖅ ᓯᕗᓂᑦᓴᑎᓐᓂ ᐱᓇᓱᒐᑦᓴᔭᓕᕆᓂᕐᓅᓕᖓᔪᓂᒃ ᑲᑎᒪᓂᐊᕈᓯᖃᕐᑎᓯᖃᑦᑕᕋᔭᕐᓱᓂ ᑐᖕᖓᕕᒋᓗᒋᑦ ᑕᒃᑲᓂ ᐊᑑᑎᔭᐅᓚᐅᕐᑐᑦ.
ᑐᖓᓕᖓ ᐃᒪᕐᐱᒥ ᑭᖑᕐᓚᓂᐊᕐᑎᓴᐅᓂᕐᒥᒃ ᐱᒋᐅᕐᓴᔭᐅᒍᑏᑦ ᓴᓪᓗᓂ ᐊᑑᑎᔭᐅᔪᑦ
ᐊᕐᕋᒎᑉ ᐁᑉᐱᐅᑎᒋᓕᕐᑕᖓᓂᒃ ᒪᑭᕝᕕᒃ ᑐᖕᖓᓱᑦᑎᓯᔨᐅᓚᐅᕆᕗᖅ ᐃᒪᕐᐱᒥ ᑭᖑᕐᓚᓂᐊᕐᓂᒥᒃ ᐱᒋᐅᕐᓴᑎᑦᓯᒍᑎᓂᒃ ᐱᓇᓱᒍᑎᒥ ᑐᖓᓕᕆᓕᕐᑕᖓᓂᒃ ᐃᓕᓐᓂᐊᑎᑦᓯᒍᑎᒋᓚᐅᔪᔭᒥᓂᒃ ᐱᓇᓱᐊᕈᓯᕐᓂ ᓯᑕᒪᓂ ᓴᓪᓗᓂ. ᑖᓐᓇ ᐱᒋᐅᕐᓴᑎᑦᓯᓂᖅ ᐊᐅᓚᑕᐅᓚᐅᔪᔪᖅ ᓄᓇᕗᑦ ᐃᖃᓗᓐᓂᐊᑐᓕᕆᔨᒃᑯᖏᓐᓄᑦ ᐃᒪᕐᐱᒥ ᐱᓇᓱᒐᑦᓴᔭᓂᒃ ᐱᒋᐅᕐᓴᑎᑦᓯᕕᒻᒧᑦ ᐱᓇᓱᖃᑕᐅᑎᓪᓗᒋᑦ ᐃᒪᕐᐱᒨᓕᖓᔪᓂᒃ ᐱᓇᓱᒐᖁᑎᖃᕐᑐᑦ ᐃᓕᓐᓂᐊᕕᕐᔪᐊᖓᓂ ᓂᐅᕙᐅᓐᓛᓐᒥᐅᑦ Memorial University in St. John’s, Newfoundland. ᐱᒋᐅᕐᓴᔭᐅᒍᑎᒥᓂᒃ ᐱᔭᕇᕈᑎᑖᕐᑐᑦ ᐱᓇᓱᒍᓐᓇᓯᓲᑦ ᐃᒪᕐᐱᒥ ᐃᖃᓗᓐᓂᐅᑎᓂ ᐅᒥᐊᓂ ᐃᖏᕐᕋᑎᑕᐅᔪᓂ ᐃᖃᓗᓐᓂᐊᓂᕐᒥᒃ ᐱᓇᓱᖃᑎᖓᓄᑦ ᒪᑭᕝᕕᐅᑉ Newfound Resources Ltd-ᑯᓄᑦ.
ᒣ
ᒪᑭᕝᕕᒃ ᑐᓴᕐᑕᐅᑎᑦᓯᔪᖅ ᐃᓂᓪᓚᒋᐊᕆᒋᐊᒥᒃ ᓄᕝᕕᑎ ᐱᕙᓪᓕᐊᑎᑦᓯᓂᕐᓄᑦ ᐱᑦᔪᔨᕕᒻᒥᒃ
ᒣ 22-ᖑᑎᓪᓗᒍ ᒪᑭᕝᕕᒃ ᐅᖃᐅᓯᖃᓚᐅᔪᕗᖅ ᐃᓂᓪᓚᒋᐊᕆᓛᕐᓂᒥᓂᒃ ᓄᕝᕕᑎ ᐱᕙᓪᓕᐊᑎᑦᓯᓂᕐᓄᑦ ᐱᓇᓱᒐᖃᕐᕕᒥᒃ ᐋᕐᕿᒋᐊᕐᓗᒍ ᐃᖏᕐᕋᑎᑕᖏᑦ ᑐᑭᓕᕇᑦᓯᐊᓂᕐᓴᒥᒃ ᐊᐅᓚᑕᐅᖁᓪᓗᒋᑦ, ᑮᓇᐅᔭᕐᑐᓗᐊᕈᓐᓀᑎᒋᐊᕐᓗᒍᓗ ᐊᒻᒪᓗ ᐃᓂᓪᓚᒋᐊᑦᓯᐊᓗᒋᑦ ᑐᓴᐅᒪᖃᑎᒌᓐᓂᓅᓕᖓᔪᑦ ᓄᕝᕕᑎᒥ ᐃᓂᓪᓚᒋᐊᕐᓗᒍ ᐋᕐᕿᓯᒪᓛᓕᕐᑎᓗᒍ ᒪᑭᕝᕕᐅᑉ ᓄᓇᓕᓐᓂ ᑭᒡᒐᑐᕐᑎᐅᓂᕐᓄᑦ ᑲᑎᖕᖓᔨᖏᑕ ᐊᖏᕐᓯᒪᔭᖏᓐᓂᒃ ᑐᖕᖓᕕᖃᕐᓗᓂ, ᐊᑦᑕᓀᓐᓂᓴᐅᔪᑦ ᓄᕝᕕᑎᐅᑉ ᑲᑎᖕᖓᔨᖏᑦ ᑲᒪᒋᔭᖃᕐᑎᐅᒐᔭᕐᑎᓗᒋᑦ ᒪᑭᕝᕕᐅᑉ ᐱᓇᓱᒐᖁᑎᒋᐊᓪᓚᖏᓐᓂᒃ, ᐲᔭᓚᕿᓗᒋᑦ ᒥᑭᓂᕐᓴᖑᐊᑦ ᑲᑎᖕᖓᔨᐅᔪᑦ ᐊᑐᓂᑦ ᐱᓇᓱᒐᖃᕐᕕᖁᑎᓄᑦ ᐃᓕᖓᕙᑦᑐᑦ. ᓄᑖᖑᓗᑎᒃ ᓯᑕᒪᐅᔪᕐᑐᑦ ᑲᑎᖕᖓᔩᑦ ᐃᓚᐅᔪᖁᑎᖃᓚᖓᔪᑦ ᐱᔪᓐᓇᓂᖃᑦᓯᐊᑐᓂᒃ ᐃᓄᑐᐃᓐᓇᐅᓱᑎᒃ ᐱᓇᓱᒐᖁᑎᓕᓐᓂᒃ: ᔮᓂ ᐋᑕᒥ, ᓄᐊ ᑕᔭᕋ, ᔮᓂ ᒣ ᐊᒻᒪᓗ ᑖᒥ ᐹᓕᓴ. ᓯᑕᒪᒋᐊᓪᓚᓂᒃ ᐃᓚᐅᔪᖃᑕᐅᓛᕐᑐᓂᒃ ᑭᓇᒃᑯᒪᖔᑕ ᓇᓗᓀᕐᑕᐅᔪᖃᓛᕐᑐᖅ (ᑐᑭᓯᓂᐊᕐᑕᐅᓂᖃᓚᐅᕐᓗᑎᒃ)
“ᒪᑭᕝᕕᒃ ᐱᓇᓱᒐᖃᕐᕕᒃ ᐊᑦᔨᖃᖕᖏᓚᖅ ᑲᓇᑕᒥ ᐊᑦᔨᐅᖏᑦᑑᒍᑎᖃᕐᐳᓗ ᑎᓕᔭᐅᒪᒍᑎᖃᕋᒥ ᓄᓇᓕᑐᖃᕐᓄᑦ ᐃᓕᖓᑦᓱᓂ ᐱᓂᐊᕐᓂᓕᕆᓂᕐᓂᒃ ᐱᓇᓱᒐᖃᕐᕕᐅᒐᒥ ᐊᒻᒪᓗ ᑮᓇᐅᔭᓕᐅᕋᓱᒍᑎᓄᑦ ᐱᓇᓱᒐᖃᕐᕕᐅᓱᓂ, ᐃᖏᕐᕋᑎᑕᐅᔪᖅ ᑖᒃᑯᑎᒎᓇ ᐱᔪᓐᓇᓂᖃᑦᓯᐊᓱᓂ ᐊᕐᕌᒍᓂ 40-ᓂ. ᐱᓇᓱᒐᖃᕐᕕᖁᑎᒋᐊᓪᓚᑖᕐᐸᓂᐊᕐᑐᒍᑦ ᐊᐅᓚᑦᓯᔪᑦᓴᓂᒃ ᐱᓇᓱᒐᕐᑎᒍᑦ ᐅᓇᒻᒥᓇᕐᑐᓂ ᑕᒪᓐᓇᓗ ᑌᒣᓕᖓᑎᒐᓱᑦᑕᐅᓗᓂ ᐃᑉᐱᒋᑦᓯᐊᓗᒋᑦ ᖃᐅᔨᓴᕐᑕᐅᖄᖃᑦᑕᑐᓂᒃ, ᐊᓯᑦᔨᒋᐊᕐᑕᐅᕙᓐᓂᐊᑐᑦ ᐋᕐᕿᒋᐊᕐᑕᐅᓗᑎᒃ ᑌᒣᒋᐊᖃᓕᑐᐊᕈᑎᒃ ᐃᓚᐅᔫᖃᑎᒌᑦ ᑮᓇᐅᔭᒻᒪᕆᖁᑎᖏᑦ ᐊᓯᕐᕿᑌᓕᓗᒋᑦ,” ᐅᖃᓚᐅᕐᑐᖅ ᒪᑭᕝᕕᐅᑉ ᐊᖓᔪᕐᖄᒪᕆᖓ ᓵᓕ ᒍᐊᑦ
ᐅᖃᒻᒪᕆᐅᑏᑦ ᐃᓕᖓᔪᑦ ᐅᑭᐅᕐᑕᑐᒥᒃ ᓄᓇᖁᑎᖃᕐᓂᓅᓕᖓᔪᑦ ᐊᒻᒪᓗ ᓄᓇᕕᒻᒥᐅᑦ ᐃᓄᑐᐃᓐᓇᖏᑦ ᓴᒃᑯᓯᒍᑎᖏᑦ ᑭᖑᓂᐊᒍᑦ ᐱᓇᓱᒐᖃᕐᕕᖁᑕᐅᔪᓕᒫᑦ ᑲᑎᖕᖓᓂᕆᓚᐅᕐᑖᑕ
ᑲᑎᖕᖓᓂᖃᓚᐅᕐᑎᓗᒋᑦ ᓄᓇᕕᐅᑉ “ᐱᓇᓱᒐᖃᕐᕕᖁᑎᓕᒫᖏᑕ ᑲᑎᖕᖓᓂᖓᓐᓂᒃ” ᑰᒃᔪᐊᒥ ᐊᑑᑎᔭᐅᓚᐅᔪᔪᒥᒃ ᒣ 23-25, 2018- ᐅᓪᓗᖏᓐᓂ, ᒪᕐᕈᓗᐊᖕᖑᐊᒃ ᐊᖏᔪᑏᒃ ᐅᖃᒻᒪᕆᒍᑎᐅᓚᐅᔪᕘᒃ ᐃᓕᖓᑦᓱᑎᒃ ᐅᑭᐅᕐᑕᑐᒥ ᓇᒻᒥᓂᖃᕐᓂᕋᕐᓂᓅᓕᖓᔪᓄᑦ ᐱᓗᐊᕐᑐᒥᒃ, ᐊᒻᒪᓗ ᓄᓇᕕᒻᒥᐅᓄᑦ ᐃᓄᑐᐃᓐᓇᓄᑦ ᐃᓘᓐᓈᓄᓕᖓᓂᕐᓴᐅᓱᑎᒃ.
ᒪᑉᐱᕋᖅ ᐊᑕᐅᓯ ᐅᖃᒻᒪᕆᐅᑎᐅᑦᓱᓂ ᐅᑭᐅᕐᑕᑐᒥᒃ ᓇᒻᒥᓂᕋᕐᓂᕋᐅᑎᓂᒃ ᐅᖃᕐᓯᒪᔪᕐᑕᖃᕐᐳᑦ ᐱᔪᓐᓇᐅᑎᖃᕆᐊᖏᑦ ᐃᓄᑐᐃᓐᓀᑦ ᑖᒃᑯᐊᓗ ᑲᖏᒋᔭᐅᓂᕋᕐᐸᒐᑎᒃ ᑲᓇᑕᐅᑉ ᑲᕙᒪᖓᓄᓪᓗ ᐊᓯᓄᓪᓗ ᐅᑭᐅᕐᑕᑐᒥ ᓄᓇᖁᑎᖃᕐᓂᕋᕐᑐᓄᑦ ᐱᓇᓱᑦᓱᑎᒃ ᐃᓂᓪᓓᒍᑎᑦᓴᒥᓐᓂᒃ ᓄᓇᖃᕐᓂᕋᐅᑎᒥᓐᓂᒃ ᐊᖏᕐᔪᕐᔪᐊᒥᒃ ᐅᑭᐅᕐᑕᑑᑉ ᐃᒪᕐᐱᖓᑕ ᐃᕐᖃᖓᓂᒃ. ᑲᓇᑕᐅᑉ ᑲᕙᒪᖓᓂᒃ ᕿᓄᕕᓖᑦ ᐃᓚᐅᑎᑦᓯᖃᑦᑕᖁᑦᓱᒋᑦ ᐃᓄᑐᐃᓐᓇᓂᒃ ᐱᓇᓱᖃᑎᖃᕐᓗᑎᒃ ᐅᑭᐅᕐᑕᑐᒥᒃ ᓄᓇᖃᕐᓂᕋᕐᓂᑯᑦ ᐱᔭᑦᓴᖁᑎᓂᒃ ᓱᕐᖁᐃᑐᒥᓪᓗ ᐃᓄᑐᐃᓐᓀᑦ ᐃᓚᐅᑎᑕᐅᖁᑦᓱᒋᑦ ᑐᑭᑖᕐᑐᐃᓂᕐᓂᒃ-ᐱᓇᓱᒍᑎᖃᓕᕐᐸᑕ ᐃᓄᑐᐃᓐᓀᑦ ᐱᔪᓐᓇᐅᑎᖏᑕ ᓱᕐᕋᑕᐅᒍᑎᒋᓚᖓᔭᖏᓐᓂᒃ. ᐅᖃᐅᓯᖃᕆᐊᓪᓛᒍᑎᖃᕐᓱᓂᓗ ᓱᕐᖁᐃᑐᒥᒃ ᓄᓇᕕᒻᒥᐅᑦ ᐃᓄᑐᐃᓐᓀᑦ ᐱᔪᓐᓇᐅᑎᖏᓐᓂᒃ ᐱᑦᔪᑎᒋᑦᓱᒋᑦ ᐃᒪᕐᐱᒥᐅᑌ ᓄᓀᑦ ᐊᒻᒪᓗ ᕿᑭᕐᑌ ᑯᐯᒃᓗ ᓛᐸᑐᐊᓪᓗ ᐃᒪᕐᐱᖏᓐᓃᑐᑦ ᐱᔪᓐᓇᐅᑎᖃᕐᑎᑕᐅᒍᑎᒋᑦᓱᒋᑦ ᓄᓇᕕᒻᒥᐅᑦ ᐃᓄᑐᐃᓐᓀᑦ ᓄᓇᓂᒃ ᐃᓐᓄᐅᓯᒪᓇᓱᓐᓂᒥᓄᑦ ᐊᖏᖃᑎᒌᒍᑎᓄᑦ (ᕿᑭᕐᑕᓕᕆᓂᕐᓅᓕᖓᔪᑦ).
“2018-ᒥ ᓄᓇᕕᒻᒥᐅᑦ ᐃᓄᑐᐃᓐᓀᑦ ᐅᖃᒻᒪᕆᐅᑎᒋᓯᒪᔭᖏᑦ” ᐃᓕᖓᕗᑦ ᐱᖓᓱᓄᑦ ᐊᖏᔪᑲᓪᓚᒪᕆᐅᑦᓱᑎᒃ ᐅᖃᕐᑕᐅᔪᓄᑦ ᑐᕃᓐᓇᑐᒥᒃ ᐃᓕᖓᑦᓱᑎᒃ ᓯᕗᓂᑦᓴᑎᓐᓂ ᐱᓂᐊᕐᓂᓕᕆᓂᑦᓴᓄᑦ, ᐃᓅᑦᔪᓯᓕᕆᐅᑎᓄᑦ ᐊᒻᒪᓗ ᑮᓇᐅᔭᑎᒍᑦ ᒪᑭᑕᒐᓱᒍᑎᓂᒃ ᐱᕙᓪᓕᐊᑎᑦᓯᒍᑎᐅᔪᓄᑦ ᓄᓇᕕᐅᑉ ᓄᓇᖁᑎᖓᓂ. ᓯᕗᓪᓕᐹᖓᑦ “ᓇᒻᒥᓂᖅ ᑐᑭᑖᕐᓂᖃᕐᓂᓴᓅᓕᖓᔪ” ᑖᒃᑯᐊ ᐅᖃᕐᑐᑦ “ᒪᑭᕝᕕᐅᑉ ᑎᓕᔭᐅᓯᒪᒍᑎᖃᕐᓂᖓᓂᒃ ᐊᖏᖃᑎᒌᒐᓱᖃᑎᖃᕐᑐᓴᐅᑦᓱᓂ ᑲᓇᑕᐅᓪᓗ ᑯᐯᒃᑯᓗ ᑲᕙᒪᖏᓐᓂᒃ ᐃᓂᓪᓓᓂᖃᕐᓂᐊᑐᐊᕈᓂ ᓄᓇᓕᑐᖃᕐᑎᒍᑦ ᑲᕙᒪᖁᑎᑦᓴᒥᓂᒃ ᑐᖕᖓᕕᖃᕐᓗᑎᒃ ᐃᓄᐃᑦ ᐃᓪᓕᓇᕐᑐᖁᑎᖏᓐᓂᒃ, ᑭᓇᐅᑎᓐᓂᖏᓐᓂᒃ, ᐃᓗᕐᖁᓯᖓᓂᒃ ᐊᒻᒪᓗ ᐅᖃᐅᓯᖓᓐᓂᒃ, ᐃᑲᔪᕐᓯᑎᓪᓗᒋᑦ ᐅᖃᕐᑕᐅᖃᑕᐅᒪᔪᑦ ᓄᓇᕕᐅᑉ ᐱᓇᓱᒐᖃᕐᕕᖁᑎᖏᑦ ᓄᓇᕕᐅᑉ ᐊᐅᓚᑕᐅᓂᖓᓂᒃ ᑲᒪᖃᑕᐅᓪᓚᕆᑦᑐᑦ.”
