ᑲᓇᑕᓕᒫᑦᓯᐊᒥ, ᒪᑭᕝᕕᒃ ᓱᕐᖁᐃᑐᒥᒃ ᐊᑦᔨᒋᔭᐅᓂᖃᖕᖏᑑᕗᖅ. ᑎᒥᖕᖑᑎᑕᐅᓚᐅᔪᑦᓱᓂ ᔫᓂ 28, 1978-ᒥ ᐊᐅᓚᑦᓯᔨᐅᓂᐊᓕᕐᑎᓗᒍ ᑮᓇᐅᔭᓂᒃ ᐱᓯᒪᔪᓂᒃ ᑖᒃᑯᓇᖕᖓᑦ ᐃᓄᐃᑦ ᓄᓇᑖᕋᓱᐊᒻᒪᕆᐅᑎᖏᓐᓄᑦ ᓯᕗᓪᓕᐹᓄᑦ ᑲᓇᑕᒥ, ᐅᑯᐊ ᔦᒥᔅᐯᒥᓗ ᑯᐯᒃ ᑕᕐᕋᖓᓂᓗ ᐊᖏᖃᑎᒌᓐᓂᖓᑦ (ᐊᖏᖃᑎᒌᓐᓂᖓᑦ), ᓱᓂᕐᓴᒪᕆᐅᓯᒪᓕᕐᒪᑦ ᐊᐅᓚᑦᓯᒍᓗᑐᐃᓐᓇᓂᕐᒥᑦ.
ᐱᓂᐊᕐᓂᓕᕆᓂᕐᑎᒍᑦ, ᐃᓗᕐᕈᓯᑎᒍᓪᓗ ᒪᑭᑉᐸᓕᐊᒐᓱᐊᕐᓂᑎᒍᓪᓗ, ᒪᑭᕝᕕᑯᑦ ᓯᕗᓕᕐᓯᓯᒪᓕᕐᑐᑦ ᐱᕈᕐᓴᑕᐅᔪᖃᕐᑎᓗᒍ ᐱᕙᓪᓕᐊᑎᑕᐅᔪᖃᕐᑎᓗᒍᓗ ᓄᓇᒥᒃ ᑌᔭᐅᒍᓯᓕᒻᒥᒃ ᓄᓇᕕᒻᒥᒃ, ᐊᖏᓂᖃᕐᑐᒥᒃ ᑯᐯᒃ ᓄᓇᓕᒫᖓᓄᑦ ᐱᖓᔪᓪᓗᐊᕆᔭᕐᒥᒃ, ᑲᓇᑕᐅᑉ ᐃᓗᐊᓂ, ᐃᓄᐃᑦ ᓄᐃᑦᓯᓯᒪᓕᕐᑐᑦ ᓇᒻᒥᓂᖅ ᐃᓂᒥᓂᒃ ᐃᓕᑕᕆᔭᐅᒪᒍᑎᒥᓂᓪᓗ.
ᒪᑭᕝᕕᑯᑦ ᐱᓇᓱᐊᕐᑕᖏᑦ ᑕᑯᑦᓴᐅᑎᑦᓯᒪᑕ ᑕᒪᒃᑯᐊ ᐅᓪᓗᒥ ᓄᓇᖃᕐᖄᓯᒪᔪᓄᑦ ᐊᖏᒻᒪᕆᐅᑎᐅᓕᕐᑐᐃᑦ ᐅᕝᕙᓘᓐᓃᑦ ᓄᓇᑖᕋᓱᐊᒻᒪᕆᓐᓂᒧᑦ ᐊᖏᖃᑎᒌᒍᑎᐅᓯᒪᓕᕐᑐᑦ ᐱᕙᓪᓕᕈᑕᐅᓲᖑᒻᒪᑕ ᐃᓗᓐᓀᓄᑦ ᖃᓄᐃᓕᐅᖃᑕᐅᔪᓄᑦ, ᑲᕙᒪᓄᓪᓗ ᐊᒻᒪᓗ ᐃᓄᓐᓄᑦ. ᑖᒃᑯᐊ ᑕᑯᑦᓴᐅᑎᑦᓯᓯᒪᒻᒪᑕ ᓇᓗᓀᕐᑕᐅᓂᖃᕈᓐᓇᕆᐊᖏᑦ ᓄᑖᑦ ᖃᓄᐃᓕᐅᖃᑎᒌᒍᑕᐅᓂᐊᓕᕐᑐᑦ ᑖᒃᑯᓄᖓ ᑯᐯᒃᑯᓗ ᑲᓇᑕᐅᓪᓗ ᑲᕙᒪᖏᓪᓗ ᐊᒻᒪᓗ ᓄᓇᖃᕐᖄᓯᒪᔪᐃᑦ ᐃᓄᖁᑎᖏᑦ, ᑕᒪᓐᓇ ᐱᓪᓗᒍᓕ ᓄᓇᕕᐅᑉ ᐃᓄᖏᑦ.
