ᒪᑭᕝᕕᐅᑉ ᑮᓇᐅᔭᓕᕆᐅᑎᖏᑦ ᓱᓕ ᐱᔪᒻᒪᕆᐅᓂᖃᖏᓐᓇᑐᑦ, ᐊᒻᒪᓗ ᑖᒃᑯᐊ ᓯᕗᓪᓕᓂᑕᐅᓯᒪᔪᑦ $90 ᒥᓕᓐᑖᓓᑦ ᐊᑭᓖᒍᑎᐅᓯᒪᔪᑦ ᑲᓇᑕᐅᑉ ᑲᕙᒪᖓᓄᑦ ᑕᒪᑦᓱᒧᖓ ᔦᒥᔅᐯᒥᓗ ᑯᐯᒃ ᑕᕐᕋᖓᓂᓗ ᐊᖏᖃᑎᒌᓐᓂᖓᑎᒍᑦ ᐱᖓᓱᕕᓪᓗᑕᕐᑐᐃᑦ ᐅᖓᑖᓄᕐᓯᒪᓕᕐᑐᓂᒃ 1975-ᒥᓂᑦ.
ᔦᒥᔅᐯᑉ ᐊᖏᖃᑎᒌᓐᓂᖓᑦ ᐊᑎᓕᐅᕐᑕᐅᑐᐊᕐᒪᑦ, ᓄᓇᕕᐅᑉ ᐃᓄᖏᑦ ᑐᑭᑖᕐᓯᒪᔪᑦ ᑖᒃᑯᐊ ᐊᑭᓖᒍᑎᐅᒋᖕᖓᓯᒪᔪᐃᑦ ᑮᓇᐅᔭᒻᒪᕆᖁᑎᖏᑦ ᐃᓗᐃᒃᑲᐅᖏᓐᓇᓯᐊᕆᐊᖃᕐᑎᓗᒋᑦ ᑎᒍᒥᐊᕐᑕᐅᒪᓯᓗᑎᒃ ᐱᕈᕐᑎᑕᐅᕙᓪᓕᐊᓂᐊᕐᑎᓗᒋᑦ ᓯᕗᓂᑦᓴᒥ ᑭᖑᕚᖑᓂᐊᕐᑐᓄᑦ ᐊᑐᕋᑦᓴᐅᓂᐊᕐᑎᓗᒋᑦ. ᐊᒻᒪᓗᑦᑕᐅᖅ ᑕᒪᒃᑯᓇᓂ ᐊᕐᕌᒍᕐᓂ ᙯᔪᕐᓂ ᑮᓇᐅᔦᕈᑕᐅᔪᖃᖃᑦᑕᓚᖓᒻᒪᑦ ᒥᓕᐊᓐᑖᓚᒦᑦᑐᒐᓴᕐᔪᐊᓂᒃ ᑖᒃᑯᓄᖓ ᑎᒍᒥᐊᕐᑕᐅᔪᓄᕐᑕᐅᖃᑦᑕᓂᐊᕐᑐᓂᒃ ᑮᓇᐅᔦᕈᑎᑦᓴᐅᓂᐊᕐᑎᓗᒋᑦ ᐊᒡᒍᑐᕋᑦᓴᐅᓂᐊᕐᑐᓂᓪᓗ ᑕᒪᓐᓇᐅᑎᑕᐅᒍᓐᓇᓕᕐᒪᑦ ᑖᒃᑯᓄᖓ ᓄᓇᕕᒻᒥᐅᑦ ᐃᓄᐃᑦ ᓄᓇᑖᕐᓂᒧᑦ ᐊᖏᖃᑎᒌᒍᑎᖏᓐᓄᑦ ᑖᒃᑯᐊ ᐊᑐᓕᕐᑎᑕᐅᓚᐅᔪᒻᒪᑕ 2007-ᒥ.
ᒪᑭᕝᕕᑯᑦ ᑮᓇᐅᔭᑎᒍᑦ ᑲᔪᓯᑎᑦᓯᓯᐊᕐᐸᓂᖓ ᓲᕐᓗ ᐆᒻᒪᑎᖃᕐᑎᑕᐅᕗᖅ ᑖᑫᑯᓄᖓ ᑮᓇᐅᔦᕈᑐᓂᒃ ᕿᒥᕐᕈᔩᑦ ᑲᑎᒪᔨᐊᐱᖏᓐᓄᑦ, ᑖᒃᑯᐊ ᖃᓄᐃᓕᒋᐊᖁᔨᔨᒋᔭᐅᒻᒪᑕ ᒪᑭᕝᕕᐅᑉ ᐳᕐᑐᓂᕐᓴᖏᓐᓄᓗ ᑲᑎᒪᔨᖏᓐᓄᓗ ᑲᒪᒋᔭᖃᕐᓱᑎᒃ ᐊᐅᓚᑦᓯᓂᓕᕆᐅᑎᓂᒃ ᑮᓇᐅᔦᕈᑕᐅᔪᓄᓪᓗ ᑮᓇᐅᔭᒻᒪᕆᓐᓄᑦ ᑮᓇᐅᔭᖃᕐᑎᓯᒍᑕᐅᔪᕐᓄᑦ ᑕᒪᒃᑯᓄᖓ ᕿᑲᕐᑐᓴᔭᕐᓄᑦ, ᑐᖕᖓᕕᓐᓄᑦ ᐊᒻᒪᓗ ᑮᓇᐅᔭᓂᒃ ᓂᐅᕐᕈᓭᕕᓐᓄᑦ.