ᐅᖃᒻᒪᕆᐅᑕᐅᔪᓂᒃ ᐊᓪᓚᑕᐅᓯᒪᔪᑦ ᐁᑉᐱᐅᑎᖓ ᐃᓕᖓᕗᖅ “ᕿᒥᕐᕈᔭᖃᕐᓂᒧᑦ ᔦᒥᓯ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᒍᑎᒋᓯᒪᔭᖏᓐᓂᒃ”. ᑖᒃᑯᓇᓂᓕ ᐅᖃᒻᒪᕆᐅᑏᑦ ᐃᒫᒃ ᐅᖃᕐᓯᒪᕗᑦ“ᐱᓂᐊᕐᓂᖃᕐᓗᑕ ᓭᒻᒪᖃᑎᒌᒍᑎᑦᓴᓂᒃ ᐊᕐᕌᒍᐃᓪᓗ 40 ᐅᖓᑖᓄᑦ ᐊᓂᒍᐃᒪᓕᕐᓗᑕ ᐊᑎᓕᐅᕐᓂᖃᓚᐅᕐᓯᒪᓂᑦᑎᓂᒃ ᔦᒥᓯ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᒍᑎᖏᓐᓂ ᐊᓯᓕᒫᖏᓐᓂᓗ ᐅᐃᒍᑖᕆᓯᒪᔭᖏᓐᓂᒃ ᐊᖏᖃᑎᒌᒍᑎᒋᐊᓪᓚᖑᕐᓯᒪᔪᓂᒃ ᑕᒪᒃᑯᓂᖓ ᐃᓘᓐᓇᖏᓐᓂᒃ ᕿᒥᕐᕈᔭᖃᕆᐊᖃᓕᕐᐳᒍᑦ, ᐃᓱᒫᓗᒋᔭᖃᓗᐊᖕᖑᐊᓗᑕ ᐅᖃᕐᑕᐅᒪᒍᑎᖏᓐᓂᒃ ᓴᒃᑯᓯᓯᒪᓂᐅᑉ ᐱᔪᓐᓇᐅᑎᑦᑎᓂᒃ ᐊᒻᒪᓗ ᐲᔭᕐᑕᐅᒪᔪᓂᒃ ᐱᔪᓐᓇᐅᑎᒋᓂᐊᕐᓱᑎᒋᑦ ᐊᓪᓚᑕᐅᒪᖃᑕᐅᒪᔪᑦ, ᑖᒃᑯᐊ ᐋᕐᕿᒋᐊᕐᑕᐅᒍᓐᓇᖁᓪᓗᒋᑦ ᐅᓪᓗᒥᓯᐅᑎᓕᐊᖑᓂᕐᓴᐅᓗᑎᒃ ᐱᔪᓐᓇᕈᑎᒋᓂᐊᕐᑕᑎᓐᓂ ᑮᖕᖒᒪᑦᓯᒍᑎᑦᑎᓂᒃ ᐱᔪᒪᔭᑦᑎᓂᓪᓗ ᓄᓇᕕᒻᒥᐅᑎᒍᑦ ᐃᓄᑐᐃᓐᓇᑎᒍᑦ.” ᒪᑭᕝᕕᒃ ᑎᓕᔭᐅᒍᑎᑖᓚᐅᔪᕗᖅ ᕿᒥᕐᕈᖁᔭᐅᑦᓱᓂ ᐊᑕᖏᕐᓯᓯᐊᕐᓗᓂ ᔦᒥᓯ ᐯ ᐊᒻᒪᓗ ᑯᐯᒃ ᑕᕐᕋᖓᓄᑦ ᐊᖏᖃᑎᒌᒍᑎᓂᒃ.
ᑭᖑᓪᓕᐹᕐᑕᖏᑦ ᓄᓇᕕᐅᑉ ᐅᖃᒻᒪᕆᐅᑎᖏᑕ ᐃᓕᖓᕗᑦ “ᐃᓄᐃᑦ ᐃᓪᓕᓇᕐᑐᖁᑎᖏᓐᓄᑦ, ᑭᓇᐅᑎᓐᓂᖏᓐᓄᑦ, ᐃᓗᕐᖁᓯᖓᓄᑦ ᐊᒻᒪᓗ ᐅᖃᐅᓯᖓᓐᓄᑦ”. ᑕᒃᑲᓂ ᐃᓱᓕᒍᑎᒥ ᐊᓪᓚᑕᐅᒪᔪᑦ ᓯᕗᓂᖃᕈᑎᐅᕗᑦ ᒪᕐᕈᓗᐊᖕᖑᐊᓂᒃ ᐱᓇᓱᒐᖃᕐᕕᒪᕆᖁᑎᖏᓐᓂᒃ ᓄᓇᕕᐅᑉ ᑎᓕᔭᐅᒪᒍᑎᖃᕐᓱᑎᒃ ᐊᓯᐅᑎᑦᓯᑌᓕᓂᐊᕐᑎᓗᒋᒃ ᖁᕝᕙᑎᕆᓂᐊᕐᓗᑎᒃᓗ ᐱᒻᒪᕆᐅᓂᖏᓐᓂᒃ ᐱᔭᑦᓴᖁᑕᐅᔪᑦ, ᐃᓱᓕᔪᐃᑦᑐᒥᒃ ᐱᐅᓯᓖᒃ ᑮᓇᐅᔭᕐᑐᕈᑕᐅᒍᑎᑦᓴᒥᓂᒃ ᐊᔪᕐᓴᓂᐅᑦᓱᑎᒃ. ᑖᒃᑯᐊ ᐊᕙᑕᖅ ᐱᐅᓯᑐᖃᓕᕆᕕᓪᓗ, ᐊᒻᒪᓗ ᑕᕐᕋᒥᐅᑦ ᓂᐱᖓᑦ. ᐅᖃᒻᒪᕆᐅᑕᐅᔪᑦ ᐊᑕᕐᖑᓯᕈᑎᐅᕗᑦ ᑲᓇᑕᐅᑉ ᑲᕙᒪᖓᓗ ᑯᐯᒃᑯᓗ ᑲᕙᒪᖓᑦ ᓇᓗᓀᕆᖁᓪᓗᒍ ᐱᓪᓚᕆᐅᓂᖃᕆᐊᖏᒃ ᐃᓪᓕᓇᕐᑐᖁᑕᐅᔪᓅᓕᖓᑦᓱᑎᒃ ᐃᓄᑐᐃᓐᓇᓄᑦ ᐊᒻᒪᓗ ᓈᒻᒪᑐᓂᒃ ᑮᓇᐅᔭᖃᕐᑎᑕᐅᖃᑦᑕᖁᑦᓱᒋᒃ ᑕᒪᕐᒥᒃ ᐊᕙᑕᖅ ᐱᐅᓯᑐᖃᓕᕆᕕᓪᓗ ᐊᒻᒪᓗ ᑕᕐᕋᒥᐅᑦ ᓂᐱᖓ. ᓄᐃᑕᐅᒍᑎᖃᓛᓕᕐᐳᖅ ᑮᓇᐅᔭᖃᕐᑎᓯᕕᑦᓴᖅ ᓴᕐᕿᑎᑕᐅᓗᓂ ᓱᕐᖁᐃᑐᒥᒃ ᐃᓱᓕᑦᑕᖏᑦᑐᓂᒃ ᑮᓇᐅᔭᖃᕐᑎᑕᐅᕕᑦᓴᖓᓂᒃ ᑕᒪᕐᒥᒃ ᐊᕙᑕᖅ ᐱᐅᓯᑐᖃᓕᕆᕕᐅᓪᓗ ᐊᒻᒪᓗ ᑕᕐᕋᒥᐅᑦ ᓂᐱᖓᑦᑕ. ᓄᓇᕕᐅᑉ ᓄᓇᖁᑎᒥᓂ ᐱᓇᓱᒐᖃᕐᕕᖁᑎᖏᑦ ᐊᑕᓐᓂᐅᕕᐅᕗᑦ ᑐᓂᔨᖃᑦᑕᖁᓪᓗᒋᑦ 1%-ᖏᓐᓂᒃ ᐊᕐᕌᒍᓕᒫᒥ ᑮᓇᐅᔭᑎᒍᑦ ᑐᕌᒐᓕᐊᒥᑕ ᑮᓇᐅᔭᖃᕐᑎᓯᒍᑎᐅᖁᓪᓗᒋᑦ, ᐊᒻᒪᓗ ᐱᕙᓪᓕᐊᑎᑦᓯᔨᐅᔪᑦ ᐃᓚᐅᑎᓪᓗᒋᑦ ᐅᔭᕋᓐᓂᐊᓂᒃ ᐱᓇᓱᒐᖃᕐᕕᐅᔪᓪᓗ ᐊᒻᒪᓗ ᑯᐯᒃ ᑲᕙᒪᒃᑯᑦ ᐃᑯᒪᓕᐅᕈᑎᓕᕆᔨᖏᑦ ᐊᑕᓐᓂᐅᕕᐅᒋᕗᑦ ᑲᔪᖏᕐᓴᑕᐅᑦᓱᑎᓪᓗ ᐃᑲᔪᕐᓯᒍᑎᓂᒃ ᑮᓇᐅᔭᓂᒃ ᐱᑎᑦᓯᖃᑎᐅᖁᑦᓱᒋᑦ.
ᔫᓂ
ᒪᑭᕝᕕᒃ ᐃᓚᐅᕗᖅ ᓯᕗᓪᓕᐹᖓᓐᓄᑦ ᐱᔪᓐᓇᖁᖓᒃᑯᑎᒍᑦ ᐱᓇᓱᑦᑕᐅᔪᓄᑦ ᓄᓇᕕᒻᒥ
ᐱᔪᓐᓇᖁᖓ ᐱᓇᓱᒍᑎᑦᓴᓕᐊᖑᒪᔪᑦ ᐱᓇᓱᒋᐅᕐᓴᕈᑎᓕᐊᖑᒪᕗᑦ ᓯᕗᓂᖃᕈᑎᐅᑦᓱᑎᒃ ᐅᕕᒃᑲᓂᒃ ᐃᓄᑐᐃᓐᓇᓂᒃ ᓄᓇᕕᒻᒥᐅᓂᒃ ᐱᔪᓐᓇᓯᑎᑦᓯᕙᓪᓕᐊᓂᕐᒥᒃ ᐱᕙᓪᓕᐊᑎᑦᓯᒍᓐᓇᖁᓪᓗᒋᑦ ᐱᒋᐅᕐᓯᒪᔭᒥᓐᓂᒃ ᐊᕐᖁᑎᖃᕐᓗᑎᒃ ᐊᑑᑎᓪᓗᑐᕐᓂᒥᒃ ᐱᓇᓱᒐᕐᓂᒃ. ᑖᒃᑯᐊ ᐱᓇᓱᒍᑎᑦᓴᓕᐊᖑᒪᔪᑦ ᓄᐃᑕᐅᓯᒪᕗᑦ ᑲᔪᓯᐅᒐᕈᓐᓇᑐᓂᒃ ᐱᓇᓱᒐᑦᓴᓕᕆᓂᕐᓂᒃ ᐱᑦᔪᔨᕕᖓᓄᑦ ᑲᑎᕕᒃ ᓄᓇᓕᓕᒫᑦ ᑲᕙᒪᖓᑕ ᓯᕗᓂᖃᕈᑎᐅᑦᓱᑎᒃ ᐊᒥᓱᖕᖑᐃᒐᔭᕐᓂᒥᒃ ᐃᓄᑐᐃᓐᓇᓂᒃ ᐱᓇᓱᑦᑎᐅᕙᓐᓂᐊᑐᓂᒃ ᓄᓇᕕᐅᑉ ᐱᓇᓱᒐᖃᕐᕕᖁᑎᖏᓐᓂ. ᒪᑭᕝᕕᐅᑉ ᑮᓇᐅᔭᑎᒍᑦ ᒪᑭᑕᒐᓱᒍᑎᑦᓴᓂᒃ ᐱᕙᓪᓕᐊᑎᑦᓯᓂᕐᓄᑦ ᐱᑦᔪᔨᕕᖓ ᐃᓚᐅᓯᒪᕗᖅ ᑖᒃᑯᓄᖓ ᐱᓇᓱᒍᑎᓄᑦ ᐃᓚᐅᒍᑎᖃᕐᓱᓂ ᐱᓇᓱᑦᑎᑖᕐᓱᓂ ᔪᐊᓇᓯ ᑳᒧᔭᓐᒥᒃ ᓴᓪᓗᒥᐅᒥᒃ ᐱᓇᓱᑦᑎᓯᓚᐅᔪᔭᒥᓐᓂᒃ ᑰᒃᔪᐊᒥ ᐊᓪᓚᕕᖁᑎᒥᓐᓂ ᑕᕐᕿᓂ ᐱᖓᓱᓂ ᐱᓇᓱᒐᖃᕐᑎᓱᒍ, ᐱᓇᓱᒐᖓ ᐃᓱᓕᓂᖃᕐᑎᓗᒍ ᔫᓂ 2018-ᒥ.
ᐱᓇᓱᒐᕐᒥᒃ ᐆᑦᑐᕋᕐᑕᐅᓂᖃᕐᓂᒥᓂ ᒪᑭᕝᕕᐅᑉ ᐊᓪᓚᕕᖓᓂ ᔪᐊᓇᓯ ᑐᕌᒐᖃᓚᐅᔪᕗᖅ ᐊᑐᐃᓐᓇᕈᕐᑎᕆᓂᕐᒥᒃ ᐅᕕᒃᑫᑦ ᐱᓇᓱᒐᑦᓴᓕᕆᓂᕐᓄᑦ ᑲᑎᒪᓂᐊᕈᓯᑦᓴᖓᓐᓂᒃ, ᐊᑑᑎᔭᐅᓂᖃᓚᐅᔪᔪᒥᒃ ᓴᓪᓗᓂ, ᓴᓪᓗᓄᓪᓗ ᐅᑎᓚᐅᔪᕗᖅ ᐃᑲᔪᕆᐊᕐᓱᓂ ᐸᕐᓇᑐᓂᒃ ᑐᖕᖓᓱᑦᑎᓯᔨᐅᒋᐊᕐᑐᓱᓂᓗ ᑲᑎᒪᓂᐊᕈᓯᕐᒥ. ᔪᐊᓇᓯ ᓯᕗᓂᖃᕐᑐᖅ ᑲᔪᓯᒐᔭᕐᓂᒥᒃ ᐱᓇᓱᑦᑕᒥᓂᒃ ᑮᓇᐅᔭᑎᒍᑦ ᒪᑭᑕᒐᓱᒍᑎᑦᓴᓂᒃ ᐱᕙᓪᓕᐊᑎᑦᓯᒍᑎᖃᕋᔭᕐᓂᒥᒃ ᓄᓇᕕᒻᒥ.