1970-ᐄᑦ ᐊᕐᕌᒍᖏᑦ ᐃᓱᐊᓅᕐᐸᓕᐊᓯᓚᐅᔪᒻᒪᑕᓂᑦ, ᒪᑭᕝᕕᑯᑦ ᓯᕗᓕᕐᓯᓯᒪᓕᕐᑐᑦ ᑲᓇᑕᐅᑉ ᐊᒻᒪᓗ ᓯᓚᕐᔪᐊᑉ ᐃᓗᐊᓂ ᐊᑕᐅᑦᓯᑰᕐᑎᓯᑦᓯᐊᓱᑎᒃ ᓄᓇᖃᕐᖄᓯᒪᔪᐃᑦ ᐱᔪᓐᓇᐅᑎᖏᓐᓂᒃ, ᐱᓂᐊᕐᓂᓕᕆᓂᕐᑎᒍᑦ ᐊᖏᖃᑎᒌᒐᓱᐊᕈᓐᓇᓂᕐᒥᓗ ᐊᒻᒪᓗ ᐱᔅᓇᓯᓕᕆᒍᓐᓇᓂᕐᒥᒃ ᑲᔪᓯᑦᓯᐊᓱᑎᒃ ᐱᔅᓇᓯᓕᕆᓂᒃᑯᓗ ᒪᑭᑕᒐᓱᐊᕐᓂᑯᓪᓗ ᐱᒋᐊᕐᑎᓯᑦᓯᐊᕈᓐᓇᕆᐊᒥᓪᓗ ᑐᓂᕐᕈᑎᖃᕐᑐᓂᒃ ᑲᓇᑕᓕᒫᒥᓗ, ᑯᐯᒃᓕᒫᒥᓗ ᓄᓇᓕᓕᒫᑎᒍᓪᓗ ᒪᑭᑕᒐᓱᐊᕐᓂᓕᕆᓂᕐᒧᑦ.
ᑖᓐᓇ ᑎᒥᐅᔪᖅ ᖄᖏᐅᑎᓯᒪᓪᓗᑯᐊᓗᓯᒪᕗᖅ ᐃᓱᒫᓗᒍᑎᐅᒋᐊᖕᖓᓯᒪᔪᓂᒃ ᐊᓯᑦᔨᓂᐊᖕᖒᓚᐅᔪᒐᒥᒃ ᓄᓇᖃᕐᖄᓯᒪᓂᕐᒧᑦ ᑌᔭᐅᒪᒍᑎᒥᓂᒃ ᐱᔪᓐᓇᐅᑎᒥᓂᓪᓗ ᐊᒻᒪᓗ ᓄᓇᑐᖃᕐᒥᓂᒃ. ᐅᑎᕐᑐᓴᓕᐅᕆᑦᓯᐊᕋᓱᐊᕐᓂᑯᑦ ᐊᑭᓕᕐᑕᐅᒍᑎᒋᓯᒪᔭᖏᑦᑕ ᑮᓇᐅᔭᖁᑎᖏᓐᓂᒃ ᐊᑐᕐᓱᑎᓪᓗ ᓇᓪᓕᑳᕐᑕᐅᒪᔪᓂᒃ ᐃᓄᐃᑦ “ᑌᔭᐅᒪᓂᖃᕐᑐᑎᒍᑦ” ᓄᓇᖁᑎᖏᓐᓂᒃ ᑕᑯᑦᓴᐅᑎᑦᓯᓯᒪᒻᒪᑕ ᑕᒪᓐᓇ ᓄᓇᑖᕋᓱᐊᕐᓂᐅᔪᖅ ᐊᐅᓚᑦᔦᓂᖃᕈᓐᓇᑎᓗᒍ ᓯᕗᓕᕐᓯᒍᓐᓇᑎᓪᓗᒍᓗ ᒪᑭᑕᒐᓱᐊᕐᓂᓕᕆᓂᕐᒥᓗ ᐱᕕᑦᓴᓂᓪᓗ ᐱᕙᓪᓕᐊᑎᑦᓯᓂᕐᒥᒃ, ᐱᓂᐊᕐᓂᓕᕆᓂᐅᑉ ᐱᕙᓪᓕᐊᑎᑕᐅᓂᖓᓂᓪᓗ, ᖃᐅᔨᓴᕐᓂᒪᕆᒻᒥᓗ ᐊᕙᑎᐅᓪᓗ ᖃᐅᔨᓴᕐᑕᐅᓂᖓᓂᒃ ᐊᒻᒪᓗ ᓄᓇᓖᑦ ᐃᓱᐊᖁᑎᑦᓴᖏᓐᓄᑦ ᑮᓇᐅᔦᕈᑎᓂᒃ.