ᑖᒃᑯᐊ ᑮᓇᐅᔦᕈᑕᐅᔪᓂᒃ ᕿᒥᕐᕈᔩᑦ ᑲᑎᒪᔨᐊᐱᖏᑦ ᕿᒥᕐᕈᓂᖃᓲᖑᒻᒥᔪᑦ ᑲᑐᑦᔮᖑᑦᓱᑎᒃ ᐱᓇᓱᐊᕐᑕᐅᔪᓂᒃ ᐱᓇᓱᐊᕐᑕᐅᒍᒪᓕᕐᑐᓂᓪᓘᓃᑦ ᐃᓚᖃᕐᑐᓂᒃ ᓄᐃᑕᐅᔪᖃᓕᑐᐊᕐᐸᑦ ᓄᑖᒥᒃ ᑎᒥᐊᕈᐃᑦ ᑲᒻᐸᓂᖁᑎᖏᓐᓂᒃ ᐊᒻᒪᓗ ᐊᑦᑕᑐᕈᒪᐅᑎᓂᒃ ᐱᒐᓱᐊᕈᑎᓂᒃ.
ᑖᒃᑯᐊ ᕿᒥᕐᕈᔩᑦ ᐃᒣᓕᒋᐊᖁᔨᓲᖑᒻᒥᔪᑦ ᒪᑭᕝᕕᐅᑉ ᑲᑎᒪᔨᖏᓐᓂᒃ ᐊᕐᕌᒍᑕᒫᑦ ᐸᑦᔭᓕᕆᓕᑐᐊᕋᒥᒃ ᑐᖕᖓᕕᖃᕐᑐᓂᒃ ᐅᑎᕐᑐᓴᐅᓂᐊᕐᑐᐃᑦ ᖃᓄᐃᑦᑑᓚᖓᒍᓇᐅᓂᖏᓐᓂᒃ ᑕᒪᒃᑯᓇᖕᖓᑦ ᑮᓇᐅᔦᕐᓂᑯᑦ ᐅᑎᕐᑐᓴᓕᐊᕆᓯᒪᔭᕐᓄᑦ.
ᑖᒃᑯᐊ ᕿᒥᕐᕈᔩᑦ ᑕᕐᕿᑕᒫᑦ ᑲᑎᒪᓂᖃᓲᖑᕗᑦ ᑕᒪᒃᑯᐊᓗ ᑮᓇᐅᔭᖃᕐᑎᓯᒍᑎᐅᓯᒪᔪᑦ ᐅᑎᕐᑐᓴᓕᐊᕆᔭᐅᓯᒪᔪᐃᓪᓗ ᐃᑉᐱᒋᔭᐅᓂᖃᖃᑦᑕᑎᓪᓗᒋᑦ ᑕᑯᒋᐊᕐᑕᐅᕙᑦᓱᑎᓪᓗ ᐅᓪᓗᑕᒫᑦ ᑖᒃᑯᓄᖓ ᑮᓇᐅᔦᕈᑎᐅᓯᒪᔪᓂᒃ ᑲᑎᒪᔨᐊᐱᖏᓐᓄᑦ.
ᕿᒥᕐᕈᔩᑦ ᑲᑎᒪᔨᐊᐱᖏᓐᓄᑦ ᐃᓚᐅᔪᐃᑦ ᐃᓄᑦᑕᖃᓲᖑᒻᒪᑕ ᒪᑭᕝᕕᐅᑉ ᐱᓇᓱᐊᕐᕕᖏᓐᓂᑦ ᓯᑕᒪᓂᑦ ᐱᓯᒪᔪᓂᒃ, ᓯᕗᓕᕐᓯᔭᐅᔪᓂᒃ ᑮᓇᐅᔭᓕᕆᕕᐅᑉ ᐱᓇᓱᐊᕐᕕᖓᓄᑦ. ᐊᒻᒪᓗᑦᑕᐅᖅ ᐃᓚᐅᔪᐃᑦ ᐱᓯᒪᓲᖑᕗᑦ ᐅᑯᓇᖕᖓᑦ ᐊᖓᔪᕐᖄᒪᕆᐅᑉ ᐊᓪᓚᕕᖓᓂᑦ, ᒪᑭᑕᒐᓱᐊᕐᓂᓕᕆᓂᕐᒥᒃ ᐱᕙᓪᓕᐊᑎᑦᓯᒐᓱᐊᕐᕕᐅᑉ ᐱᓇᓱᐊᕐᕕᖓᓂᑦ, ᐊᒻᒪᓗ ᐱᖁᔭᓕᕆᔩᑦ ᐱᓇᓱᐊᕐᕕᖓᓂᑦ.