ᓄᓇᕕᒻᒥᐅᑦ ᐃᓄᑐᐃᓐᓇᖏᑕ ᐱᐅᓯᑐᖃᕐᒥᒍᑦ ᑎᒍᐊᕐᐸᓂᕐᒥᒃ ᑲᔪᓯᑎᑕᐅᓂᖓᑦ ᐱᕙᓪᓕᐊᓂᖃᓯᕗᖅ ᒪᑭᕝᕕᒃ ᐃᑲᔪᕐᓯᒪᓂᖃᕐᑎᓗᒍ
ᑯᐯᒃ ᑲᕙᒪᒃᑯᑦ ᐱᖁᔭᖁᑎᖓᑦ ᑭᓯᑦᔪᑎᓕᒃ 113-ᒥᒃ ᓇᓗᓀᕆᒍᑎᒋᓯᒪᔭᖏᑦ ᐱᖁᔭᑎᒍᑦ ᐊᑐᓕᕐᑎᑕᐅᒪᔪᓂᒃ ᓱᕐᕃᓂᖃᕐᓂᐊᓱᑎᒃ ᓄᓇᕕᒻᒥᐅᑦ ᐱᐅᓯᑐᖃᕐᒥᒍᑦ ᑎᒍᐊᕐᐸᓂᖏᓐᓂᒃ 2017-ᒥ ᐊᑐᕐᓂᖃᕆᓯᓚᐅᔪᕗᖅ ᔫᓂ 2018-ᖑᑎᓪᓗᒍ ᒪᑭᕝᕕᒃ ᐃᑲᔪᕐᓯᒪᑎᓪᓗᒍ. ᒪᑭᕝᕕᒃ ᑕᑯᓐᓇᑕᖃᕐᒪᑦ ᑖᑦᓱᒪ ᐱᖁᔭᐅᑉ ᐊᓂᒎᑎᑎᑕᐅᓂᕆᓚᐅᔪᔭᖓ ᓯᕗᓪᓕᐹᖑᒍᑎᒋᒋᐊᖓ ᐱᓇᓱᑦᑕᐅᒍᑎᑦᓴᖏᑕ, ᐱᔭᖃᕋᓱᓯᓚᐅᔪᕗᕐᓗ ᑮᓇᐅᔭᖃᕐᑎᑕᐅᒋᐊᓪᓚᒍᑎᑦᓴᓂᒃ ᐊᑕᓐᓂᐅᕕᖃᕐᓱᓂ ᑯᐯᒃ ᑲᕙᒪᑯᑦ ᐃᕐᖃᑐᐃᕕᓕᕆᓂᕐᓄᑦ ᐱᑦᔪᔨᕕᖓᓂᑦ ᐊᕐᕌᒍᓐᓂ ᒪᕐᕉᓂ ᐱᓇᓱᒍᑎᐅᒐᔭᕐᑐᓂᒃ ᓄᐃᑦᓯᓇᓱᒍᑎᐅᓗᑎᒃ ᐊᑕᖏᕐᓯᓯᐊᕐᑐᓂᒃ ᐃᓄᑐᐃᓐᓀᑦ ᐱᖁᔭᓅᓕᖓᔪᓂᒃ ᒪᓕᒐᑦᓴᖏᓐᓂᒃ ᐃᓕᖓᑦᓱᑎᒃ ᑎᒍᐊᕐᓂᓄᑦ ᐃᓕᖓᑦᓱᑎᓪᓗ ᓄᓇᕕᒻᒥᐅᓄᑦ ᐃᓄᑐᐃᓐᓇᓄᑦ, ᓯᕗᓕᕐᑕᐅᓱᑎᒃ ᒪᑭᕝᕕᒧᑦ. ᑮᓇᐅᔭᖃᕐᑎᑕᐅᒍᑎᑦᓴᓂᒃ ᐅᓄᕐᓂᓕᓐᓂᒃ $100,000-ᓂᒃ ᐊᑕᓐᓂᐅᕈᑏᑦ ᐊᐅᓪᓚᑎᑕᐅᓚᐅᔪᕗᑦ ᑐᕌᕐᑎᓗᒋᑦ ᓄᑖᒧᑦ ᑐᕐᖃᑕᕐᕕᒧᑦ ᐃᕐᖃᑐᐃᕕᓕᕆᓂᕐᓅᓕᖓᔪᓄᑦ ᓲᓂᐊ ᓚᐱᓪᒧᑦ ᓅᕕᒻᐱᕆᐅᑉ ᑕᕐᕿᖓ ᐃᓱᓕᒋᐊᕕᓐᓂᓴᐅᓕᕐᑎᓗᒍ.
ᔪᓓ
ᕘᔅ ᐃᐊᒃᑯᓗ ᑲᓀᑎᐋᓐ ᓅᔅᑯᓪᓗ ᑐᓴᕐᑕᐅᑎᑦᓯᕘᒃ ᐊᑕᐅᓯᖕᖑᑎᑕᐅᓂᕐᒥᓂᒃ
ᔪᓓ 6-ᖑᑎᓪᓗᒍ ᐃᓄᐃᑦ ᓯᕗᓕᕐᑎᖏᑦ ᓄᓇᕕᒻᒥᐅᓗ ᐃᓄᕕᐊᓗᐃᓪᓗ ᓄᓇᓯᒪᕕᒻᒥᓂ ᓄᓇᖁᑎᓖᑦ ᐊᑎᓕᐅᖃᑎᒌᒍᑎᖃᓚᐅᔪᕗᑦ ᐊᖏᖃᑎᒌᒍᑎᒥᓐᓂᒃ ᐊᑕᐅᓯᖕᖑᑎᑦᓯᓂᐊᓕᕐᓱᑎᒃ ᕘᔅ ᐃᐊᒥᓪᓗ ᑲᓀᑎᐋᓐ ᓄᐋᔅᒥᓪᓗ. ᒪᑭᕝᕕᒃ ᑕᒪᑦᓱᒥᖓ ᐊᐅᓚᑦᔦᓚᐅᔪᕗᖅ ᓯᕗᓕᕐᑎᑖᕐᖃᒥᕐᒥᓄᑦ ᓵᓕ ᒍᐊᑦᒧᑦ ᐱᓂᐊᕐᑕᐅᔪᒥᒃ. ᐊᑎᓕᐅᖃᑎᒌᓐᓂᖃᓕᕐᓱᑎᒃ ᓵᓕ ᒍᐊᑦ ᐃᒫᒃ ᓂᓪᓕᕈᑎᖃᓚᐅᔪᖅ, “ᑖᓐᓇ ᐱᓂᐊᕐᓂᕆᓕᕐᑕᕗᑦ ᐃᓚᒋᔭᐅᕗᖅ ᐅᑭᐅᕐᑕᑐᒥᒃ ᓄᓇᖃᕐᓂᕋᐅᑎᑦᑕ ᓄᑭᒋᐊᓪᓚᒋᓂᐊᓕᕐᒪᒍ”.
ᐊᑕᐅᓯᐅᓕᕐᖃᒥᐅᔪᖅ ᖃᖓᑦᑕᔫᓕᕆᒍᓯᖅ ᐃᖏᕐᕋᑎᑕᐅᓂᖃᓚᖓᔪᖅ ᐊᑦᓯᕋᐅᑎᖃᕐᓗᓂ “ᑲᓀᑎᐋᓐ ᓅᐊᔅᒥᒃ” ᖃᖓᑦᑕᔫᓪᓗ ᑕᕐᓴᖓ ᕘᔅ ᐃᐊᑉ ᑕᕐᓴᕕᓂᕆᓗᓂᒋᑦ, ᐃᓚᐅᑎᓪᓗᒍ ᐃᓄᑦᓱᖑᐊᖅ ᑕᕐᓴᕆᓲᕆᓕᕐᑕᖓ. ᐊᓪᓚᕕᒻᒪᕆᖓ ᐋᑐᒑᒥᓚᖓᔪᖅ. ᑕᒪᕐᒥᒃ ᒪᑭᕝᕕᑯᓪᓗ ᐃᓄᕕᐊᓗᐃᓪᓗ ᓄᓇᓯᒪᕕᒻᒥᓂ ᓄᓇᖁᑎᓖᑦᑯᓪᓗ ᓇᓗᓀᕆᓯᒪᕘᒃ ᖃᓄᑎᒋᒃ ᐃᓪᓕᓇᕐᑐᖁᑕᐅᓂᖏᓐᓂᒃ ᐊᒻᒪᓗ ᐱᒐᓱᒍᑎᑦᓴᓯᐊᖑᓂᖏᓐᓂᒃ ᑕᕐᕋᒥᓗ ᓄᓇᓕᕐᓚᐅᓗ ᐋᓪᐴᑕ ᓄᓇᖓᓂ ᓂᐅᕐᕈᓭᕕᓐᓂ ᑲᔪᓯᔪᒥᒃ ᐃᓗᖏᕐᑐᓗᑎᒃ ᓴᐳᑦᔨᓯᒪᓂᐊᕐᓱᑎᒃ ᐊᒥᓱᖕᖑᐸᓪᓕᐊᔪᓂᓪᓗ ᐋᓪᐴᑕᒥ ᐱᓇᓱᐊᕐᑕᖃᓚᖓᓕᕐᓱᑎᒃ. ᑖᒃᑯᓃᖓ ᖃᖓᑦᑕᔫᓕᕇᔩᓐᓂᒃ ᐊᑕᐅᓯᕈᕐᑎᓯᓂᕐᒥᒍᑦ ᑖᒃᑯᐊ ᒪᕐᕈᐃᒃ ᐃᓄᑐᐃᓐᓀᑦ ᐱᕙᓪᓕᐊᑎᑦᓯᓂᕐᓄᑦ ᐱᓇᓱᒐᖃᕐᕕᖁᑎᖏᒃ ᓯᕗᓂᖃᕐᐴᒃ ᓄᑖᓂᒃ ᐱᒐᓱᕝᕕᓴᖃᖃᑦᑕᓂᑦᓴᒥᓐᓂᒃ ᑮᓇᐅᔭᓕᐅᕋᓱᒍᑎᒋᓗᒋᑦ ᑲᓇᑕᒥᓗ ᓯᓚᕐᔪᐊᓕᒫᒥᒐᓴᒃ ᐱᐅᓯᒋᐊᕆᓂᖃᕐᓂᖃᕋᔭᕆᐊᒥᓪᓗ ᖃᖓᑦᑕᔫᑎᒍᑦ ᐱᑦᔪᔨᒍᑎᓂᒃ ᐃᓕᖓᑦᓱᑎᒃ ᐃᓄᑐᐃᓐᓇᓄᑦ ᐅᑭᐅᕐᑕᑐᒥ ᓄᓇᓯᒪᔪᓄᑦ.
ᑭᖑᕐᓚᓂᐊᕐᓂᒥᒃ ᐱᓇᓱᑦᑐᑦ ᑐᓴᕐᑕᐅᑎᑦᓯᕗᑦ ᒪᑭᕝᕕᒃ ᓂᖏᕐᑎᑕᐅᓚᐅᕆᐊᖓ $7.2 ᒥᓕᐊᓐᓂᒃ
ᔪᓓ ᑕᕐᕿᖓ ᐱᒋᐊᕐᖃᒥᐅᑎᓪᓗᒍ ᐊᖓᔪᕐᖄᒪᕆᐅᑉ ᑐᖓᓕᖓ ᑮᓇᐅᔭᑎᒍᑦ ᒪᑭᑕᒐᓱᒍᑎᓕᕆᕕᒻᒥ ᐋᓐᑎ ᒨᖃᐅᔅ ᓂᐅᕙᐅᓐᓛᓐᓕᐊᓚᐅᔪᕗᖅ St. John’s-ᓕᐋᕐᓱᓂ ᑲᑎᖕᖓᓯᒋᐊᕐᑐᓱᓂ Newfound Resources-ᑯᑦ ᐊᖓᔪᕐᖄᒪᕆᖓᓂᒃ ᐳᕃᔭᓐ ᒫᒃᓇᒻᒦᕋ/Brian McNamara-ᒥᒃ. ᐋᓐᑎ ᒨᖃᐅᔅ ᑕᒃᑯᖓ ᑲᑎᖕᖓᔭᕐᑐᕕᒻᒥᓄᑦ ᐁᑦᓯᓱᓂᓘᓚᐅᔪᔪᖅ ᑮᓇᐅᔭᒻᒪᕆᓐᓂᒃ ᓂᖏᕈᑎᒥᓂᒃ ᐅᓄᕐᓂᖃᕐᑎᓗᒋᑦ $7.2-ᒥᓕᐋᓐᓂᒃ ᐱᔭᒥᓂᒃ ᑭᖑᕐᓚᓂᐊᕐᓇᐅᑉ ᐊᕐᕌᒍᖓᓂᑦ 2017-2018-ᒥᑦ. ᒪᑭᕝᕕᒃ ᐱᓇᓱᖃᑎᖃᕐᐸᑲᒥ Newfound Resources Ltd-ᑯᓐᓂᒃ ᐊᕐᕌᒍᑦ 15 ᐅᖓᑖᓄᑦ. ᐃᖃᓗᓐᓂᐊᓂᕐᒥᒃ ᓂᖏᕆᕙᑦᑕᖏᑦ ᐊᖏᔪᒥᒃ ᐱᒻᒪᕆᐅᔪᑦ ᓄᓇᕕᒻᒥᐅᓄᑦ ᐃᓚᐅᔫᖃᑎᒌᑦᑐᓄᑦ ᐊᖏᔪᒥᓪᓗ ᐃᓪᓕᓇᕐᑐᖁᑎᒋᕙᕗᑦ ᐃᓅᖃᑎᖃᕐᓂᕆᕙᑦᑐᕗᑦ Newfound Resources Ltd-ᑯᓐᓂᒃ.
ᑭᖑᕐᓓᑦ ᐊᑭᖏᑦ ᓱᓕ ᐅᓄᕐᑐᒦᖏᓐᓇᑐᑦ ᑕᒃᑯᓇᓂ ᐅᓪᓗᑎᓐᓄ ᐊᒻᒪᓗ ᐱᓇᓱᑦᑕᐅᔪᑦ ᐊᖏᓕᒋᐊᕆᓂᕐᑕᖃᓚᐅᔪᕗᑦ ᓂᐅᕐᕈᓭᕕᓐᓂᒃ ᑕᕆᐅᑉ ᐊᑭᐊᓂᒥᐅᓄᑦ ᒫᓐᓇ ᓄᑖᒥᒃ ᐊᖁᕕᕋᐅᑎᒍᑎᑎᒍᑦ ᐊᖏᖃᑎᒌᒍᑎᑖᖑᕐᖃᒥᕐᑎᓗᒋᑦ ᐊᖏᖃᑎᖃᕐᓱᑎᒃ ᑕᕆᐅᑉ ᐊᑭᐊᓂᒥᐅᑦ ᑲᑐᑦᔨᖃᑎᒌᑦᔪᐊᖓᓐᓂᒃ. ᐃᓚᖃᒻᒥᓱᑎᒃ, ᑕᕐᕋᐅᑉ ᑭᖑᕐᓚᖏᑕ ᐱᔭᐅᔪᒪᔪᒻᒪᕆᐅᓂᖏᓐᓂᒃ ᓭᓂᓰᑦ ᓄᓇᖏᓐᓂ.
ᒪᑭᕝᕕᒃ ᐃᓚᐅᔭᕐᑐᓯᒪᕗᖅ ᐅᑭᐅᕐᑕᑐᓕᒫᒥ ᐃᓄᑐᐃᓐᓀᑦ ᑲᑎᖕᖓᔨᕐᔪᐊᖏᑕ ᐱᕙᓪᓕᐊᓯᒪᓂᑎᒍᑦ ᑐᓴᕋᑦᓴᓯᐊᒥᒃ ᑲᑎᖕᖓᓂᕐᔪᐊᖃᕐᑎᓗᒋᑦ ᐅᑦᕿᐊᕕᒃ, ᐊᓛᔅᑲᒥ
ᓵᓕ ᒍᐊᑦ ᓯᕗᓕᓚᐅᔪᕗᖅ ᓄᓇᕕᒻᒥᐅᓂᒃ ᑲᑎᖕᖓᔭᕐᑐᑐᓂᒃ 13-ᖑᒍᑎᒋᓕᕐᑕᖓᓄᑦ ᐃᓄᐃᑦ ᐅᑭᐅᕐᑕᑐᒥ ᓄᓇᓕᕐᔪᐊᖃᖃᑎᒌᑦ ᑲᑎᖕᖓᓂᕐᔪᐊᖓᓐᓄᑦ ᑲᑎᖕᖓᔭᕐᑐᓱᑎᒃ ᑌᑲᓂ ᓄᓇᓕᒻᒥ ᑖᒃᑯᐊ ᑲᑎᖕᖓᔨᕐᔪᐊᑦ ᓴᕐᕿᑎᑕᐅᒋᐊᖕᖓᕕᒋᓯᒪᔭᖓᓂ 1977-ᖑᑎᓪᓗᒍ. ᑌᑦᓱᒪᓂ ᑖᓐᓇ ᓄᓇᓕᒃ ᐊᑦᓯᕋᐅᑎᖃᕐᓯᒪᔪᖅ “Barrow” ᐊᓛᔅᑲᒥᒃ. ᓄᓇᕕᒻᒥᐅᑦ ᑲᑎᖕᖓᒋᐊᕐᑐᑐᑦ ᐃᓚᖃᓚᐅᔪᒻᒥᔪᑦ ᒪᑭᕝᕕᐅᑉ ᐊᖓᔪᕐᖄᒪᕆᖓᑕ ᑐᖓᓕᖓᓂ ᓄᑕᐅᓯᓕᕈᓐᓇᑐᓂᒃ ᐱᑦᓴᑖᕐᕕᓴᓕᕆᓂᕐᓄᑦ ᐱᑦᔪᔨᕕᒻᒥᓂ ᐋᑕᒥ ᑎᓖᓪ ᐊᓚᑯᒥᒃ, ᑮᓇᐅᔭᓕᕆᔨᒻᒪᕆᒻᒥᓂᓪᓗ ᐋᓐᑎ ᐲᕐᑎᒥᒃ. ᑲᑎᖕᖓᔭᕐᑐᑐᑦ ᐱᓇᓱᓯᑦᓴᐅᑎᒋᓚᐅᔪᔪᑦ. ᐊᓪᓕᑐᖃᕐᑎᓗᒍ ᑲᑎᖕᖓᔨᕐᔪᐊᑦ ᐱᒋᐊᓚᐅᕐᑎᓇᒋᑦ ᐃᓄᐃᑦ ᐅᑭᐅᕐᑕᑐᒥᒃ ᓄᓇᓕᕐᔪᐊᖃᖃᑎᒌᑦᑐᑦ (ᑲᓇᑕᒥᐅᑦ) ᐊᕐᕌᒍᑕᒫᕐᓯᐅᑎᒥᓐᓂᒃ ᑲᑎᖕᖓᓂᖃᓚᐅᔪᔪᑦ, ᓂᕈᐊᕐᓂᖃᕐᓱᑎᒃᓗ ᐃᓂᖓᓅᓚᖓᔪᓂᒃ ᐊᖓᔪᕐᖄᒪᕆᐅᑉ, ᐊᒻᒪᓗ ᐊᖓᔪᕐᖄᑉ ᑐᖓᓕᖓᑕ. ᒫᓂᑲ ᐄᓪ-ᑲᓇᔪᖅ ᓄᓇᕗᒻᒥᐅᖅ ᓂᕈᐊᕐᑕᐅᓚᐅᔪᖅ ᐃᓄᐃᑦ ᐅᑭᐅᕐᑕᑐᒥᒃ ᓄᓇᓕᕐᔪᐊᖃᖃᑎᒌᑦᑐᑦ (ᑲᓇᑕᒥᐅᑦ) ᐊᖓᔪᕐᖄᒪᕆᑦᑕᖃᒻᒥᕆᓚᖓᓕᕐᑕᖓᓂ ᐊᒻᒪᓗ ᓖᓴ ᖁᐱᕐᕈᐊᓗᒃ ᐳᕕᕐᓂᑐᕐᒥᐅᖅ ᓂᕈᐊᕐᑕᐅᑎᓪᓗᒍ ᐊᖓᔪᕐᖄᑉ ᑐᖓᓕᖓᓄ (ᓯᓚᕐᔪᐊᒨᓕᖓᔪᖅ)
ᐱᓇᓱᐊᕈᓯᓕᒫᒥ ᐅᖃᖃᑎᒌᓐᓂᖃᓚᐅᕐᓱᑎᒃ, ᑲᑎᖕᖓᓂᕐᔪᐊᒥ ᓴᕐᕿᑎᑦᓯᓕᓚᐅᔪᕗᑦ ᐊᓪᓚᓯᒪᔪᓂᒃ ᐊᑦᓯᕋᐅᑎᓕᓐᓂᒃ ᐅᑦᕿᐊᕕᒃ ᐅᖃᒻᒪᕆᐅᑎᓂᒃ, ᑖᒃᑯᐊ ᐅᖃᒻᒪᕆᐅᑏᑦ ᐃᓗᓕᖃᕐᑐᑦ 10-ᓂᒃ ᐊᕕᑦᑐᓯᒪᓂᕐᓂᒃ ᐊᒻᒪᓗ 57-ᓂᒃ ᐊᖏᕐᓯᒪᐅᑎᑕᓕᓐᓂᒃ, ᐊᕐᖁᓯᐅᕈᑎᐅᑦᓱᑎᒃ ᓯᕗᒧᑦ ᐃᓄᐃᑦ ᐅᑭᐅᕐᑕᑐᒥ ᓄᓇᓕᕐᔪᐊᖃᖃᑎᒌᑦᑐᑦ ᒪᓕᒐᕆᓂᐊᓕᕐᒥᔭᖏᓐᓂᒃ ᐊᕐᕌᒍᓂ 4-ᓂ ᑭᖑᓪᓕᖅ ᑲᑎᖕᖓᓂᕐᔪᐊᖅ ᓇᓪᓕᐅᑎᓚᐅᖕᖏᓂᖓᓂ ᑖᓐᓇ ᓯᕗᓂᑦᓴᑎᓐᓂ ᐊᑑᑎᔭᐅᓛᓕᕐᒥᒪᑦ ᐃᒡᓗᓕᔅᓴᑦᒥ, ᑲᓛᔅᓕᑦ ᓄᓇᖓᓐᓂ ᐊᕐᕌᒍᖅ 2022-ᖑᓕᕐᐸᑦ. ᑲᑎᖕᖓᔭᕐᑐᓯᒪᔪᑦ ᐃᓘᓐᓇᑎᒃ ᐊᖏᖃᑎᒌᑦᓱᑎᒃ ᓂᕈᐊᓚᐅᔪᒻᒥᔪᑦ Dr. Dalee Sambo Dorough-ᒥᒃ ᑖᒃᑯᓇᓂ ᑲᑎᖕᖓᔨᕐᔪᐊᓂ ᑲᑎᖕᖓᔨᓄᑦ ᓯᕗᓕᕐᑎᒋᔭᐅᓚᖓᓕᕐᑎᓗᒍ.