ᒪᑭᕝᕕᑯᑦ ᐊᑐᕐᓂᖃᕈᓐᓇᓯᐊᕐᑐᒥᒃ ᖃᓄᐃᓕᐅᖃᑎᖃᕐᓂᕆᓲᖓ ᑲᕙᒪᑐᖃᒃᑯᓂᓪᓗ ᑯᐯᒃ ᑲᕙᒪᖓᓂᓪᓗ ᑕᒪᒃᑯᓇᓂ ᐊᕐᕌᒍᓯᒪᕐᓕᑐᓂ ᑐᑭᒧᐊᑦᑎᑕᐅᓯᒪᓕᕐᓱᑎᒃ ᐊᔪᐃᓐᓇᑐᓄᑦ ᓯᕗᓕᕐᓯᔨᓄᑦ ᐊᑌᓐᓇᑐᒥᒃ ᓯᕗᒧᐊᕈᑎᖃᖃᑦᑕᓱᑎᒃ ᑕᒪᒃᑯᓄᖓ ᓄᓇᑖᕋᓱᐊᕈᑎᐅᓯᒪᔪᐃᑦ ᑲᔪᓯᑎᑕᐅᓂᖏᓐᓂᒃ ᐊᒻᒪᓗ ᐱᕕᖃᕐᑎᓯᓂᒃᑯᑦ ᐃᓱᐊᕆᔭᐅᔪᓂᒃ ᑕᒪᒃᑯᓄᖓ ᓄᓇᑖᕐᓂᒧᑦ ᐃᓂᓪᓓᒍᑎᓄᐊᖓᔪᕐᓄᑦ.
ᑌᒪᖓᓂᑦ ᓄᓇᑖᕋᓱᐊᕆᐊᖕᖓᕈᑏᑦ ᐊᑎᓕᐅᕐᑕᐅᓕᓚᐅᕐᓯᒪᒻᒪᑕᓂᑦ 1975-ᒥ, ᒪᑭᕝᕕᑯᑦ ᐊᒻᒪᓗ ᑲᓇᑕᐅᑉ ᑲᕙᒪᖓᑦ ᑲᔪᓯᑎᑦᓯᓯᓚᐅᔪᒻᒥᔪᑦ 14-ᓂᒃ ᐊᕐᕌᒍᕐᓂᒃ ᐊᖏᖃᑎᒌᒐᓱᐊᕈᑕᐅᓚᐅᔪᒥᒃ ᓄᐃᑦᓯᒍᑕᐅᓚᐅᔪᒥᓪᓗ ᐅᑯᓂᖓ ᓄᓇᕕᒻᒥᐅᑦ ᐃᓄᐃᑦ ᓄᓇᑖᕐᓂᒧᑦ ᐊᖏᖃᑎᒌᒍᑎᖏᓐᓂᒃ 2007-ᒥ. ᑖᒃᑯᐊ ᐊᖏᖃᑎᒌᒍᑏᑦ ᐃᓕᖓᑎᑕᐅᒻᒪᑕ ᑕᕆᐅᕐᒧᑦ ᐊᒻᒪᓗ ᕿᑭᕐᑕᓄᑦ ᑕᓯᐅᔭᕐᔪᐊᒦᑦᑐᓂᒃ ᐅᖓᕙᒦᑦᑐᓂᓪᓗ.
