ᒪᑭᕝᕕᒃ ᐅᐱᒍᓱᑦᔨᒋᐊᒥᒃ ᑐᓴᐅᒪᔭᐅᖁᔨᕗᖅ ᕕᓕᑉ ᑯᐃᔮᕐᒧᑦ ᑯᐯᖕᒥᓗ ᓕᐳᕈᓪᒥᒃ ᑲᕙᒪᓇᓱᑦᑎᓄᑦ ᑐᑭᑖᕆᒍᑎᖃᑦᓯᐊᑐᒥ ᓵᓚᖃᕐᓂᕆᓚᐅᕐᑕᖏᓐᓄᑦ ᐁᕆᓕ 7-ᒥ ᑯᐯᒃᒥᐅᑦ ᑲᕙᒪᒋᓂᐊᓕᕐᒥᔭᒥᓐᓂᒃ ᓂᕈᐊᕐᓂᖃᕐᑎᓗᒋᑦ.
ᒪᑭᕝᕕᒃ ᓯᕗᓂᖃᑦᓯᐊᐳᖅ ᐱᓇᓱᖃᑎᖃᖃᑦᑕᓂᐊᓕᕐᒥᒋᐊᒥᒃ ᑲᕙᒪᑖᖑᕐᖃᒥᓚᐅᕐᑐᓂᒃ ᐊᐅᓚᑦᓯᖃᑎᒋᓇᓱᓪᓗᓂᒋᑦ ᓄᓇᕕᒻᒨᓕᖓᔪᓂᒃ ᓲᕐᓗ ᐃᓪᓗᐃᓂᐊᕐᓂᓅᓕᖓᔪᓂᒃ ᐃᓄᒃᒍᑎᑦᓴᓂᓪᓗ ᓂᐅᕕᐊᖃᕋᓱᓐᓂᑯᑦ ᐊᑭᑐᓗᐊᕈᑦᔭᐅᓂᕐᓂᒃ. ᒪᑭᕝᕕᐅᑉ ᐊᖓᔪᖅᑳᒪᕆᖓ ᔫᐱ ᑕᕐᕿᐊᐱᒃ ᐅᖃᓚᐅᕐᒪᑦ: “ᓄᓇᕕᒻᒥᐅᑦ ᐃᓄᑐᐃᓐᓀᑦ ᑲᕙᒪᐅᓕᕐᑐᑐᐃᓐᓇᓂᒃ ᓂᕈᐊᕐᑕᐅᔪᓂᒃ ᐱᓇᓱᖃᑎᖃᑦᓯᐊᕈᓐᓇᖏᓐᓇᓲᖑᕗᑦ, ᑐᙵᓱᑦᑎᓯᕗᒍᓪᓗ ᑲᕙᒪᐅᓗᓂ ᐅᓄᕐᑐᓂᒃ ᐃᑦᓯᕙᐅᑕᖃᓚᖓᓕᕐᑐᓂᒃ ᐊᑦᑕᓀᑦᑐᓯᐊᖑᓗᑎᒃ ᑯᐸᐃᒃᒥ ᐊᐅᓚᑦᓯᓂᖃᓚᖓᓕᕐᒥᒪᑕ. ᑖᒃᑯᓄᖓ ᐃᑲᔪᕐᓯᔭᐅᓂᑦᓴᖃᓕᕐᐳᒍᑦ ᓯᕗᓪᓕᐅᔨᒋᐊᓕᑦᑎᒍᑦ ᓄᓇᖁᑎᑦᑎᓅᓕᖓᑎᓪᓗᒋᑦ.”
ᐃᓂᖓ ᐃᓚᖃᕐᑐᖅ ᓄᓇᕕᒻᒥᐅᓂᒃ ᑭᒡᒐᑐᕐᑎᐅᕕᖃᕐᓂᒥᒃ ᓂᕈᐊᕐᑕᐅᔨᐊᖃᕆᐅᕐᒪᑦ ᓕᐳᕈᓪᓂᒃ ᓂᕈᐊᕋᑦᓴᐅᕕᖃᓚᐅᕐᑐᒥ ᑕᐃᒣᒋᐅᑐᐃᓐᓇᖏᑦᑐᖅ ᑕᒐᓪᓗᑐᐊᓗᓪᓕ ᓂᕈᐊᕐᑕᐅᔪᖅ ᑰᒃᔪᐊᒥᐅᖑᑦᓴᒪᕆᒻᒪᑦ, ᔮᓐ ᐴᓭ. ᒪᑭᕝᕕᒃ ᓂᕆᐅᓐᓂᖃᓚᖓᕗᖅ ᑖᓐᓇ ᔮᓐ ᐴᓭ ᐊᑑᑎᖃᑦᑕᓯᒪᓂᕐᒥᒍᓪᓗ ᖃᐅᔨᒪᑦᓯᐊᓂᕐᒥᒍᓪᓗ ᓄᓇᕕᒻᒥ ᐱᓇᓱᑦᑕᐅᒐᓱᑦᑐᓂᒃ ᐃᑲᔪᕐᓯᓯᒪᓂᖃᕐᓂᓴᖓᓂᒃ ᑲᕙᒪᐅᓂᐊᓕᕐᓱᑎᒃ ᓂᕈᐊᕐᑕᐅᖃᒻᒥᓂ.
ᒪᑭᕝᕕᒃ ᖃᐅᔨᒪᖁᔨᒋᕗᖅ ᐳᓕᓐ ᒪᕈᐊᒥ ᐊᖏᔪᒥᒃ ᐅᐱᒋᔭᖃᕆᐊᒥᒃ ᐊᕐᓱᕈᕐᓱᓂ ᐱᓇᓱᒍᑦᔨᓂᕆᓚᐅᕐᑕᖑᓄᑦ ᓄᓇᕕᒻᒥᐅᓂᒃ ᐃᓄᑐᐃᓐᓇᓂ ᓄᓇᓕᕐᓚᐅᑉ ᑲᕙᒪᖓᓂ ᐊᖓᔪᖅᑳᐅᕕᖃᕐᓂᒥᓂ. ᐳᓕᓐ ᒪᕈᐊ ᐃᑲᔪᕐᓯᓯᒪᒻᒪᕆᓚᐅᔪᒻᒪᑦ ᑯᐯᒃ ᑲᕙᒪᒃᑯᑦ ᐃᑲᔪᕐᓯᒍᑎᖏᓐᓂᒃ ᐅᓄᕐᓯᒋᐊᕆᓂᖃᕐᓱᓂ ᐃᓕᖓᓚᖓᑎᓪᓗᒋᑦ ᐃᓄᒃᒍᑎᑦᓴᓂᒃ ᓂᐅᕕᕐᓂᐊᕕᒻᒥ ᐊᑭᑐᓗᐊᔨᐊᖃᕐᓂᖏᓐᓄᑦ ᓄᓇᕕᒻᒥᐅᑦ.