ᐊᐅᒡᒍᓯ
ᖁᕝᕕᐅᕈᑎᖃᕐᓃᑦ ᐃᓅᒍᓐᓀᓂᖓᓂᒃ ᔦᒥᓯ ᐯ ᐊᒻᒪᓗ ᑯᐯᒃ ᑕᕐᕋᖓᓄᑦ ᐊᖏᖃᑎᒌᒍᑎᑦᓴᓂᒃ ᐱᓇᓱᖃᑕᐅᓯᒪᔪᒥᒃ ᔮᓐ ᓯᐊᑦᓯᐊᒥᒃ
ᒪᑭᕝᕕᒃ ᐃᓚᑦᔪᒍᓱᒋᐊᒥᒃ ᑐᓴᐅᒪᔭᐅᑎᑦᓯᓚᐅᔪᕗᖅ ᐃᓚᖏᓐᓄᓗ ᐃᓚᓐᓈᖏᓐᓄᓗ ᔮᓐ ᓯᐊᑦᓯᐊᑉ, ᑖᓐᓇ ᐃᓅᒍᓐᓀᓚᐅᔪᒻᒪᑦ ᐊᐅᒡᒍᓯ 7-ᒥ. ᐃᓄᓐᓄᑦ ᐅᖃᕐᑕᐅᕙᓚᐅᕐᑐᖅ ᐊᖑᑎᐅᑦᓱᓂ ᓱᓕᑦᓯᐊᕋᓱᓐᓂᖃᓱᖑᒋᐊᖓ ᓇᓛᒍᕐᓂᖃᑦᓯᐊᕋᓱᑉᐸᓱᓂᓗ. ᑯᐯᒃ ᑲᕙᒪᒃᑯᑦ ᐊᖏᖃᑎᒌᒐᓱᑦᑎᖏᑕ ᓯᕗᓕᕐᑎᒋᓯᒪᔭᖓᑦ ᐊᖏᖃᑎᒌᒐᓱᓐᓂᖃᕐᓱᑎᒃ ᔦᒥᓯ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᒍᑎᖏᓐᓂᒃ, ᐊᖏᔪᒥᒃ ᐃᑲᔪᕐᓯᓯᒪᔪᖅ ᐱᕙᓪᓕᐊᑎᑕᐅᓂᖃᕐᑎᓗᒋᑦ ᓄᓇᕕᒻᒥᐅᑦ ᓄᓇᒥᓂ ᐃᓄᖏᓐᓄᑦ ᐅᓪᓗᒥ ᖃᐅᔨᒪᔭᐅᑦᔪᑎᓕᓐᓂᒃ.
ᓵᓕ ᒍᐊᑦ ᐅᖃᓚᐅᔪᔪᑦ ᑌᑦᓱᒪᓂᐅᑎᓪᓗᒍ, “ᐊᐅᓚᔨᓪᓗᕆᑦᓴᖑᐊᕐᐳᖓ ᐊᖏᖃᑎᒌᒐᓱᖃᑎᖃᕐᓱᑕ ᔮᓐ ᓯᐊᑦᓯᐊᒥᒃ. ᖃᓄᓕᒫᖅ ᐅᒃᑯᐃᖔᑦᓯᐊᐸᓚᐅᕐᒪᑦ. ᐃᓄᐃᑦ ᐃᓱᒪᒍᑎᖏᓐᓂᒃ ᓈᓚᑦᓯᐊᐸᑦᓱᓂ, ᑕᒪᐅᙰᓐᓈᑐᐃᓐᓇᓂᐅᔭᕐᓇᒋᑦ. ᐃᓱᒪᖃᕐᓱᓂ ᓈᒻᒪᕕᖃᕐᓂᒥᒃ ᐅᑉᐱᕈᓱᑉᐳᖓ ᐱᓇᓱᕖᖕᖓᓯᒪᒋᐊᖓ ᓱᕐᖁᐃᑐᒥᒃ ᑕᐅᑐᒍᑎᑦᑎᓂᒃ ᐃᓚᐅᑎᑦᓯᓯᐊᕋᓱᑦᓱᓂ ᔦᒥᓯ ᐯᒧᑦ ᐊᖏᖃᑎᒌᒍᑎᓂᒃ, ᑌᒪᖕᖓᒥᓪᓗ ᐊᕐᕌᒍᑦ 40 ᐊᓂᒍᕐᓯᒪᓕᕐᖁᑦ. ᑭᖑᓂᕐᒥᓂ ᐊᐅᓚᔨᐅᓂᖃᓚᖓᔪᖅ.”
ᓯᑉᑎᒻᐱᕆ
ᐱᐅᓯᕆᔭᐅᖏᓐᓇᓲᖑᖕᖏᑐᒥᒃ ᐅᑭᐅᕐᑕᑐᒥᐅᑦ ᐱᖁᔭᓕᐅᕐᑎᖏᑕ ᑲᑎᖕᖓᔨᖏᑦ ᐳᓛᕆᐊᕐᐳᑦ ᑰᒃᔪᐊᒧᑦ
ᓯᑉᑎᒻᐱᕆ 6-ᒥᓗ 7-ᒥᓗ ᐱᐅᓯᕆᔭᐅᖏᓐᓇᓲᖑᖏᑐᓄᑦ ᐅᑭᐅᕐᑕᑐᒧᑦ ᑲᑎᖕᖓᔩᑦ ᐱᓯᒪᔪᑦ ᑲᓇᑕᒥᐅᑦ ᐱᖁᔭᓕᐅᕐᕕᖓᓂᑦ ᑰᒃᔪᐊᓕᐊᕐᓯᒪᓚᐅᔪᕗ ᐃᓚᒋᔭᐅᑎᓪᓗᒍ ᑕᕐᕋᒧᑦ ᐊᕐᕕᑕᕐᓂᖏᓐᓄᑦ ᓄᓇᕕᒻᒥᑦ ᐱᒋᐊᕐᓱᑎᒃ ᔫᑲᓐᒧᑦ ᑎᑭᑦᓱᑎᒃ ᑐᑭᓯᓂᐊᕆᐊᕐᓂᖃᓚᐅᔪᒻᒪᑕ ᐅᑭᐅᕐᑕᑐᒥ ᐱᔭᑦᓴᖁᑕᐅᔪᓂᒃ. ᑰᒃᔪᐊᒦᓐᓂᒥᓂ ᐳᓛᕆᐊᓚᐅᔪᔪᑦ ᒪᑭᕝᕕᐅᑉ ᑲᑎᖕᖓᕕᖓᓄᑦ ᓇᓗᓀᕆᒋᐊᕐᑐᓱᑎᒃ ᐱᓇᓱᑦᑎᐅᖃᑎᕕᓂᕐᒥᓂᒃ ᐃᓚᐅᔫᖃᑎᒋᑦᓱᒍ ᐱᖁᔭᓕᐅᕐᑎᓄᑦ ᐱᖁᔭᓕᐅᕐᑎᐅᓚᐅᔪᔪᒥᒃ ᓵᓕ ᒍᐊᑦᒥᒃ. ᐱᖁᔭᓕᐅᕐᑎ ᑎᐊᓇᔅ ᐹᑐᓴᓐ ᐊᑦᓱᓀᕈᑎᒥᓂᒃ ᓂᑦᔮᒍᑎᖃᓚᐅᔪᔪᖅ ᐊᑦᓱᓀᕐᓱᑎᒃ ᓵᓕ ᒍᐊᑦᒥᒃ, ᓂᕆᓇᓱᖃᑎᒌᓚᐅᔪᕗᓪᓗ ᐃᓚᐅᔫᖃᑎᒌᑦ ᐊᐅᓪᓚᓚᐅᕐᑎᓇᒋᑦ ᐃᖃᓗᓐᓄᑦ, ᑲᖏᕐᓯᓂᕐᒧᑦ, ᖃᒪᓂᕐᑐᐊᒧᑦ ᑭᖑᓂᐊᒍᓪᓗ ᐅᑭᐅᕐᑕᑑᑉ ᓯᕿᓂᐊᑕ ᓂᐱᕝᕕᐊᓄᑦ.
ᐅᕐᓱᐊᓘᑉ ᐊᑭᖓ ᑐᑭᑖᕐᑕᐅᕗᖅ $2.03-ᓂᒃ ᐊᑕᐅᓯᖅ ᓖᑕ ᐊᑭᖃᓚᖓᑎᓪᓗᒍ ᑕᒃᒐᓂ ᐊᕐᕌᒍᒥ
ᓯᑉᑎᒻᐱᕆ 6-ᒥ ᐅᖃᕐᑕᐅᓚᐅᔪᕗᑦ ᐊᕐᕌᒍᑕᒫᑦ ᐅᕐᓱᐊᓘᑉ ᐊᑭᖓ ᓄᓇᕕᒻᒥ ᐅᓄᕐᓯᒋᐊᕐᑎᓗᒍ ᐊᑭᓕᕕᓂᐅᑦᓱᓂ $1.79-ᒥᒃ ᐊᑕᐅᓯᖅ ᓖᑕ ᐊᑭᖃᓚᖓᓕᕐᑎᓗᒍ $2.03-ᓂᒃ ᐊᑕᐅᓯᖅ ᓖᑕ ᓄᓇᕕᐅᑉ ᓄᓇᓕᖏᓐᓂ. ᐊᖏᖃᑎᒌᓐᓂᒥᑦ ᐃᓚᐅᔫᖃᑎᒌᑦ ᐱᑎᑕᐅᒍᑎᖃᓚᐅᔪᑦ 40¢ᓄᑦ ᐊᑭᑭᓕᒋᐊᕐᑕᐅᑎᓪᓗᒋᑦ ᐊᕐᖁᑎᒋᑦᓱᒋᑦ ᐅᕐᓱᐊᓗᓐᓂᒃ ᐃᑲᔪᕐᓯᒍᑎᖃᕐᓂᓄᑦ ᐱᓇᓱᒍᑎᓕᐊᖑᒪᔪᑦ ᐃᖏᕐᕋᑎᑕᐅᑦᓱᑎᒃ ᒪᑭᕝᕕᒧᓪᓗ ᑲᑎᕕᒃ ᓄᓇᓕᓕᒫᑦ ᑲᕙᒪᖓᓄᓪᓗ ᑌᒣᒻᒪᑦ ᐃᓱᐊᓂ ᐊᑭᖃᓯᓚᐅᔪᕗᑦ $1.63-ᓂᒃ.
ᒪᑭᕝᕕᓗ ᐃᓄᕕᐊᓗᐃᓪᓗ ᓄᓇᖁᑎᒥᓐᓂᒃ ᐱᓇᓱᒐᖃᕐᕕᖓᑦ ᐊᑎᓕᐅᖃᑎᒌᑉᐴᒃ ᐊᖏᖃᑎᒌᒍᑎᒥᓐᓂᒃ ᐊᑕᐅᓯᖕᖑᑎᑦᓯᓂᕐᒥᒃ ᕘᔅ ᐃᐊᒥᓪᓗ ᑲᓀᑎᐋᓐ ᓅᐊᔅᒥᓪᓗ
ᐅᖃᐅᓯᐅᓚᐅᔪᒐᒥᑐᑦ ᔪᓓᒥ, ᒪᑭᕝᕕᓗ ᐃᓄᕕᐊᓗᐃᓪᓗ ᓄᓇᒥᓐᓂ ᐱᓇᓱᒐᖃᕐᕕᖁᑎᖓᑦ ᐃᓱᓕᑎᑦᓯᓂᖃᓚᐅᔪᕘᒃ ᐊᖏᖃᑎᒌᒍᑎᒋᓱᓯᒪᔭᒥᓐᓂᒃ ᐊᑕᐅᓯᕈᐃᓚᖓᑦᓱᑎᒃ ᕘᔅ ᐃᐊᒥᓪᓗ ᐊᒻᒪᓗ ᑲᓀᑎᐋᓐ ᓄᐋᔅᒥᒃ ᐊᑎᓕᐅᖃᑎᒌᓐᓂᖃᕐᓱᑎᒃ ᒪᓐᑐᔨᐊᒥ ᓯᑉᑎᒻᐱᕿ 28-ᖑᓕᕐᑎᓗᒍ. ᑖᓐᓇ ᐊᖏᓂᕐᐸᐅᓱᓂ ᖃᖓᑦᑕᔫᓕᕆᓂᕐᓂᒃ ᐊᑕᐅᓯᖕᖑᐃᓂᐅᕗᖅ ᑲᓇᑕᐅᑉ ᑕᕐᕋᖓᓂ.
“ᐅᐱᒍᓱᒻᒪᕆᑉᐳᖓ ᑕᑯᓐᓇᖃᑕᐅᒋᐊᒥᒃ ᑕᒪᑐᒥᖓ ᑕᕝᕙᓂ ᐅᓪᓗᒥ. ᐊᕐᕌᒍᑦ ᐊᕙᑎ ᒪᕐᕈᐃᑦ ᐊᓂᒍᕐᑎᓗᒋᑦ, ᓄᓇᕕᒻᒥᐅᑦ ᐃᓄᑐᐃᓐᓇᖏᑦ ᑮᓇᐅᔭᕐᑐᕈᑎᖃᓚᐅᕐᓯᒪᒻᒪᑕ ᑮᓇᐅᔭᓕᐅᕋᓱᒍᑎᒋᓛᓕᕐᓱᓂᒋᑦ ᖃᖓᑦᑕᔫᓕᕆᓂᕐᓂᒃ ᓯᕗᓂᖃᕐᓱᑎᒃ ᑲᑐᑦᔮᖃᑎᑖᕋᔭᕐᓂᒥᒃ ᐊᓯᒥᓂᒃ ᐃᓄᑐᐃᓐᓇᓂᒃ ᓄᓇᓂ ᐊᓯᖏᓐᓂ ᓄᓇᓯᒪᔪᓂᒃ. ᑖᓐᓇ ᑕᒃᒐ ᐅᓪᓗᖅ ᓇᓪᓕᐅᑎᕗᖅ. ᓱᓪᓕᑕᐅᓕᕐᐳᓗ ᓂᕆᐅᒋᓯᒪᔭᕗᑦ. ᓇᒻᒥᓂᖃᕈᒪᓚᐅᕐᓯᒪᒐᑦᑕ ᖃᖓᑦᑕᔫᓄᑦ ᐊᐅᓚᕕᐅᓲᒥᒃ ᑲᓇᑕᐅᑉ ᐅᑭᐅᕐᑕᑐᖓᓂ ᑕᒐᑕᒐᓗ ᓇᒻᒥᓂᕆᓕᕐᐸᕗᑦ,” ᒪᑭᕝᕕᐅᑉ ᐊᖓᔪᕐᖄᒪᕆᖓ ᓵᓕ ᒍᐊᑦ ᑌᒣᓕᑦᓱᓂ ᐅᖃᓚᐅᔪᕗᖅ.