ᑌᒪᖕᖓᓂᑦ ᓄᐃᑕᐅᓕᓚᐅᕐᓯᒪᒐᒥᓂᑦ, ᒪᑭᕝᕕᑯᑦ ᐃᓕᑕᕆᔭᖃᕐᓯᒪᓕᕐᒪᑕ ᐃᓚᐅᖃᑕᐅᓪᓚᕆᒋᐊᖃᕐᓂᒥᓂᒃ ᑲᓇᑕᒥᐅᓕᒫᑎᒍᑦ ᐱᓂᐊᕐᓂᓕᕆᓂᖏᑦᑕ ᑐᑭᒧᐊᑦᑎᑕᐅᓂᖏᓐᓄᑦ. ᓄᓇᕕᐅᑉ ᐃᓄᖏᑦ ᐃᓚᐅᖃᑕᐅᓪᓚᕆᓚᐅᕐᓯᒪᕗᑦ ᐱᖁᔭᕐᔪᐊᖅ ᐊᖏᖃᑎᒌᒐᓱᐊᕈᑕᐅᒻᒪᕆᓐᓂᖓᓄᑦ 1982-ᒥ ᓃᓂᕐᑕᐅᑎᑦᓯᒍᑕᐅᓚᐅᔪᓂᒃ ᐃᓄᐃᑦ ᐱᔪᓐᓇᐅᑎᖏᓐᓂᒃ ᑲᓇᑕᐅᑉ ᐱᖁᔭᕐᔪᐊᖓᓂ ᐊᒻᒪᓗ ᐱᖁᔭᕐᔪᐊᑎᒍᑦ ᓴᐳᑦᔨᓯᒪᒍᑎᓂᒃ ᑕᒪᒃᑯᓄᖓ ᓄᓇᑖᒻᒪᕆᐅᑎᓄᑦ ᐊᖏᖃᑎᒌᒍᑎᖏᓐᓄᑦ. ᒪᑭᕝᕕᑯᑦ ᓱᓕ ᓲᖑᔪᒥᒃ ᑲᓇᑕᒥᐅᓕᒫᑎᒍᑦ ᓂᐸᖃᕐᑎᓯᒐᓱᐊᖃᑦᑕᑐᑦ ᐊᕐᖁᑎᖃᕐᓱᑎᒃ ᐃᓄᐃᑦ ᑕᐱᕇᑦ ᑲᓇᑕᒦᒃᑯᑦ ᑲᑎᒪᔨᖏᓐᓂᒃ. ᑖᒃᑯᐊ ᐃᓚᐅᖃᑕᐅᓪᓚᕆᓯᒪᒻᒥᔪᑦ ᐱᕙᓪᓕᐊᑎᑕᐅᔪᖃᕐᑎᓗᒍ ᖃᓄᐃᓕᖓᒍᑎᓂᒃ ᑕᒪᒃᑯᐊ ᐊᕕᑦᑐᓯᒪᔪᐃᑦ ᓯᕗᓕᕐᑎᖏᑦᑕ ᑲᑎᒪᓂᖃᕐᑎᓗᒋᑦ, ᐅᑯᓄᖓᓗ Kelowna Accord 2005-ᒧᑦ, ᐊᒻᒪᓗ ᑲᓇᑕᐅᑉ ᑲᕙᒪᖓᑕ ᐃᓛᓂᐅᖏᑑᕈᑎᒋᓯᒪᔭᖏᓐᓄᑦ ᑐᕌᒐᖃᕐᑐᕕᓂᐅᓯᒪᓂᖓᓄᑦ “ᐊᓯᐅᑎᑦᓯᕙᓪᓕᐊᑎᑦᓯᓂᕐᒥᒃ” ᑕᒪᑦᓱᒧᖓ ᐊᓪᓓᑦ ᐃᓕᓐᓂᐊᕆᐊᕐᑎᑕᐅᓲᖑᓂᕕᓂᖏᓐᓄᑦ, ᓱᕐᕃᓂᖃᓚᐅᔪᒻᒥᔪᒥᒃ ᐃᓄᓐᓂᒃ ᑲᓇᑕᐅᑉ ᓄᓇᖁᑎᖏᓐᓃᒥᐅᓕᒫᓂᒃ.