ᐆᒃᑐᐱᕆ
ᒪᑭᕝᕕᒃ ᐅᐱᒍᓲᑦᔨᕗᖅ ᑯᐯᒃ ᑲᕙᒪᒃᑯᑦ ᐊᖓᔪᕐᖄᒪᕆᑦᑖᖓᓂᒃ – ᕙᕋᓐᓱᐊ ᓗᑰᒥᒃ ᐊᒻᒪᓗ ᐅᖓᕙᒥᐅᑦ ᑲᕙᒪᒃᑯᓂ ᐅᖃᕐᑎᑖᖓᓐᓂ ᑕᓂ ᓚᒨᑦᒥᒃ
ᓵᓕ ᒍᐊᑦ ᓇᓗᓀᕆᑲᐱᓚᐅᔪᕗᖅ ᐅᐱᒍᓲᑦᔨᒍᑎᒥᓂᓪᓗ ᐅᖃᐅᓯᖃᕐᓱᓂ ᑯᐯᒃ ᑲᕙᒪᒃᑯᑦ ᐊᖓᔪᕐᖄᒪᕆᒋᓂᐊᓕᕐᑕᖓᓄᑦ ᓂᕈᐊᕐᑕᐅᖃᒻᒥᐅᓂᖓᓂ ᐆᒃᑐᐱᕆ 2-ᒥ ᓂᕈᐊᕐᑕᐅᓚᐅᔪᒻᒪᑦ, ᓯᕗᓕᕐᑎᒋᔭᐅᑦᓱᓂ ᑲᕙᒪᒃᑯᓂ ᐱᓂᐊᕐᓂᓕᕆᔨᓄᑦ Coalition Avenir Québec (CAQ) Party-ᑯᓂ.
ᐊᓪᓚᓯᒪᔪᑎᒍᑦ ᓵᓕ ᒍᐊᑦ ᐅᖃᓚᐅᔪᕗᖅ ᐃᒣᓕᑦᓱᓂ “ᑲᑎᖕᖓᓯᓚᐅᕐᖁᖓ ᑯᐯᒃ ᑲᕙᒪᒃᑯᑦ ᓂᕈᐊᕐᑕᐅᔨᐊᕆᕐᖃᒥᖓᓂᒃ ᐊᖓᔪᕐᖄᒪᕆᒋᓛᓕᕐᓱᒍ ᕙᕋᓐᓱᐊ ᓗᑰᒥᒃ ᑲᑎᓚᐅᔪᒐᒥᐅᒃ ᓂᕈᐊᕐᓇᐅᑉ ᓯᕗᓂᖓᓂ ᐅᖃᐅᓯᖃᓚᐅᔪᔪᖅ ᑐᑭᓯᒪᓂᖃᕆᐊᒥᒃ ᐊᒻᒪᓗ ᓴᐳᑦᔨᓯᒪᒋᐊᒥᒃ ᐊᒥᓱᓄᑦ ᐱᔭᑦᓴᖁᑎᑦᑎᓅᓕᖓᔪᓂᒃ ᐅᖃᐅᓯᖃᓚᐅᔪᔪᖓᓕ ᓯᓚᕐᔪᐊᒥᐅᑦ ᑲᑎᖕᖓᔨᕐᔪᐊᖏᑕ ᐅᖃᒻᒪᕆᒍᑎᖏᓐᓂᒃ ᐃᓕᖓᑦᓱᑎᒃ ᓄᓇᓕᑐᙯᑦ ᐱᔪᓐᓇᐅᑎᖃᕐᑎᑕᐅᒍᑎᖏᓐᓄᑦ (UNDRIP) ᑖᒃᑯᓂᖓᓗ ᓴᐳᑦᔨᓯᒪᓂᕋᕐᕕᒋᑦᓱᒍ. ᑭᒡᒐᑐᕐᓗᒋᑦ ᓄᓇᕕᐅᑉ ᐃᓄᑐᐃᓐᓇᖏᑦ, ᓯᕗᓂᖃᕐᐳᖓ ᑲᑎᖕᖓᓯᓛᕆᐊᒥᒃ ᑯᐯᒃ ᑲᕙᒪᒃᑯᑦ ᐊᖓᔪᕐᖄᒪᕆᖓᓐᓂᒃ ᓗᑰᒥᒃ ᓯᕗᒧᐊᑦᑎᓯᒋᐊᒃᑲᓂᖃᑎᒋᓗᒍ ᐃᓄᐃᑦ ᓄᓇᕕᒻᒥᐅᑦ ᐱᔪᓐᓇᐅᑎᖃᕐᑎᑕᐅᒍᑎᖏᓐᓂᒃ.” ᓵᓕ ᒍᐊᑦ ᐅᐱᒍᓲᑦᔨᓚᐅᔪᒋᕗᖅ ᐅᖓᕙᒥᐅᑦ ᑲᕙᒪᒃᑯᓂ ᐅᖃᕐᑎᖁᑎᑖᖓᓐᓂᒃ ᑕᓂ ᓚᒨᑦᒥᒃ, ᑖᒃᑯᓭᓐᓇᓂᒃ ᑲᕙᒪᓕᕆᔨᐅᔪᓂᑦ ᐱᓯᒪᖃᑕᐅᔪᒥᒃ.
ᐅᖓᕙ ᐊᖏᓂᕐᐸᐅᓱᓂ ᓂᕈᐊᕐᑕᐅᑎᒐᓱᕝᕕᐅᕙᒻᒪᑦ ᑯᐯᒃᒥ ᓯᕗᓪᓕᐹᒥᓗ ᐱᕙᓪᓕᐊᓂᖃᓯᓚᐅᕐᓯᒪᒻᒪᓂᑦ ᒪᕐᕉᒃ ᐃᓄᑐᐃᓐᓈᒃ ᐊᕐᓈᒃ ᓂᕈᐊᕐᑕᐅᑎᒐᓱᓚᐅᔪᕘᒃ, ᑌᒣᒻᒪᑦ ᐅᖃᐅᓯᕆᒍᒪᕚᒃᑲ ᐊᓖᔅᓴ ᑕᕐᕿᐊᐱᓪᓗ ᑰᒃᔪᐊᕌᐱᖕᒥᐅᖅ ᓂᕈᐊᕐᑕᐅᑎᒐᓱᓚᐅᔪᒻᒪᑦ ᐱᓂᐊᕐᓂᓕᕆᔨᓂᒃ Québec Solidaire party-ᑯᓂᒃ ᑭᒡᒐᑐᕐᓱᓂ, ᐊᒻᒪᓗ ᒨᐅᓇ ᐱᓪᓘ, ᐃᖃᓗᒻᒥᐅᕕᓂᖅ ᓄᓇᕗᒻᒥ ᓂᕈᐊᕐᑕᐅᑎᒐᓱᓚᐅᔪᒻᒥᔪᖅ ᑭᒡᒐᑐᕐᓱᓂ NDP-ᑯᓂ ᓂᕈᐊᕐᑕᐅᒪᕕᐅᓲᒥᒃ ᓂᕈᐊᕐᑎᓄᑦ Chauveau-ᒥ,” ᐅᖃᓚᐅᔪᔪᖅ ᓵᓕ ᒍᐊᑦ. “ᐱᔭᖃᕐᑐᑐᓚᐅᔪᑦᔭᖏᓐᓇᑎᒃ ᐱᕙᓪᓕᐊᓯᒪᓂᑎᒍᑦ ᐊᑑᑎᔭᐅᒋᐅᕐᑐᒥᒃ ᑭᓯᐊᓂ ᐊᒥᓱᓂ ᐊᐅᓚᑦᔦᒐᑦᑎᒃ ᐃᑦᓯᕙᑐᐃᓐᓇᕈᓐᓀᕈᒪᓕᕐᑎᓱᒋᑦ ᓱᓚᖓᔫᔭᖕᖏᑲᓗᐊᕋᑦᑎᓗ ᑲᔪᓯᑦᓯᐊᓚᐅᕐᓱᑎᒃ.”
ᓯᕐᒥᖃᖕᖏᑐᓂᒃ ᐱᕈᕐᓰᕕᒻᒥᒃ ᐱᓇᓱᒍᑎᐅᓂᐊᕐᑐᑦ ᓇᑉᐸᑕᐅᕗᑦ ᑰᒃᔪᐊᒥ ᐱᕈᕐᓯᕕᐅᖃᑦᑕᓂᐊᕐᓱᑎᒃ ᓂᕿᑦᓯᐊᓴᔭᓂᒃ
ᓯᕗᓪᓕᐹᖑᑦᓱᓂ ᓯᕐᒥᖃᖕᖏᑐᒥ ᐱᕈᕐᓰᕕᐅᕙᓐᓂᐊᑐᓂᒃ ᐱᓇᓱᒍᑎᐅᓯᔪᖅ ᓇᑉᐸᑕᐅᓚᐅᔪᕗᖅ ᑰᒃᔪᐊᒥ, ᐋᑐᒑᒥ ᐱᒋᐊᕐᑎᑕᐅᒍᑎᖏᑦ ᐃᑲᔪᕐᑕᐅᑎᓪᓗᒋᑦ ᐅᑯᓄᖓ “The Growcer”-ᑯᓄᑦ. ᑮᓇᐅᔭᕐᑐᑐᒻᒪᕆᐅᑎᓪᓗᒋᑦ ᓂᖀᑦ ᓱᕐᕃᑐᑦᓱᑎᒃ ᐱᕈᕐᑐᕕᓃᑦ ᓄᓇᕕᓕᐊᕈᑦᔭᐅᒍᑎᖏᑦ, ᑖᒃᑯᐊ ᐱᓇᓱᑦᑕᐅᔪᑦ ᓯᕗᓂᖃᕈᑎᐅᕗᑦ ᐱᕈᕐᑐᕕᓂᕐᓂᒃ ᓄᑌᔪᕐᑐᓂᒃ ᑰᒃᔪᐊᒥᐅᓂᒃ ᓂᕿᓕᐅᕆᒍᑦᔨᓂᕐᒥᒃ. ᐃᒫᓂ ᓯᕐᒥᖃᖕᖏᓱᑎᒃ ᐱᕈᕐᓯᒍᓰᑦ ᐃᓚᒋᔭᐅᕗᑦ ᐃᒪᕐᒥᒃ ᐱᕈᕐᓰᒍᑎᖃᕐᓂᐅᓲᓄᑦ, ᑌᒣᑦᑐᒥᒃ ᐱᕈᕐᓰᕕᖃᕐᓂᖅ ᐊᑐᕐᑕᖃᕐᓂᐅᓲᖑᕗᖅ ᓯᕐᒥᖃᖕᖏᑐᓂᒃ ᐱᕈᕐᓯᐊᖃᕐᓂᒥᒃ ᐊᑐᕐᓱᒋᑦ ᐃᒪᕐᒧᓲᑦ ᓂᕿᑦᓴᔭᖏᑦ ᐱᕈᕐᓯᐊᑦ. ᐃᖏᕐᕋᑎᑕᐅᔪᑦ ᑲᒪᒋᔭᐅᑦᓱᓂᓗ ᓂᐅᕕᕐᕕᒃ ᓂᕿᓯᕕᒻᒧᑦ, ᐆᑦᑐᕋᐅᑕᐅᑦᓱᓂ ᐱᓇᓱᑦᑕᐅᔪᖅ ᑮᓇᐅᔭᖃᕐᑎᑕᐅᑦᓱᓂ $350,000-ᓂᒃ ᑕᕐᕋᒧᑦ ᐸᕐᓇᕈᑎᓕᕆᔨᒃᑯᓂᑦ. ᐱᒋᐅᕐᓴᔭᐅᒍᑎᐅᓚᐅᔪᔪᖅ ᓅᕕᒻᐱᕆᐅᑉ ᑕᕐᕿᖓ ᐃᓱᓕᒋᐊᕕᓐᓂᓴᐅᑎᓪᓗᒍ, ᑕᒃᑲᓂᓗ ᐱᕈᕐᓰᕕᒻᒥ ᑏᓯᒻᐱᕆ 2018-ᖑᓕᕐᑎᓗᒍ ᐱᕈᕐᐸᓕᐊᓯᓚᐅᔪᕗᑦ ᓯᕐᓇᑑᖕᖏᓂᕐᓴᐅᓱᑎᒃ ᐱᕈᕐᑐᕕᓃᑦ. ᔦᒥᓯ ᑐᒨᓐ, ᐱᕈᕐᓯᔨᐅᓂᕐᒥᒃ ᐱᒋᐅᕐᓴᔭᐅᒍᑎᖃᓚᐅᔪᖅ ᐃᖏᕐᕋᑎᑦᓯᒍᓐᓇᓯᑎᑕᐅᑦᓱᓂ ᐅᖃᓚᐅᔪᕗᖅ ᐃᒫᒃ, ᐱᒋᐊᕐᐸᓕᐊᒍᑎᖃᓚᖓᕗᒍᑦ ᐱᕈᕐᑐᕕᓂᕐᓂᒃ ᒪᑯᓂᖓ “lettuce, Bok Choy, ᐊᒻᒪᓗ ᐊᑦᔨᒌᑦᑎᖏᑦᑐᑦ ᐃᒐᔭᐅᔪᓄᑦ ᐅᐊᕈᑎᑦᓴᔦ herbs”.
ᓄᓇᕕᒻᒥ ᖃᐅᔨᓴᕐᓂᓄᑦ ᐱᑦᔪᔨᕕᒃ ᐃᓚᐅᔭᕐᑐᐳᖅ ᐅᑭᐅᕐᑕᑐᒥ ᓱᑯᐃᔭᕐᓯᒪᔪᓂᒃ ᑐᕐᖃᑕᕕᐅᔪᑦ ᑲᑎᖕᖓᓂᖓᓐᓄᑦ ᐳᓕᐊᓐᒥ
ᓄᓇᕕᒻᒥ ᖃᐅᔨᓴᕐᓂᓄᑦ ᐱᑦᔪᔨᕕᒃ ᙯᕐᖂᑕᐅᒪᓚᐅᔪᒋᕗᖅ ᐃᓚᐅᔭᕐᑐᖁᔭᐅᑦᓱᓂ ᐅᑭᐅᕐᑕᑐᒥ ᓱᑯᐃᔭᕐᓯᒪᔪᓄᑦ ᑐᕐᖃᑕᕐᕕᐅᑉ ᑲᑎᖕᖓᓂᖓᓄᑦ ᐊᑑᑎᔭᐅᓂᖃᓚᐅᔪᔪᒧᑦ ᔮᒪᓃᑦ ᓄᓇᖓᓐᓂ ᐳᓕᐊᓐᒥ ᑕᒪᓐᓇ ᑌᒣᒍᑕᐅᓚᐅᔪᔪᖅ ᐆᒃᑐᐱᕆ ᐃᓱᓕᒋᐊᕕᓐᓂᓴᐅᓕᕐᑎᓗᒍ. ᑖᓐᓇ ᑲᑎᖕᖓᓂᖅ ᑲᑎᕕᐅᓲᑦ ᓱᑯᐃᔦᓂᕐᒥᒃ ᑐᕐᖃᑕᕐᕕᐅᔪᓄᑦ ᐅᑭᐅᕐᑕᑐᒥ ᐅᑭᐅᕐᑕᑐᖕᖏᑐᒥᓗ ᓄᓇᓕᕐᔪᐊᓄᑦ ᐅᖃᖃᑎᒌᕝᕕᐅᒋᐊᕐᑐᓯᒪᑦᓱᓂ ᐱᒐᓱᕝᕕᓴᐅᔪᓂᒃ ᐱᐅᓯᒋᐊᕆᒍᑎᐅᓗᑎᒃ ᓯᓚᐅᕐᔪᐊᒥ ᐅᑭᐅᕐᑕᑐᒥᐅᑦ ᓱᑯᐃᔦᓂᒃᑯᑦ ᐱᓇᓱᕋᑎᒌᒍᑎᖏᓐᓂᒃ. ᐃᓚᒋᔭᐅᔪᖅ ᐱᓇᓱᑦᑕᖏᓐᓄᑦ ᐅᑭᐅᕐᑕᑐᒥᐅᑦ ᑲᑎᖕᖓᔨᖏᑕ. ᑕᒃᒐᓂ ᐊᕐᕌᒍᒥ ᑲᑎᖕᖓᓂᖅ ᓯᕗᓪᓕᖃᓚᐅᔪᖅ ᓱᑯᐃᔦᓂᕐᓕᖓᔪᓂᒃ ᐅᖃᕐᕕᒪᕆᐅᑉ ᐱᓂᐊᕈᑎᒋᓚᐅᔪᔭᖏᓐᓂᒃ ᓱᑯᐃᔦᔩᓪᓗ, ᒪᓕᒐᖁᑎᓕᐅᕐᑏᓗ, ᓄᓇᓕᑐᖃᐅᔪᓪᓗ ᖃᐅᔨᒪᔪᖁᑎᖏᑦ ᐊᒻᒪᓗ ᐊᑐᕐᑕᖃᕐᐸᑐᑦ ᐱᓯᒪᑦᓱᑎᒃ ᐃᓚᐅᔪᓂᑦ ᓄᓇᓕᕐᔪᐊᓂᑦ. ᐅᑭᐅᕐᑕᑐᒥᐅᑦ ᐃᓄᐃᑦ ᑲᑎᖕᖓᔨᕐᔪᐊᖏᑦ (ᑲᓇᑕᒥᐅᑦ) ᐊᖓᔪᕐᖄᒪᕆᖓ ᒫᓂᑲ ᐄᓪ-ᑲᓇᔪᖅ ᑭᒡᒐᑐᕐᑎᓚᕆᐅᖃᑕᐅᓚᐅᔪᔪᖅ ᐃᓄᑐᐃᓐᓇᓂᒃ ᑭᒡᒐᑐᕐᓱᓂ. ᓄᓇᕕᒻᒥ ᖃᐅᔨᓴᕐᓂᓄᑦ ᐱᑦᔪᔨᕕᒃ ᑭᒡᒐᑐᕐᑕᐅᓚᐅᔪᕗᖅ ᑐᑭᒧᐊᑦᑎᓯᔨᒥᓄᑦ, ᐃᐊᓚᓐ ᐊᕚᑦᒧᑦ.