ᒪᑭᕝᕕᐅᑉ ᑎᓕᔭᐅᒪᒍᑎᖃᓪᓚᕆᑦᑐᑦ ᒪᑭᑕᒐᓱᐊᕐᓂᓕᕆᓂᕐᒥᒃ ᐱᕙᓪᓕᐊᑎᑦᓯᒐᓱᐊᕐᓂᒥᓪᓗ ᐊᒻᒪᓗ ᐱᓇᓱᒐᑦᓴᓕᐅᕐᓂᒥᒃ. ᑖᒃᑯᐊ ᐃᓕᑕᕆᔭᖃᕆᐊᖕᖓᐅᑎᖃᕐᒪᑕ ᐊᖏᓂᕐᐸᐅᔪᒥᒃ ᒪᑭᑕᒐᓱᐊᕐᓂᓕᕆᓂᖅ ᓯᕗᓂᑦᓴᕆᔭᐅᖏᓐᓇᓂᐊᕐᑎᓗᒍ ᓄᓇᕕᒻᒥᐅᓄᑦ ᑐᖕᖓᕕᖃᕐᓗᑎᒃ ᓄᑕᐅᓯᓕᕈᓐᓇᑐᓂᓪᓗ ᓄᑕᐅᓯᓕᕈᓐᓇᖏᑦᑐᓂᓪᓗ ᑕᒪᒃᑯᓂᖓ ᐱᕕᑦᓴᑐᖃᕐᓂᒃ.
ᓄᑕᐅᓯᓕᕈᓐᓇᖏᑦᑐᐃᑦ ᐱᕕᑦᓴᐅᔪᐃᑦ ᐱᓪᓗᒋᑦ, ᒪᑭᕝᕕᑯᑦ ᐃᓚᐅᖃᑕᐅᕙᑦᑐᑦ ᑲᔪᓯᔪᓄᑦ ᐊᖏᖃᑎᒌᒐᓱᐊᕐᓂᓕᕆᔨᓄᑦ ᐱᓇᓱᐊᖃᑎᒌᓐᓂᒧᓪᓗ ᑕᒪᒃᑯᓂᖓ ᓇᒻᒥᓂᕆᔭᐅᔪᕐᓂᓗ ᐃᓄᓕᒫᓂᒃ ᐱᒍᑦᔨᓲᓂᓪᓗ. ᑕᒪᒃᑯᐊ ᐃᓚᖃᕐᓱᑎᒃ ᑲᔪᓯᔪᓂᒃ ᐊᖏᖃᑎᒌᒐᓱᐊᖃᑎᖃᕐᓂᓂᒃ ᑯᐯᒃᑯᑦ ᐃᑯᒪᓕᕆᔨᖏᓐᓂᒃ ᑕᒪᒃᑯᓄᖓ ᓄᐃᑕᒌᕐᑐᓄᑦ ᐊᒻᒪᓗ ᐃᓱᒪᒋᔭᐅᒐᓱᐊᕐᑐᓄᑦ ᔦᒥᔅᐯᒥ ᑰᓐᓄᑦ ᐃᑯᒪᓕᐅᕈᑎᑦᓴᓂᒃ ᐱᓇᓱᐊᕐᑕᐅᔪᓄᑦ, ᐅᔭᕋᓐᓂᐊᑎᓂᓪᓗ Glencore PLC-ᑯᑦ ᑕᒪᑦᓱᒧᖓ ᕃᒡᓚᓐᒥ ᐅᔭᕋᓐᓂᐊᕕᖓᓄᑦ. ᒪᑭᕝᕕᑯᑦ ᑲᒪᒋᔭᖃᓲᖑᒻᒥᔪᑦ ᑮᓇᐅᔦᕈᑕᐅᒋᐊᓕᓐᓂᒃ ᑲᒪᒋᔭᖃᕐᓂᒥᓪᓗ ᑮᓇᐅᔭᓂᒃ ᐱᔭᐅᓯᒪᔪᓂᒃ ᑕᒪᒃᑯᑎᒎᓇ ᐊᖏᖃᑎᒌᒐᓱᐊᕈᑕᐅᓯᒪᔪᕐᓄᑦ.
ᒪᑭᕝᕕᐅᑉ ᓄᑕᐅᓯᓕᕈᓐᓇᑐᓂᒃ ᐱᕕᑦᓴᓂᒃ ᐱᕙᓪᓕᐊᑎᑦᓯᒐᓱᐊᕐᕕᖓᑕ ᐱᓇᓱᐊᕐᕕᖓᑦ ᐊᐅᓚᑦᓯᓲᖑᕗᖅ ᑲᓇᑕᓕᒫᒥ ᐃᓕᑕᕆᔭᐅᒪᓂᖃᕐᑐᒥᒃ ᖃᐅᔨᒐᓱᐊᕐᕕᒥᒃ ᑰᔾᔪᐊᒥ ᐱᓇᓱᐊᒐᖃᓲᓂᒃ ᖃᐅᔨᓴᕐᓂᒪᕆᓐᓂᒃ ᑕᒪᒃᑯᓂᖓ ᐆᒪᔪᓂᒃ, ᐊᒻᒪᓗ ᐊᕙᑎᒥᒃ. ᒪᑭᕝᕕᑯᑦ ᓴᐳᒻᒥᓲᖑᒻᒥᔪᑦ ᑕᒪᒃᑯᓂᖓ ᒪᙯᑦᑏᓗ, ᐃᖃᓗᓐᓂᐊᑏᓪᓗ ᒥᑭᒋᐊᕐᓂᐊᑏᓪᓗ ᑲᑐᑦᔨᖃᑎᒌᖏᓐᓂᒃ, ᓄᓇᒥᒃ ᑎᒍᒥᐊᕐᑎᖏᑦᑕ ᑎᒥᖁᑎᖏᓐᓂᓗ ᐊᐅᓚᑦᓯᔨᐅᓲᖑᒻᒪᑕ ᓄᓇᓂᒃ ᓇᒻᒥᓂᕆᔭᐅᔪᓂᒃ ᐃᓄᓐᓄᑦ ᑭᓯᐊᓂ (ᑲᑎᑯᔨ 1 ᓄᓇᖁᑎᖏᓐᓂᒃ).
ᑕᓪᓕᒪᓂᒃ ᐃᓄᑦᑕᖃᕐᑐᒥᒃ ᒪᑭᕝᕕᐅᑉ ᐳᕐᑐᓂᕐᓴᖏᑦᑕ ᑲᑎᒪᔨᖏᑦ ᐊᒻᒪᓗ 16-ᖑᔪᑦ ᑲᑎᒪᔨᑐᐃᓐᓇᖏᑦ ᓂᕈᐊᕐᑕᐅᓲᑦ ᓄᓇᕕᐅᑉ ᐃᓄᖏᑦᑕ ᐃᓄᖁᑎᖏᓐᓄᑦ. ᒪᕐᕉᓄᑦ ᐃᓚᐅᕕᐅᔪᕐᒥᒃ ᐊᐅᓚᑦᓯᔨᒻᒪᕆᓐᓂᒃ ᑎᓕᔭᐅᔪᖃᓲᖑᒻᒥᓱᓂ ᐳᕐᑐᓂᕐᓭᓗ ᑲᑎᒪᔩᓪᓗ ᑲᑎᒪᔨᖏᓐᓄᑦ ᐃᓄᒻᒪᕆᐅᑦᓱᑎᒃ ᑲᑎᒪᔨᒋᔭᐅᓲᕐᓂᒃ.
ᓄᓇᕕᐅᑉ ᐃᓄᖏᑦ, ᐊᕐᖁᑎᖃᕐᓱᑎᒃ ᒪᑭᕝᕕᑯᓂᒃ, ᐃᓚᐅᔫᖃᑕᐅᕗᑦ ᑲᓇᑕᓕᒫᒥ ᐃᓄᐃᑦ ᑎᒥᖁᑎᖓᓄᑦ, ᐃᓄᐃᑦ ᑕᐱᕇᑦ ᑲᓇᑕᒥ ᐊᒻᒪᓗ ᓄᓇᕐᔪᐊᒥᐅᖑᖃᑎᒌᑦ ᑎᒥᖁᑎᖓᓄᑦ, ᐃᓄᐃᑦ ᓯᓚᕐᔪᐊᒥᐅᑦ ᑲᑎᒪᔨᒻᒪᕆᖏᓐᓄᑦ.