ᓅᕕᒻᐱᕆ
ᒪᑭᕝᕕᒃ ᐃᑲᔪᕐᓯᕗᖅ ᐃᖃᓗᓐᓂ ᓂᐅᕕᕐᓂᐊᕕᐊᓗᒃ ᐃᑯᐊᓪᓚᓚᐅᕐᑎᓗᒍ
ᒪᑭᕝᕕᐅᑉ ᐊᖓᔪᕐᖄᒪᕆᖓ ᓵᓕ ᒍᐊᑦ ᐊᐅᓪᓚᑎᑦᓯᒍᑎᖃᓚᐅᔪᕗᖅ ᐃᓚᑦᔪᒍᓱᓐᓂᕋᐅᑎᒥᓂᒃ ᓴᐳᑦᔨᒍᑎᒥᓂᓪᓗ ᐃᖃᓗᒻᒥᐅᓂᒃ ᐃᑯᐊᓪᓚᒍᑦᔭᐅᓚᐅᕐᑎᓗᒋᑦ ᓂᐊᕕᕐᓂᐊᕕᐊᓗᒻᒥᓄᑦ. ᓵᓕ ᐃᒫᒃ ᐅᖃᓚᐅᔪᔪ, “ᓄᓇᕗᒥᐅᑦ ᓯᕗᓕᕐᑎᖏᑦ ᖃᐅᔨᒪᖁᕙᕗᑦ ᐃᑲᔪᕈᓐᓇᕆᐊᑦᑎᓂᒃ ᖃᓄᑐᐃᓐᓇᖅ ᐃᑲᔪᕐᑕᐅᒍᑎᐅᒋᐊᓕᑎᒍᑦ. ᒪᑭᕝᕕᒧᑦ ᐅᕙᑦᑎᓄᑦ ᖃᐅᔨᒋᐊᑐᐃᓐᓇᕈᓐᓇᑐᓯ, ᓴᐳᑦᔨᓯᒪᓂᐊᕋᑦᑕ ᐃᓕᑦᓯᓂᒃ ᐃᖃᓗᒻᒥᐅᓂᒃ ᓂᐅᕕᕐᓂᐊᕕᓯ ᐅᒃᑯᐃᕆᐊᓪᓚᓚᐅᖕᖏᓂᖓᓂ.”
ᐅᐱᒋᔭᐅᒍᑏᑦ ᓄᓇᕕᒻᒥᐅᓄᑦ ᐱᔭᐅᕗᑦ ᑰᒃᔪᐊᒥ ᒪᑭᕝᕕᒃ ᐊᕐᕌᒍᓂ 40-ᓂ ᓴᕐᕿᔮᓕᕐᓂᒥᓂᒃ ᓇᓪᓕᐅᓂᕐᓯᐅᕈᑎᖃᕐᑎᓗᒍ
ᒪᑭᕝᕕᒃ ᓅᕕᒻᐱᕆ 14, 2018-ᒥ ᓇᓪᓕᐅᓂᕐᓯᐅᓂᖃᕐᑎᓗᒍ ᑰᒃᔪᐊᒥ ᑲᑎᑦᑕᕕᒃ ᑲᑎᖕᖓᕕᒻᒥ ᓯᑕᒪᑦ ᓄᑖᑦ ᐱᑎᑕᐅᒍᑎᖃᓕᓚᐅᔪᒋᕗᑦ ᐅᐱᒋᔭᐅᒍᑎᒥᒃ ᓄᓇᕕᒻᒥ. ᑖᒃᑯᐊ ᐅᑯᐊᖑᓚᐅᔪᔪᑦ: ᓵᓕ ᑐᑦᑐ ᑰᒃᔪᐊᕌᐱᖕᒥᐅᖅ, ᓛᓴᔫᓯ ᐃᐳ, ᐃᓄᑦᔪᐊᒥᐅᖅ, ᔨᐊᑲ ᐅᐃᑖᓗᑦᑐᖅ ᐃᓄᑦᔪᐊᒥᐅᖅ ᐊᒻᒪᓗ ᔮᓂ ᒍᐊᑦ ᑰᒃᔪᐊᒥᐅᖅ.
ᓄᓇᕕᒻᒥ ᐅᐱᒋᔭᐅᒍᑏᑦ ᑐᓂᔭᐅᓲᖑᕗᑦ ᐃᓄᑐᐃᓐᓇᓄᑦ ᐊᖑᑎᓄᑦ ᐊᕐᓇᓄᓪᓗ ᐊᖏᔪᓂᒃ ᐱᔭᖃᕐᓯᒪᔪᓄᑦ ᖃᓄᑐᐃᓐᓇᖅ ᐊᑦᔨᒌᑦᑎᖏᑦᑐᓂ ᐱᓂᐊᕐᓂᖃᕐᕕᐅᔪᓂ. ᐅᐱᒋᔭᐅᒍᑏᑦ ᓇᓗᓀᕆᓂᐅᕗᑦ ᐱᔭᖃᕐᓯᒪᒍᑎᖏᓐᓂᒃ ᓄᓇᕕᐅᑉ ᐃᓄᑐᐃᓐᓇᖏᑕ ᖃᑦᓯᑐᐃᓐᓇᓂᒃ ᐅᑭᐅᖃᕐᓱᑎᒃ ᐱᔪᒪᓕᕐᑎᓯᓂᖃᕐᐸᓱᑎᒃᓗ ᓄᓇᕕᒻᒥᐅᓂᒃ ᐃᓚᐅᔫᖃᑎᒌᑦᑐᓂᒃ ᑲᔪᓯᓗᑎᒃ ᓴᐱᓕᕐᑌᓕᓗᑎᒃ ᑎᑭᐅᑎᓂᖃᕋᓱᑉᐸᑐᓂᒃ ᑐᕌᕐᑕᒥᓄᑦ. ᑖᒃᑯᐊ ᓇᓗᓀᕆᓂᐅᔪᑦ ᐊᑦᔨᒋᔭᐅᓚᐅᔪᖕᖏᑐᑦ ᑮᑕ ᓄᑖᒥᒃ ᐁᑦᑐᑎᑕᕈᑎᐅᒋᐅᕐᑐᒥᒃ ᐱᓚᐅᔪᒐᒥᒃ. ᑌᓐᓇ ᐅᐱᒍᓱᓯᕈᑎᑕᖑᔪᖅ ᐊᕐᕌᒍᓐᓂ ᒪᕐᕉᓂ ᓴᓇᔭᐅᓇᓱᓚᐅᔪᕗᖅ.
ᐊᖏᖃᑎᒌᓐᓂᐅᑉ ᐊᑎᓕᐅᕐᑎᒋᓯᒪᔭᖏᑦ ᑐᓂᔨᕕᐅᓚᐅᔪᒻᒥᔪᑦ ᓄᑖᓂᒃ ᐅᐱᒋᔭᐅᒍᑎᑖᒥᓐᓂᒃ ᒪᑭᕝᕕᒃ ᐅᓐᓄᑯᑦ ᓇᓪᓕᐅᓂᕐᓯᐅᓂᖃᕐᑎᓗᒍ. 2015-ᖑᑎᓪᓗᒍ ᑖᒃᑯᐊ ᐊᑎᓕᐅᕐᑎᐅᓯᒪᔪᑦ ᔦᒥᓯ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᒍᑎᖏᓐᓂᒃ ᓇᓗᓀᕐᑕᐅᓂᖃᓚᐅᕐᓯᒪᒻᒥᔪᑦ ᓄᓇᕕᒻᒥ ᐅᐱᒍᓲᓯᕐᑕᐅᓱᑎᒃ ᒫᓐᓇᓯᐅᑎᑐᐃᓐᓇᓂᒃ ᐊᑭᓐᓇᒥᐅᑕᓂᒃ. ᖁᕕᐊᓱᒍᑎᖃᓚᐅᔪᕗᒍᑦ ᐱᑖᕐᑎᓯᒋᐊᒥᒃ ᐊᑎᓕᐅᕐᑎᐅᓯᒪᔪᓂᒃ ᐊᑐᓂᑦ ᓄᑖᓂᒃ ᐅᐱᒋᔭᐅᖑᑎᖏᓐᓂᒃ, ᐊᒻᒪᓗ ᐃᓅᒍᓐᓀᓯᒪᓕᕐᑐᑦ ᐊᑎᓕᐅᖃᑕᐅᓯᒪᔪᑦ ᐃᓚᖏᓐᓂᒃ ᐁᑦᑐᐃᓂᕆᓚᐅᔪᔭᑦᑎᓂᒃ ᐅᐱᒍᓱᓚᐅᔪᒻᒥᓱᑕ.
11-ᖑᑦᓱᑎᒃ ᐃᓄᑐᐃᓐᓀᑦ ᐊᑎᓕᐅᖃᑕᐅᓯᒪᒻᒪᑕ ᔦᒥᓯ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᒍᑎᖏᓐᓂᒃ ᓅᕕᒻᐱᕆ 11, 1975-ᒥ. ᐅᑯᐊ ᐊᑎᓕᐅᕐᑎᐅᓯᒪᕗᑦ: ᓵᓕ ᒍᐊᑦ, ᔮᔨ ᖁᖏᐊᖅ, ᔮᓂ ᐅᐃᓕᐊ, ᔦᐱᑎ ᓄᖕᖓᖅ, ᐳᑐᓕ ᐸᐱᑲᑦᑐᒃ, ᑖᒥ ᑮᓐ, ᐅᔮᐱ ᑐᑲᓗᒃ, ᐲᑕ ᐃᓄᑉᐸᖅ ᒫ ᐋᓇᓈᖅ, ᓵᔪᐃᓕ ᐅᐃᑖᓗᑦᑐᖅ ᐊᒻᒪᓗ ᓵᓕ ᐋᕐᖓᖅ.
ᓵᓕ ᒍᐊᑦ ᐅᖃᐅᑦᔨᕗᖅ ᐅᖃᐅᓯᒻᒪᕆᓐᓂᒃ ᐊᑐᕐᓱᓂ ᑯᐯᒃ ᑲᕙᒪᖓᓂ ᓄᕐᖃᖁᔨᑦᓱᓂ ᑖᓐᓇᑑᓗᓂ ᑐᑭᑖᕆᖃᑦᑕᕈᓐᓀᖁᑦᓱᒍ ᓄᓇᕕᒻᒨᓕᖓᔪᓂᒃ ᑕᒪᑐᒥᖓᓗ ᐅᖃᓚᐅᕐᐳᖅ Viens Commission Hearing-ᒥᒃ ᑌᔭᐅᔪᒥᒃ ᑐᑭᓯᓂᐊᕐᓂᖃᕐᑎᓗᒋᑦ
ᑫᕙᓪᓚᒍᓯᓕᒫᒥ ᕿᑎᕐᖃᒥᓪᓗ ᐅᓂᒃᑲᐅᔨᓂᖃᕐᓱᓂ ᐅᖄᕕᖃᓚᐅᔪᕗᖅ ᑐᑭᓯᓂᐊᕆᐊᕐᓯᒪᔪᓂᒃ Viens Commission-ᑯᓐᓂᒃ ᓵᓕ ᒍᐊᑦ ᐅᑦᑐᕋᐅᑎᑎᒍᑦ ᑐᑭᓯᑎᑦᓯᒍᑎᖃᓚᐅᔪᔪᖅ ᐱᓂᐊᕐᓂᐅᖃᑦᑕᓯᒪᔪᑦ ᐃᓄᑐᐃᓐᓀᑦ ᐃᓅᓯᖏᓐᓂᒃ ᐃᓱᐃᑦᑐᖔᒧᑦ ᓱᕐᕃᓂᖃᕐᐸᓱᑎᒃ ᐃᓅᓯᖏᓐᓂᒃ ᒪᑯᐊᖑᓂᕋᕐᓱᒋᑦ ᐃᒡᓗᖃᕐᓂᓅᓕᖓᔪᑦ, ᐃᕐᖃᑐᐃᕕᓕᕆᓂᕐᓅᓕᖓᔪᑦ ᐅᕕᒃᑲᓕᕆᓂᕐᓅᓕᖓᔪᓪᓗ. ᐅᖃᓚᐅᔪᔪᖅ “ᑐᓴᓚᐅᕐᖁᖓ ᐃᑉᐸᓴᖅ ᐅᖄᒍᑕᐅᑎᓪᓗᒋᑦ ᑲᑎᕕᒃ ᓄᓇᓕᓕᒫᑦ ᐳᓖᓯᖏᑕ ᑲᑉᐱᐊᓵᕆᒍᑎᖃᕐᑐᕕᓂᐅᓂᖏᓐᓂᒃ ᐱᔭᑦᓴᖁᑎᒥᓐᓂᒃ ᐁᑦᑑᑎᖃᕈᒪᓕᕐᓱᑎᒃᒎᖅ ᑯᐯᒃᑯᑦ ᐳᓖᓯᖏᓐᓄᑦ. ᑕᒪᓐᓈ ᓇᑭᑦ ᐱᓯᒪᕙ? ᑕᒪᑐᒧᖕᖓᓕᖓᔪᑦ ᑐᑭᑖᖑᒍᓐᓇᑐᑐᐊᑦ ᐃᓄᑐᐃᓐᓀᑦ ᓯᕗᓕᕐᑎᖏᓐᓄᑦ, ᓴᕐᕿᑎᑦᓯᓯᒪᔪᑐᐊᖑᒻᒪᑕ ᑲᑎᕕᒃ ᓄᓇᓕᓕᒫᑦ ᐳᓖᓯᖏᓐᓂᒃ. ᐳᓕᓰᑦ ᐃᓂᓪᓚᑕᐅᓯᒪᒻᒪᑕ ᑐᓴᕐᑎᓯᕙᓐᓂᐊᓱᑎᒃ ᐃᒣᓕᖓᒋᐊᖃᓕᕐᖁᓰᕐᑕᐅᕙᓐᓂᐊᓱᑎᒃᓗ ᓄᓇᓕᓐᓂ ᓯᕗᓕᕐᑎᓄᑦ.”
ᓵᓕ ᒍᐊᑦ ᐅᖃᓚᐅᔪᒻᒥᔪᖅ ᑯᐯᒃ ᑲᕙᒪᖓ ᑲᒪᒋᐊᕆᐊᖃᓕᕆᐊᖓ ᐃᓅᖃᑎᖃᕐᓂᒥᓂᒃ ᐃᓄᑐᐃᓐᓇᓂᒃ ᓄᓇᓪᓗᑐᕐᒥᓃᑎᓪᓗᒋᑦ ᑕᒪᓐᓇᓗ ᐊᕐᕌᒍᓄᑦ ᐊᒥᓱᓄᑦ ᐅᑎᕆᐊᕐᓗᓂ. “ᓄᓇᖁᑎᕗᑦ ᓄᑦᑎᑕᐅᓚᐅᕐᓯᒪᓐᓂᒪᑦ ᑯᐯᒃᑯᓅᕐᑕᐅᓱᓂ ᐱᑦᓱᒍ ᓄᓇᑦᓯᐊᑉ ᓄᓇᖁᑎᖏᓐᓂᑦ ᐊᕐᖁᑕᐅᑎᓪᓗᒍ 1912-ᒥ ᓄᓇᓂᒃ ᑎᑎᕐᑐᐃᓂᕐᒨᓕᖓᔪᑦ ᐅᐃᒍᑖᕐᑕᐅᒍᑎᖏᓐᓂᒃ ᐱᖁᔭᑎᒍ ᑕᒪᓐᓇᓗ ᐱᓂᐊᕐᓂᐅᓯᒪᑦᓱᓂ ᑐᑭᓯᓂᐊᕐᑕᐅᓂᖃᕐᑎᓇᒋᑦ, ᐊᖏᓚᐅᕐᑎᓇᒋᓪᓗ ᐃᓄᑐᐃᓐᓀᑦ. ᑯᐯᒃ ᐅᓂᖓᑕᖃᓚᐅᕐᓂᒪᑦ ᓄᓇᒥᒃ ᐃᓄᖏᓐᓂᒃ ᐱᔪᒪᔭᖃᕋᓂ. ᑕᒪᓐᓇ ᐊᓕᐊᓇᖕᖏᑐᓪᓚᕆᒃ. ᐱᒐᓱᐊᒻᒪᕆᒍᑎᒋᓗᒋᑦ ᐅᖃᖃᑎᒌᓐᓂᖃᕆᐊᖃᓕᕐᑐᒍᑦ ᐱᑦᔪᑎᖃᕐᓗᑕ ᓇᒻᒥᓂ-ᑐᑭᑖᕐᑐᐃᔨᐅᓂᑦᓴᑎᓐᓂᒃ ᐅᖃᖃᑎᒌᒍᑎᖃᕐᓗᑕ,” ᐅᖃᓚᐅᕐᑐᖅ ᓵᓕ ᒍᐊᑦ.
ᒪᑭᕝᕕᒃ ᖁᕕᐊᒋᔭᖃᒻᒪᕆᑉᐳᖅ ᑖᒃᑯᐊ ᑐᑭᓯᓂᐊᕐᓂᖃᕆᐊᕐᑐᓚᐅᔪᒋᐊᖏᑦ ᕕᐋᓐ ᑲᒥᓴᓐᑯᑦ ᙯᕐᖁᔨᒍᑎᑦᑎᓂᓪᓗ ᐊᖏᓚᐅᔪᒋᐊᖏᑦ ᑎᑭᑦᓱᑎᒃ ᓄᓇᕕᒻᒧᑦ ᑐᓵᒋᐊᕐᑐᓱᑎᒃ ᓄᓇᕕᒻᒥᐅᑦ ᐃᓱᒫᓗᒍᑎᖏᓐᓂᒃ ᐃᕐᙯᑎᒋᐊᓚᐅᔪᕙᕗᓪᓗ ᐃᒫᒃ ᐅᖃᐅᑎᑦᓱᒋᑦ, “ᐱᓀᓗᑕᕗᑦ ᐋᕐᕿᒍᑎᑦᓴᑕᕐᑕᐅᓂᐊᖕᖏᓚᑦ ᓯᕿᓂᕐᒥᑦ ᐱᔪᓂᒃ. ᐋᕐᕿᒍᑎᑦᓴᐅᓚᖓᔪᑦ ᐃᓱᒪᑖᖑᒋᐊᖃᕐᒪᑕ ᓄᐃᑕᐅᓗᑎᒃᓗ ᐃᓄᖁᑎᑦᑎᓄᑦ. 2018-ᒦᓕᕋᑦᑕ. ᐅᓪᓗᐃᑦ ᑐᑭᑖᕆᓂᐅᖃᑦᑕᓯᒪᔪᑦ ᓄᓇᑦᑎᓅᓕᖓᔪᓂᒃ ᑯᐯᒃ ᓯᑎᒥᐅᓄᑦ ᖃᓄᕐᓗᓃᑦ ᓂᓪᓕᔭᖏᒻᒪᕆᑦᑎᓗᑕ ᐊᓂᒍᕐᓯᒪᓕᕐᖁᑦ ᐅᑎᕐᓂᐊᕈᓐᓀᐳᓪᓗ.”
ᑖᒃᑯᐊ ᕕᐋᓐ ᑲᒥᓴᓐ/Viens Commission-ᑯᑦ. ᓴᕐᕿᑎᑕᐅᓯᒪᕗᑦ ᑯᐯᒃ ᑲᕙᒪᖓᓄᑦ ᑏᓯᒻᐱᕆ 21, 2016-ᖑᑎᓪᓗᒍ. ᐊᑦᓯᕋᐅᑎᓪᓚᕆᖏᑦ ᐊᑕᖏᕐᓱᑎᒃ ᐃᒣᓕᔪᑦ The Public Inquiry Commission on relations between Indigenous Peoples and certain public services in Québec: listening, reconciliation and progress/ᐃᓄᓕᒫᓂᒃ ᑐᑭᓯᓂᐊᕐᕕᖃᕐᓂᓄᑦ ᑲᑎᖕᖓᔩᑦ ᐃᓕᖓᔪᑦ ᐃᓅᖃᑎᖃᕐᓂᓄᑦ ᓄᓇᓕᑐᖃᕐᓂᒃ ᐊᒻᒪᓗ ᐃᓚᖏᑦ ᐃᓄᓕᒫᓂᒃ ᐱᑦᔪᔨᒍᑏᑦ ᐱᓪᓗᒋᑦ ᑯᐯᒃ ᓄᓇᓕᕐᓚᖓᓂ. ᑖᒃᑯᐊ ᑲᑎᖕᖓᔨᓕᐊᖑᓯᒪᔪᑦ ᑐᑭᓯᓂᐊᕐᓂᓅᓕᖓᑦᓱᑎᒃ ᖃᕆᑕᐅᔭᒃᑯᑦ ᑕᑯᓇᓱᑦᑕᐅᕕᖓᑦ ᐅᓇ cerp.gouv.qc.ca
ᑏᓯᒻᐱᕆ
ᑰᕕᒃ ᑯᒑᓘᑉ ᐃᒪᕐᒥᐅᑕᓂᒃ ᐱᐅᓕᐊᕐᓯᕕᖓ ᐊᓪᓚᓯᒪᔪᖕᖑᐃᒍᑎᐅᕗᖅ ᓱᕐᕋᑕᐅᑦᑌᓕᒍᑎᑖᕐᑕᐅᓱᓂ
ᑯᕕᒃ ᑯᒐᓘᑉ ᐃᒪᕐᒥᐅᑕᓂᒃ ᐱᐅᓕᐊᕐᓯᕕᖓ ᐃᓕᑕᕆᔭᐅᓂᕐᑖᓱᓂ ᐊᓪᓚᓯᒪᔪᖕᖑᐃᒍᑎᑖᕐᑕᐅᓱᓂ ᓱᕐᕋᑕᐅᑦᑌᓕᒍᑎᑖᕐᑕᐅᓱᓂ ᑏᓯᒻᐱᕆ 3, 2018-ᖑᑎᓪᓗᒍ, ᓄᑭᖃᕐᓂᓴᖕᖑᑕᐅᑦᓱᑎᒃ ᓱᕐᕋᑕᐅᑦᑌᓕᒍᑎᖏᑦ ᐱᓇᓱᒐᕐᓂᒃ ᐱᕙᓪᓕᐊᑎᑦᓯᖑᑎᖃᓲᓄᑦ ᑖᒃᑯᐊ ᓴᐳᑦᔭᐅᒪᒍᑎᑖᕐᑐᑦ ᐃᒣᓪᓗ ᓄᓇᐅᔪᓪᓗ ᐊᖏᔪᖅ. ᑰᕕᒃ ᑯᒐᓘᑉ ᐃᒪᕐᒥᐅᑕᓂ ᐱᐅᓕᐊᕐᓯᕕᖓ ᐅᓖᒪᒻᒪᑦ ᓄᓇᒥᒃ 4,000-ᓂᒃ ᓯᒃᑭᑕᐅᓕᖓᑦᓱᑎᒃ ᑭᓚᒦᑕᐅᓂᕋᕐᑕᐅᔪᓂᒃ ᑕᕐᕋᖓᓂ ᓯᕿᓂᐅᑉ ᓂᐱᕝᕕᐊᓃᑦᓱᓂ ᓄᓇᖁᑕᐅᔪᒥ. ᓄᓇᐅᓪᓗ ᐃᒪᐅᓪᓗ ᓴᐳᑦᔭᐅᒪᒍᑎᖏᓐᓂᒃ ᐱᓇᓱᒍᑏᑦ ᐱᕙᓪᓕᐊᑎᑕᐅᓯᓚᐅᔪᑎᓪᓗᒋᓂ ᐊᕐᕌᒍᐃᑦ 9 ᐊᓂᒍᕐᓯᒪᓕᕐᑐᑦ, ᑌᑦᓱᒪᓂ ᒪᑭᕝᕕᓗ, ᑲᑎᕕᒃ ᓄᓇᓕᓕᒫᑦ ᑲᕙᒪᖓᓪᓗ ᐊᒻᒪᓗ ᑯᐯᒃ ᑲᕙᒪᒃᑯᑦ ᐊᕙᑎᓕᕆᓂᕐᓄᑦ ᐱᑦᔪᔨᕕᖓᑦ ᐱᕙᓪᓕᐊᑎᑦᓯᒍᑎᖃᓯᓚᐅᕐᓯᒪᒻᒪᑕ ᑐᑭᓯᓂᐊᕐᓂᓂᒃ ᐸᕐᓇᕈᑎᐅᓛᕐᓱᑎᒃ ᓱᕐᕋᑕᐅᑦᑌᓕᒍᑎᑖᕐᑕᐅᒋᐊᓕᓐᓂᒃ ᓄᓇᓂᒃ ᑐᑭᓯᓂᐊᕐᓱᑎᒃ ᐊᒻᒪᓗ ᐃᓗᕐᖁᓯᕐᒨᓕᖓᔪᑎᒍᑦ ᐱᓪᓚᕆᐅᑎᑕᐅᓂᖏᓐᓂᒃ ᑐᑭᓯᓂᐊᕈᑎᖃᕐᒥᓱᑎᒃ ᐃᓄᑐᐃᓐᓀᑦ ᓄᓇᕕᒻᒥᐅᑦ ᑕᐅᑐᑦᑕᖏᑎᒍᑦ. ᓱᕐᕋᑕᐅᒋᒃᑯᑎᑖᕐᑕᐅᒪᔪᑦ ᓄᓀᑦ ᖃᓄᕐᓗᓃᑦ ᐱᓇᓱᒐᕐᓂᒃ ᐱᓇᓱᕝᕕᐅᔪᓐᓇᖏᓪᓚᑦ. ᑌᒣᒻᒪᑦ ᓱᕐᕋᑕᐅᒌᒃᑯᑎᑖᕐᑕᐅᒪᓕᕐᖁᖅ ᑰᕕᒃ ᑯᒑᓗᓪᓗ ᐊᒻᒪᓗ ᑰᑉ ᐊᕕᒍᑎᖏᑦ ᐅᔭᕋᓐᓂᐊᕕᑦᓴᓯᐅᕐᕕᐅᔪᓐᓇᕋᑎᒃ ᐅᔭᕋᓐᓂᐊᕕᐅᔪᓐᓇᓂᐊᕋᑎᓪᓗ. ᓯᑕᒪᑦ ᓄᓇᓖᑦ ᑕᒃᑲᖓᑦ ᑯᒑᓗᒻᒥᑦ ᐃᓄᒃᒍᑎᑦᓴᑖᕐᑕᐸᒻᒪᑕ ᐊᓐᓂᑐᕐᕕᒋᕙᒃᑲᒥᒍ. ᑯᕕᒃ ᑯᒑᓗᒃ ᓱᕐᕋᑕᐅᒌᒃᑯᑎᑦᓴᑕᕐᑕᐅᒪᑦ ᑌᒣᓕᖓᓚᖓᓕᕐᓂᖓᓂᒃ ᑐᓴᕐᑕᐅᑎᑦᓯᒍᑎᐅᓚᐅᔪᕗᖅ ᓄᓇᓖᑦ ᑭᒡᒐᑐᕐᑎᖏᓐᓄᑦ, ᐃᓚᐅᔪᑦ ᐃᓚᖓᑦ ᑌᑦᓱᒥᖓ ᐅᓪᓗᒥ ᑕᒪᑐᒥᖓ ᑐᑭᑖᕆᕕᐅᔪᒥᒃ ᐅᖃᓚᐅᔪᕗᖅ ᐃᒫᒃ, “ᑖᓐᓇ ᐅᓪᓗᖅ ᐃᓅᓯᓕᒫᕋᓂ ᐅᓪᓗᓯᐊᖑᓂᕐᐸᐅᕗᖅ”.
ᒪᑭᕝᕕᐅᑉ ᐊᖓᔪᕐᖄᒪᕆᖓ ᑭᐅᕗᖅ ᐅᖃᒻᒪᕆᒍᑕᐅᔪᓂᒃ ᐱᐅᓯᒋᐊᕆᒐᔭᕐᓱᑎᒃ ᓂᕿᑦᓯᐊᑐᒪᓂᕐᒥᒃ ᑲᓇᑕᐅᑉ ᑕᕐᕋᖓᓂ ᐱᓇᓱᒍᑎᓂᒃ
ᑏᓯᐱᕆ 10-ᖑᑎᓪᓗᒍ, ᒪᑭᕝᕕᐅᑉ ᐊᖓᔪᕐᖄᒪᕆᖓ ᓵᓕ ᒍᐊᑦ ᑲᕙᒪᑐᖃᒃᑯᑦ ᑐᑭᑖᕈᑎᕕᓂᖏᓐᓂᒃ ᐅᖃᐅᓯᖃᓚᐅᔪᕗᖅ ᐃᓕᖓᑎᓪᓗᒋᑦ ᑕᕐᕋᒥ ᓂᕿᑦᓯᐊᑐᒪᓂᑦᓴᓄᑦ ᑲᓇᑕᒥ ᐱᓇᓱᒍᑎᓕᖑᒪᔪᑦ ᐱᕙᓪᓕᐊᑎᑦᓯᒋᐊᕈᑎᑦᓯᐊᖑᒋᐊᖏᑦ ᐱᐅᓯᒋᐊᕆᒍᑎᑦᓱᑎᒃ ᐱᓇᓱᒍᑎᑕᖑᒪᔪᓂᒃ ᐃᓄᓐᓅᓕᖓᑦᓱᑎᒃ ᐃᑲᔪᕐᑕᐅᒍᑎᓂᒃ ᐱᔭᖃᕆᐊᓕᓐᓂ ᓯᕗᓪᓕᐸᐅᒋᐊᓕᓐᓂᒃ – ᐃᓄᑐᐃᓐᓇᓂᒃ.
“ᐃᓱᒪᖃᓚᐅᔪᒐᑦᑕ ᓂᕿᑦᓯᐊᑐᒪᓂᕐᒥᒃ ᑲᓇᑕᐅᑉ ᑕᕐᕋᖓᓂ ᐱᓇᓱᒍᑎᓕᐊᖑᒪᔪᑦ ᐱᒋᐊᖕᖓᓱᑎᓪᓗ ᓈᒻᒪᓈᕐᓂᖃᕐᓯᒪᖕᖏᒋᐊᖏᑦ” ᐅᖃᓚᐅᔪᖅ ᑌᒣᓕᑦᓱᓂ ᓵᓕ ᒍᐊᑦ. “ᓯᕗᓪᓕᐅᓚᐅᕐᓯᒪᔪᑦ ᓂᕿᓂᒃ ᐊᓪᓚᑕᕐᕕᑎᒍᑦ ᐱᓇᓱᒍᑎᐅᓯᒪᔪᑦ ᐱᐅᓂᕐᓴᐅᓯᒪᔪᑦ ᐃᓄᑐᐃᓐᓇᓄᑦ. ᖃᐅᔨᒪᖕᖏᓚᖓ ᖃᓄᖅ ᐃᓱᒪᖃᕐᓂᕋᓗᐊᕐᒪᖔᑕ ᑲᕙᒪᑐᖃᒃᑯᑦ ᑲᕙᒪᒋᓚᐅᔪᔭᖓᑦ ᓯᕗᓕᕐᑕᐅᓚᐅᔪᔪᖅ ᓯᑏᕙᓐ ᖄᐅᐳᒧᑦ ᓱᒧᑦ ᑖᒃᑯᓂᖓ ᐊᓪᓚᑖᕐᕕᑎᒎᕐᑎᓯᒍᑎᓂᒃ ᓄᕐᖃᑎᑦᓯᓂᕐᒪᖔᑕ ᖃᓄᕐᓗᓃᑦ ᓯᖁᒥᑕᐅᓂᖃᕐᓯᒪᑎᓐᓇᒋᑦ. ᓂᕿᑦᓯᐊᑐᒪᓂᖅ ᑲᓇᑕᐅᑉ ᑕᕐᕋᖓᓂ ᐱᒋᐊᖕᖓᓕᓚᐅᕐᓯᒪᒐᒥᓂᑦ ᕿᐸᒋᔭᐅᔪᖅ ᐱᑦᔪᑎᖃᕐᓱᓂ ᓂᐅᕕᕐᓂᐊᕕᓐᓂᒃ ᑭᓯᐊᓂ ᐃᑲᔪᕐᓯᔭᖃᕐᓂᒥᓄᑦ ᐃᓄᓐᓂᒃ ᓂᐅᕕᕐᓂᐊᐸᑦᑐᓂᒃ ᐃᑲᔪᕐᓯᓂᖃᕋᓂ. ᐅᖃᐅᓯᖃᕈᒪᒋᕗᖓ ᐊᒥᓱᖕᖑᕆᐊᕐᑕᐅᓛᓕᕆᐊᖏᑦ ᓂᖀᑦ ᓂᕆᔭᐅᓂᕐᓴᐅᕙᑦᑐᑦ ᐃᓄᓐᓄᑦ ᐃᓚᒋᓕᐅᑦᔭᐅᓗᑎᒃ ᐃᑲᔪᕐᓯᔭᐅᒍᑎᑕᓖᑦ ᐊᓪᓚᑕᐅᓯᒪᕕᐊᓐᓄᑦ, ᑭᓯᐊᓂ ᑕᒪᓐᓇᐅᒐᓗᐊᕐᑎᓗᒍ ᓱᓕ ᑐᑭᓯᒪᑎᑕᐅᒍᑎᖃᕐᓃᑦ ᑕᒪᒃᑯᓄᖕᖓᓕᖓᔪᓂᒃ ᓱᓕ ᐱᑕᖃᕐᑎᑕᐅᑦᓯᐊᕆᐊᓖᑦ ᓱᕐᖁᐃᑐᒥᒃ ᑲᕙᒪᑐᖃᒃᑯᑦ ᑮᓇᐅᔭᕐᑐᕈᑎᖏᑦ ᐊᑐᕐᑕᐅᓯᐊᕐᓂᖃᕋᓗᐊᕐᒪᖔᑕ ᐃᑲᔪᕐᓯᒍᑎᐅᒐᓱᓐᓂᒥᒍᑦ ᓂᕿᓂᒃ ᐊᑦᑕᓇᕐᑐᒦᑎᑦᓯᑌᓕᓂᕐᓄᑦ ᐃᓄᑐᐃᓐᓀᑦ ᓄᓇᖓᓐᓂ.”
ᓵᓕ ᒍᐊᑦ ᓇᓗᓀᕆᓚᐅᔪᒻᒥᔪᖅ ᐅᐃᒍᑖᖑᓯᒪᔪᓂᒃ ᑮᓇᐅᔭᒻᒪᕆᓐᓂᒃ ᐅᓄᕐᓂᓕᓐᓂᒃ $62.6-ᒥᓕᐋᓐᓂᒃ ᑮᓇᐅᔭᖃᕐᑎᓯᒍᑎᐅᒋᐊᒃᑲᓂᓚᐅᔪᔪᓂᒃ ᑲᓇᑕᐅᑉ ᑕᕐᕋᖓᓂ ᓂᕿᑦᓯᐊᑐᒪᓂᕐᓅᓕᖓᔪᓂᒃ ᐅᖃᐅᓯᐅᓚᐅᔪᔪᓂᒃ ᑐᓴᕐᑎᓯᒍᑎᐅᑦᓱᑎᒃ 2018 ᐅᑭᐊᖓᓂ ᒪᑭᑕᒐᓱᒍᑎᓅᓕᖓᔪᓂᒃ ᐊᓪᓚᓯᒪᔪᖕᖑᐃᒍᑎᑎᒍᑦ, ᐃᓚᖃᕐᒥᓱᑎᒃ ᑮᓇᐅᔭᓂᒃ ᐅᓄᕐᓂᓕᓐᓂᒃ $10.4-ᒥᓕᐋᓐᓂᒃ ᐃᓕᖓᓚᖓᔪᓂᒃ ᐊᓐᓂᑐᐊᖃᕐᐸᑐᑦ ᓴᐳᑦᔭᐅᒪᒍᑎᖏᑕ ᐃᑲᔪᕐᓯᔭᐅᒍᑎᖏᓐᓄᑦ.
“ᐅᖃᓚᐅᔪᒻᒥᓱᓂᓗ ᐃᒫᒃ “ᓂᓪᓕᕕᖃᕈᒪᒋᕗᖓ ᐱᑦᔪᑎᖃᕐᓗᖓ ᓴᕐᕿᑎᑕᐅᓂᕆᓚᐅᔪᔭᖓᓂᒃ ᐃᓄᑐᐃᓐᓇᓄᑦ-ᐃᓕᖓᑦᓱᑎᒃ ᐱᓇᓱᖃᑎᒌᒍᑎᖃᕐᓯᔪᑦ ᐱᓇᓱᑦᑕᖃᕐᓗᑎᒃ ᓂᕿᑦᓯᐊᑐᒪᒋᐊᖃᕐᓂᒧᑦ ᑕᕐᕋᒥ ᐱᓇᓱᖑᑎᓂᒃ ᑕᒪᒃᑯᐊ ᐃᓚᒋᔭᐅᑎᓪᓗᒋᑦ ᐱᑕᖃᕇᕐᑐᓄᑦ ᐃᓄᑐᐃᓐᓇᓂᒃ ᑲᕙᒪᑐᖃᒃᑯᑦ ᐱᓇᓱᒍᑎᒋᑦᓱᒋᑦ, ᒪᑭᕝᕕᒃ ᑖᒃᑯᓄᖓ ᐃᓚᐅᔫᖃᑕᐅᒻᒪᑦ,“ ᐅᖃᓚᐅᔪᔪᖅ ᓵᓕ ᒍᐊᑦ. “ᑕᒪᓐᓇ ᐱᓪᓚᕆᐅᓂᖃᕐᓱᓂ ᐊᓯᑦᔨᓂᔪᖅ ᐱᑦᔪᑎᖃᕐᓱᓂ ᐊᑕᐅᓯᕐᒥᒃ ᓇᐅᓕᒫᓄᑦ ᓈᒻᒪᑐᒥᒃ ᐊᖏᓂᕐᑕᖃᖕᖏᓂᕐᒥᒃ ᐋᕐᕿᒍᑎᐅᒐᔭᕐᑐᓂᒃ. ᐃᓄᑐᐃᓐᓀᑦ ᐃᓅᓯᖓᑦ ᐊᑦᔨᐅᖏᑦᑑᓂᑐᐃᓐᓇᑯᑦ ᓱᕐᕋᑕᐅᖕᖏᒪᑦ ᐊᓯᒥᓂᑦ ᓄᓇᖃᕐᖄᓯᒪᔪᖃᑎᒥ ᓴᓂᐊᓐᓂ ᑖᒃᑯᐊ ᐃᓚᐅᖃᑕᐅᒐᓗᐊᕐᒥᑎᓪᓗᒋᑦ ᓂᕿᑦᓯᐊᑐᒪᕐᓂᓂᒃ ᑲᓇᑕᐅᑉ ᑕᕐᕋᖓᓂ ᐱᓇᓱᒍᑎᓄᑦ, ᐃᓄᑐᐃᓐᓀᑦ ᓄᓇᖁᑎᓕᒫᖏᓐᓄᑦ ᐃᓕᖓᒐᒥ – 53-ᓄᑦ ᓄᓇᓕᓐᓄᑦ ᐊᑐᕐᑕᐅᔪᑦ ᐱᒋᐊᕐᓱᑎᒃ ᑐᒃᑐᔮᕐᑐᒥᑦ ᑎᑭᑦᓱᒍ ᐊᕐᕕᑑᖅ – ᐊᖏᔪᑲᓪᓚᓂᒃ ᐊᑦᔨᒌᖕᖏᓂᖃᕐᑐᑦ ᐱᒍᓐᓇᕈᑎᐅᔪᓂᒃ. ᑖᒃᑯᐊ ᐱᓇᓱᖃᑎᒌᒍᑎᖃᕐᑐᑦ ᐃᑉᐱᒋᔭᖃᑦᓯᐊᕆᐊᖃᓚᖓᔪᑦ ᐊᕗᖓᐅᓂᕐᓴᓗ ᐱᐅᓯᒋᐊᕆᓂᖃᕐᓗᑎᒃ ᐱᓇᓱᒍᑎᓂᒃ ᐃᓕᖓᔪᓂᒃ ᐃᓄᑐᐃᓐᓇᓄᑦ”
ᓄᓇᕕᒻᒥ ᖃᐅᔨᓴᕐᓂᓄᑦ ᐱᑦᔪᔨᕕᒃ ᓵᓚᖃᐅᑎᑖᕐᐳᖅ ᐅᑭᐅᕐᑕᑐᒥ ᖃᐅᔨᒪᔭᖃᕐᓂᓄᑦ ᑲᓇᑕᒥ ᐱᒻᒪᕆᐅᑦᓱᓂ ᑕᕐᕋᒥ ᓱᑯᐃᔭᕐᓯᒪᔪᓕᕆᓂᕐᒥᒃ ᓇᓗᓀᕐᑕᐅᒍᑎᒥᒃ
ᓄᓇᕕᒻᒥ ᖃᐅᔨᓴᕐᓂᓄᑦ ᐱᑦᔪᔨᕕᐅᑉ ᖃᐅᔨᓴᕐᑎᖓ ᐱᑕ ᒣ ᓵᓚᖃᐅᑎᑖᕐᐳᖅ ᐃᓄᐃᑦ ᑕᐱᕇᑦ ᑲᓇᑕᒥ ᐃᓄᑐᐃᓐᓇᓂᒃ ᐃᓕᑕᕐᓯᓂᕐᒥᒃ ᓇᓗᓀᕆᒍᑎᒥᒃ
ᑕᕐᕋᒥ ᓱᑯᐃᔦᓂᕐᒧᑦ ᓇᓗᓀᕐᑕᐅᒍᑏᑦ ᓇᓗᓀᕆᒍᑎᐅᓲᖑᕗᑦ ᐱᓪᓚᕆᑲᓪᓚᒥ ᐃᑲᔪᕐᓯᔭᖃᕐᓯᒪᔪᓂᒃ ᖃᐅᔨᒪᒍᓯᓂᒃ ᐊᒻᒪᓗ ᑐᑭᓯᒪᒍᑎᓂᒃ ᑲᓇᑕᐅᑉ ᑕᕐᕋᖓᓂᒃ. ᓄᓇᕕᒻᒥ ᖃᐅᔨᓴᕐᓂᓄᑦ ᐱᑦᔪᔨᕕᒃ ᓴᕐᕿᑎᑕᐅᓯᒪᕗᖅ ᐃᓄᑐᐃᓐᓇᓄᑦ, ᐃᓄᑐᐃᓐᓇᓅᓕᖓᓚᖓᑦᓱᓂ, ᐊᐅᓚᑦᓯᒋᐊᕐᑎᐅᓱᓂ ᖃᐅᔨᓴᕐᑕᐅᒋᐊᖃᓕᕐᑐᓂᒃ ᑕᕐᕋᒥᐅᑦ ᓄᓇᓕᖏᓐᓂ. ᓄᓇᕕᒻᒥ ᖃᐅᔨᓴᕐᓂᓄᑦ ᐱᑦᔪᔨᕕᒃ ᖃᐅᔨᒪᔭᐅᔪᖅ ᐱᔪᓐᓇᓂᖃᑦᓯᐊᒪᕆᒋᐊᖓ ᐃᓄᐃᑦ ᓄᓇᖏᓐᓂ, ᐱᓂᐊᕐᓂᓕᕆᓂᕐᓄᓗ ᐊᓯᒥᓄᓪᓗ ᖃᐅᔨᓴᕐᑎᓄᑦ ᖃᐅᔨᒪᔭᐅᑦᔪᑎᖃᕐᓱᓂ ᐱᔭᖃᑦᓯᐊᓯᒪᒋᐊᖓ ᐅᐊᕈᑎᒌᑎᑦᓯᓯᐊᕐᓂᑯᑦ ᖃᓪᓗᓈᓪᓗ ᓱᑯᐃᔦᒍᓯᖏᓐᓂᒃ ᐊᕙᑎᒨᓕᖓᔪᓂᓪᓗ ᑐᑭᓯᒪᑦᓯᐊᓂᖏᓐᓂᒃ ᐃᓄᑐᐃᓐᓀᑦ ᐊᕐᕌᒍᒐᓵᓗᓐᓂ ᐃᓄᑐᐃᓐᓇᑎᒍᑦ ᓄᓇᐅᑉ ᖃᓄᐃᑦᑑᓂᖓᓂᒃ ᖃᐅᔨᒪᔭᑐᖃᕐᒥᓂᒃ. ᐊᑐᕐᑕᐅᓂᖃᑦᓯᐊᑎᓪᓗᒋᑦ ᐱᐅᓯᑐᖃᒃᑯᑦ ᖃᐅᔨᒪᔭᐅᔪᑦ ᖃᐅᔨᓴᕐᓃᑦ ᑖᒃᑯᑎᒎᓈᕐᑐᑦ ᐃᓕᑕᕆᔭᐅᓂᖃᕐᐳᑦ, ᓄᓇᕕᒻᒥ ᖃᐅᔨᓴᕐᓂᓄᑦ ᐱᑦᔪᔨᕕᒃ ᓯᕗᒃᑲᑕᕐᓯᒪᕗᖅ ᓄᐃᑕᐅᕙᓪᓕᐊᑎᓪᓗᒋᑦ ᐱᓇᓱᑦᑕᐅᔪᑦ ᖃᓄᐃᓘᕐᑕᐅᒋᐊᖃᕐᓂᖏᓐᓅᓕᖓᔪᑦ ᓲᕐᓗ ᐃᓪᓓᕆᑦᓯᐊᓱᑎᒃ ᑖᒃᑯᓃᖓ ᒪᕐᕈᐃᖑᑦᓱᑎᒃ ᐱᓇᓱᒍᑎᑦᓴᔮᓐᓂᒃ ᐊᑕᐅᓯᐅᓖᑦᓯᐊᕋᒥ.
ᐱᖓᓱᑦ ᓄᓇᕕᒻᒥ ᖃᐅᔨᓴᕐᓂᓄᑦ ᐱᑦᔪᔨᕕᐅᑉ ᓂᕐᔪᑎᓕᕆᓂᕐᓅᓕᖓᔪᓂᒃ ᐱᓪᓗᑯᒋᐊᓕᓐᓂᒃ ᐱᓇᓱᑦᑎᖏᑦ ᓇᓪᓕᐅᑎᒍᑦᔭᐅᓚᐅᕆᕗᑦ ᐱᒻᒪᕆᐅᓂᖃᕐᓱᑎᒃ ᓇᓪᓕᐅᓃᓐᓄᑦ ᑕᒃᒐᓂ ᐊᕐᕌᒍᒥ. ᐋᓕᒃᔅ ᑯᐊᑕᓗ ᐱᑕ ᒣᓗ ᐊᕐᕌᒍᓂ 35-ᓂ ᐱᓇᓱᒐᖃᓕᕐᓂᒥᓄᑦ ᓇᓪᓕᐅᑎᓚᐅᕐᒪᓃᒃ, ᓵᓐᑎ ᓴᐸ ᓇᓪᓕᐅᑎᒍᑦᔭᐅᑎᓪᓗᒍ ᐊᕐᕌᒍᓂ 25-ᓂ ᐱᓇᓱᒐᖃᓕᕐᓂᒥᓄᑦ. ᐱᑕ ᒣ ᓵᓚᖃᐅᑎᑖᓚᐅᔪᒻᒥᔪᖅ ᓇᓗᓀᕐᑕᐅᒍᑎᒥᓂᒃ ᐃᓄᐃᑦ ᑕᐱᕇᑦ ᑲᓇᑕᒥ ᓇᓗᓀᕆᓂᕐᓄᑦ ᓵᓚᖃᐅᑎᑖᕐᑎᓯᒍᑎᒋᓲᖓᓂᒃ ᑕᑯᑦᓴᐅᔪᓂᒃ ᐱᓇᓱᑦᑕᒥᓂᒃ ᐱᔪᓐᓇᑕᖃᑦᓯᐊᒪᕆᑦᑐᓄᑦ ᐅᑭᐅᕐᑕᑐᒥ ᖃᐅᔨᓴᕐᓂᒥᒃ ᐱᓇᓱᑦᓱᑎᒃ.
ᓵᓚᖃᐅᑎᑖᖑᔪᑦ ᐅᖃᕐᑕᐅᓚᐅᔪᔪᑦ ᑏᓯᒻᐱᕆ 13-ᖑᑎᓪᓗᒍ ᐅᒃᑯᐊᕙᓪᓕᐊᓕᕐᑎᓗᒍ ᐅᓐᓄᑯᑦ ᓂᕆᓇᓱᖃᑎᒌᓐᓂᒃ ArcticNet ᐊᕐᕌᒍᑕᒫᑦ ᓱᑯᐃᔦᓂᕐᓅᓕᖓᔪᓂᒃ ᑲᑎᖕᖓᓂᖃᕐᑎᓗᒋᑦ ᐋᑐᒑᒥ ᑏᓯᒻᐱᕆ 10-14, 2018 ᐱᓇᓱᐊᕈᓯᖓᓂ.
-30-
ᖃᐅᔨᒋᐊᕐᕕᐅᔪᓐᓇᑐᖅ:
ᒍᐃᓕᐋᒻ ᑕᒍᕐᓈᖅ
ᑐᑭᒧᐊᑦᑎᓯᔨ ᑐᓴᖃᑦᑕᐅᑎᒍᑎᓕᕆᓂᕐᓄᑦ
ᒪᑭᕝᕕᒃ ᐱᓇᓱᒐᖃᕐᕕᒥ
ᐅᖄᓚᐅᑎᖓ: 819 964-2925
wtagoona@makivik.org
www.makivik.org
ᒪᑭᕝᕕᒃ ᐱᕙᓪᓕᐊᑎᑦᓯᓂᕐᒧᑦ ᐱᓇᓱᒐᖃᕐᕕᐅᕗᖅ ᑎᓕᔭᐅᓯᒪᒍᑎᖃᕐᓱᓂ ᑲᒪᔨᐅᓂᐊᕐᑎᓗᒍ ᑮᓇᐅᔭᒻᒪᕆᓐᓂᒃ ᕿᒻᒪᖁᑕᐅᒪᔪᓂᒃ ᑮᓇᐅᔭᕐᑕᖑᓯᒪᑦᓱᑎᒃ ᔦᒥᓯ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᒍᑕᐅᒍᑎᕕᓂᖏᓐᓂᑦ. ᒪᑭᕝᕕᐅᑉ ᐱᔭᑦᓴᖁᑎᖏᑦ ᐃᓚᖃᕐᐳᑦ ᐊᐅᓇᑦᓯᓂᕐᒥᓗ ᑮᓇᐅᔭᓕᐅᕈᑎᖃᕐᓂᒥᓪᓗ ᑖᒃᑯᓂᖓ ᑮᓇᐅᔭᒻᒪᕆᓐᓂᒃ ᖁᕝᕙᑎᕆᒍᑎᑦᓴᕆᑦᓱᒋᓪᓗ ᒪᑭᑕᒐᓱᒍᑎᑎᒍᑦ ᐱᕈᕐᐸᓕᐊᑎᒋᐊᓕᓐᓂᒃ ᐱᑕᖃᕐᑎᓯᒍᑎᐅᓗᑎᒃ ᐃᑲᔪᕐᓯᒪᓂᕐᒥᒃ ᓴᕐᕿᑎᑕᐅᒋᐊᖃᓕᕐᐸᑕ ᐃᓄᐃᑦ-ᐃᖏᕐᕋᑎᓐᓂᐊᑕᖏᑦ ᐱᓇᓱᒉᑦ ᓄᓇᕕᒻᒦᑐᑦ, ᒪᑭᕝᕕᒃ ᖁᕝᕙᑎᕆᔨᐅᕗᖅ ᐃᓄᐃᑦ ᐃᓗᕐᖁᓯᖏᓐᓂᓗ ᐅᖃᐅᓯᖓᓐᓂᓗ ᐊᓯᐅᑎᑦᓯᑌᓕᓂᕐᓂᒃ ᐃᓚᖃᕐᒥᑎᓪᓗᒋᑦ ᐃᓗᓯᓕᕆᓃᑦ, ᖃᓄᐃᖕᖏᓯᐊᕐᓃᑦ, ᐊᔪᕐᓴᓂᕐᒥᓗ ᐱᑕᖃᓗᐊᕐᑎᓯᑦᑌᓕᓃᑦ, ᐃᓕᓐᓂᐊᕕᖃᕐᑎᓯᓃᓪᓗ ᐃᓄᑐᐃᓐᓇᓂᒃ ᓄᓇᓕᓐᓂ.